ზესტაფონის მერიის თანამშრომლების კომპანიამ 2011-20 წლებში ბიუჯეტიდან 454 000 ლარი მიიღო. 43 ტენდერიდან კი მათ 33 უკონკურენტოდ მოიგეს – ამის შესახებ ინფორმაციას მფლანგველი დეტექტორი ავრცელებს. მათვე ცნობით ნოდარ მესხიშვილისა და თეიმურაზ წიწილაშვილის კომპანიამ საგანგებო მდგომარეობის პერიოდშიც 3 ტენდერში უკონკურენტოდ გაიმარჯვა, რისთვისაც ზესტაფონის ბიუჯეტიდან 38,130 ლარი მიიღო; ზოგიერთ შემთხვევაში ამ კომპანიის სამუშაოების შესრულების ინსპექტირება კომპანიის დირექტორის შვილს უნდა განეხორციელებინა.
“შპს “ზესტაფონპროექტი” 2004 წელს შეიქმნა, მისი რეგისტრაციის მისამართია ზესტაფონი, ბიბილაშვილის ქუჩა #6. მის 30-30%-იან წილებს ნოდარი მესხიშვილი და ზაზა მახათაძე ფლობენ, ხოლო 40%-იანი წილის მფლობელი თეიმურაზ წიწილაშვილია. კომპანიის დირექტორი ნოდარი მესხიშვილია.
ამ კომპანიის მფლობელები და მათი ოჯახის წევრები წლებია არიან ზესტაფონის მერიის თანამშრომლები, კერძოდ: თეიმურაზ წიწილაშვილი 2007 წლიდან, ხოლო ნოდარ მესხიშვილის შვილი დავით მესხიშვილი 2013 წლიდან სხვადასხვა თანამდებობას იკავებს მერიაში. ამჟამად ის ზესტაფონის ინფრასტრუქტურის, კეთილმოწყობისა და საზოგადოებრივი მომსახურეობის სამსახურის უფროსია. ხოლო თეიმურაზ წიწილაშვილი ზესტაფონის ინფრასტრუქტურის განყოფილების უფროსია. აღსანიშნავია ისიც რომ 2016 წელს შევსებული დეკლარაციის მიხედვით, თეიმურაზ წიწილაშვილის შვილი – კახაბერ წიწილაშვილი არქიტექტორად მუშაობდა ამ კომპანიაში.
შპს “ზესტაფონპროექტი” 2011 წლიდან იწყებს აქტიურ საქმიანობას და ზესტაფონის მუნიციპალიტეტი მასთან აფორმებს ათიათასაობით ლარის პირდაპირ შესყიდვებს, ხოლო 2013 წლიდან ეს კომპანია ტენდერებშიც აქტიურად მონაწილეობს, სადაც ძირითადად უკონკურენტოდ იმარჯვებს.
გამარტივებული შესყიდვებით 2011-20 წლებში ამ კომპანიას მიღებული აქვს 188,545 ლარი. აქედან 177,603 ლარი ზესტაფონის მუნიციპალიტეტისგან და მის დაქვემდებარაბეში მყოფი სხვადასხვა სამსახურებისგან, მათ შორის ზესტაფონის მუნიციპალიტეტში არსებული საჯარო სკოლებისგან, ხოლო 10,580 ლარი ხარაგაულისა და თერჯოლის მუნიციპალიტეტებისგან მიიღო.
(2011-12 წლებში ზესტაფონიდან მიღებული აქვს 99,638 ლარი, ხოლო 2013-20 წლებში 88,545 ლარი).
2013-20 წლებში ამ კომპანიამ ზესტაფონის მუნიციპალიტეტის გამოცხადებულ 57 ტენდერში მიიღო მონაწილეობა, საიდანაც 43-ში გაიმარჯვა და ჯამში მიღებული აქვს 276,310 ლარი. 43 ტენდერიდან 33-ში უკონკურენტოდ გაიმარჯვა, ხოლო დანარჩენ 10 შემთხვევაში, როდესაც ტენდერში სხვა კომპანიებიც მონაწილეობდნენ, 2 შემთხვევაში მოხდა კონკურენტების დისკვალიფიკაცია და ამის შემდეგ გაიმარჯვა შპს “ზესტაფონპროექტმა”.
(2015, 2016, 2017) გამოცდილება, რომელსაც შპს ზესტაფონპროექტი სრულად აკმაყოფილებდა, ვინაიდან სწორედ 2015 წელს ჰქონდა ზესტაფონის მუნიციპალიტეტთან პირველი ხელშეკრულება დადებული საპროექტო დოკუმენტაციის მოსამზადებლად (გამოცხადებულ ტენდერში გაიმარჯვა).
აღსანიშნავია ის გარემოებაც, რომ ზესტაფონის მერიასა და შპს “ზესტაფონპროექტს” შორის გაფორმებული ხელშეკრულების 8.4 პუნქტის მიხედვით, ხელშეკრულებაზე შესრულების ინსპექტირება უნდა განეხორციელებინა ზესტაფონის მერიის არქიტექტურის, მშენებლობის, ინფრასტრუქტურის, კეთილმოწყობის და საზოგადოებრივი მომსახურეობის სამსახურებს. შესაბამისად, ხელშეკრულების პირობების შესრულებაზე კონტროლი ევალებოდა იმ სამსახურს, რომლის ხელმძღვანელიც დავით მესხიშვილი იყო, ხოლო ამავე სამსახურში დასაქმებული იყო თეიმურაზ წიწილაშვილი.
საგანგებო მდგომარეობის გამოცხადებიდან მის დასრულებამდე ამ კომპანიამ სამ ტენდერში გაიმარჯვა უკონკურენტოდ და ზესტაფონის მუნიციპალიტეტმა მასთან 38,130 ლარის ხელშეკრულებები გააფორმა. საგანგებო მდგომარეობის გამოცხადებამდე რამდენიმე დღით ადრე კი 2020 წლის 19 მარტს (პანდემიის პირობებში), ზესტაფონის მუნიციპალიტეტმა მისგან 13,659 ლარის პირდაპირი შესყიდვა განახორციელა.
წყარო:
bit.ly/2AOXtoC – დავით მესხიშვილი
bit.ly/30qrKF4 – თეიმურაზ წიწილაშვილი
bit.ly/2Yab4yw – შპს ზესტაფონპროექტი (230071953)
bit.ly/2MUX5I1e – სახ. შესყიდვები (230071953)” – წერს მფლანგველი დეტექტორი
