„თიბისი ბანკის“ დამფუძნებლმა, მამუკა ხაზარაძემ საზოგადოებრივი მოძრაობის „ლელო“ პრეზენტაცია დღეს ანაკლიაში გააკეთა. როგორც მან განაცხადა იქმენება ძალა, რომელიც ორიენტირებული იქნება 2020-ში არჩევნების მოგებაზე.
გთავაზობთ თუ როგორ აფასებენ პოლიტიკოსები და ექსპერტები მამუკა ხაზარაძის საზოგადოებრივი მოძრაობის „ლელო“ შექმნას:
“ხელისუფლებამ ყველაფერი გააკეთა, რომ ხაზარაძეს სახსრები არ ჰქონოდა, რათა დიდი და მასშტაბური ღონისძიებისთვის გაეწია ორგანიზება”, – ამის შესახებ ფილოსოფოსმა ზაზა ფირალიშვილმა მამუკა ხაზარაძის საზოგადოებრივი მოძრაობის „ლელოს“ პრეზენტაციის შესახებ საუბრისას განაცხადა.
მისი თქმით, ზოგადად, ხელისუფლებას შეუძლია, რომ საზოგადოებრივ მოძრაობას ხელი შეუშალოს, „ბორბლებში ჯოხი ჩაურჭოს, რომ ვერ იმოძრაოს“, მაგრამ საბოლოოდ ყველაფერს საზოგადოებრივი აზრი წყვეტს.
“ხაზარაძის მიერ წამოწყებული პოლიტიკური პროცესი ჯერჯერობით პოლიტიკურ სადღეგრძელოს ჰგავდა”, – ამის შესახებ უმრავლესობის დეპუტატმა ირაკლი სესიაშვილმა ჟურნალისტებს განუცხადა.
სესიაშვილის თქმით, თუ ხაზარაძის მთავარი მიზანია, რომ ანაკლიის პროექტი განახორციელოს, უმჯობესი იქნება, რომ მან თავის ვალდებულებები შეასრულოს.
“როგორც თავის დროზე ალეკო ელისაშვილმა თქვა უარი პოლიტიკური პარტიების მხარდაჭერაზე, ანალოგიურ სტრატეგიად აღვიქვი ხაზარაძის განცხადება, რომ ის რომელიმე პოლიტიკურ ძალაზე ორიენტაციას არ აიღებს”, – ასე აფასებს პოლიტოლოგი რამაზ საყვარელიძე საზოგადოებრივი მოძრაობის „ლელოს“ პრეზენტაციას.
საყვარელიძის შეფასებით, „ჭკვიანური ნაბიჯია“ და „ძალიან საღი დამოკიდებულება“, როცა მამუკა ხაზარაძე დამოუკიდებლად, პოლიტიკურ პარტიებზე ორიენტაციის გარეშე აპირებს პარლამენტში შესვლას.
“მართალი გითხრათ, არ მოველოდი, რომ ასეთი ბიბლიურ-მისტიურ-ლირიული წარმოდგენა ჰქონდა – ლელო, საქართველო, პოეზია – მეტს მოველოდი. არ ვიცი, ვნახოთ მომავალში როგორ განავითარებს”, – ამის შესახებ საპარლამენტო უმრავლესობის ლიდერმა გია ვოლსკიმ ჟურნალისტებს „ლელო”-სთან დაკავშირებით განუცხადა.
გია ვოლსკიმ „ქართული ოცნებისა” და ხაზარაძის „ლელოს” სამომავლო თანამშრომლობაზეც ისაუბრა და აღნიშნა, რომ „ხალხი გადაწყვეტს ვინ-ვისთან უნდა ითანამშრომლოს”.
“მამუკა ხაზარაძე პოლიტიკურ ველზე უფრო მარტივად დაიმკვიდრებდა ადგილს, თუკი იმ ვალდებულებებს შეასრულებდა, რა ვალდებულებებიც მას იმ ადგილთან დაკავშირებით აქვს, სადაც პრეზენტაცია გამართა” – ასე გამოეხმაურა ფრაქცია „ქართული ოცნების“ თავმჯდომარე მამუკა მდინაძე „თიბისი ბანკის“ დამფუძნებლის მამუკა ხაზარაძის მიერ ანაკლიაში ახალი საზოგადოებრივი მოძრაობის პრეზენტაციას.
ჟურნალისტებთან საუბრისას მდინარაძემ აქცენტი იმაზე გააკეთა, რომ “ანაკლიის პორტთან დაკავშირებით არსებობს წლების განმავლობაში შეუსრულებელი ვალდებულებები, შემდეგ მიმართვა მთავრობისადმი, ვალდებულებების გადადება და იძულებითი სვლები“.
“მამუკა ხაზარაძე ცდილობს სუფთა ფურცლიდან დაიწყოს, მაგრამ მე ვფიქრობ, მას აუცილებლად სჭირდება პოლიტიკური კომპონენტის გაჩენა, ვინაიდან პოლიტიკა ცნობადობის გარეშე არ არსებობს”, – ასე შეაფასა ექსპერტმა გია ხუხაშლმა – „ლელოს“ პრეზენტაცია.
ხუხაშვილის თქმით, მამუკა ხაზარაძის ნაბიჯები „პოლიტიკურად კარგად გააზრებულია“.
12 ლიდერს ვეძებო – მგონი, მოციქულები ჰგონია. ისე მისი წარსული უფრო “ალიბაბა და 12 ყაჩაღს” ჰგავს, ვიდრე 12 მოციქულს, – ასე აფასებს პარლამენტის დამოუკიდებელი დეპუტატი დავით ჭიჭინაძე მამუკა ხაზარაძის მიერ საზოგადოებრივი მოძრაობის – “ლელოს” დაფუძნებას და განცხადებას, რომ ყველა სფეროში ეძებს 12 ლიდერს.
მისი თქმით, დაგვიანებულ გამოფხიზლებას აქვს ადგილი.
