“ჩვენმა ოპონენტებმა გუშინ აღმოაჩინეს სპორტულ სკოლებში არსებული ვითარება, მაგრამ მინდა ვუპასუხო, რომ ეს საკითხი შესწავლის საგანი გახდა, დღიდან ჩვენი ხელისუფლებაში მოსვლისა” – ირაკლი ენგელია “ლელოს” ბრიფინგს პასუხობს, რომელზედაც ანა ნაცვილშვილმა განაცხადა რომ, “მართვეს” სპორტულ ბაზაზე ბავშვებისთვის შეუსაბამო პიროებია.
“მოხარული ვარ, რომ წინასაარჩევნო პერიოდის მოახლოებასთან ერთად პოლიტიკური სპექტრის ინტერესი ქუთაისის მიმართ გაიზარდა, თუმცა სამწუხაროა, რომ ოპოზიციურ პარტიებს ამ ქალაქის მიმართ დამოკიდებულება მხოლოდ წინასაარჩევნოდ პოლიტიკურ ველზე თავის დამკვიდრების მიზნით ახსენდებათ.
მოქალაქეების ინტერესებზე ზრუნვა არჩევნების მოახლოებასთან ერთად გახშირებული ბრიფინგები კი არა, მოქალაქეების ინტერესების სამსახური წლების განმავლობაში არსებულ გამოწვევებზე პასუხი და შესაბამისი ქმედითი ნაბიჯების დაგეგმვის პროცესია.
მართალია, ჩვენმა ოპონენტებმა გუშინ აღმოაჩინეს სპორტულ სკოლებში არსებული ვითარება, მაგრამ მინდა ვუპასუხო, რომ ეს საკითხი შესწავლის საგანი გახდა, დღიდან ჩვენი ხელისუფლებაში მოსვლისა. სპორტული ინფრასტრუქტურის მოწესრიგების ნაწილი კონკრეტული გეგმის სახით არის გაწერილი ბიუჯეტში, რაც, რათქმაუნდა, სრულად ვერ იქნება მოცული ერთი ან ორი წლის ვადებში, თუმცა ეტაპობრივი ძირეული რეაბილიტაციით საშუალება გვექნება, სპორტული სკოლების ინფრასტუქტურა სრულად გარდავქმნათ თანამედროვე სტანდარტებზე.
მაგალითისთვის: 2020 წლის დასწყისში ჩვენ დავაანონსეთ 6 სპორტული სკოლის სრული რეაბილიტაცია, მათგან ოთხ სკოლაში სამუშაოები უკვე დაწყებულია. მიმდინარე წელს გარემონტდება მძლეოსნობის სკოლა – გამოყოფილი თანხა 318,063 ლარი, ფარიკაობის სპორტულ სკოლა – გამოყოფილი თანხა 104,939 ლარი, – თავისუფალი ჭიდაობის დარბაზი – გამოყოფილი თანხა 87,062 ლარი, პუშკინის ქუჩის #7-ში არსებული კრივის დარბაზი – გამოყოფილი თანხა 136,807 ლარი. წელსვე დაიწყება ნიჩბოსნობის და ძიუდოს მე-17 სკოლის რეაბილიტაცია. ეს პროცესი არის შეუქცევადი და ეტაპობრივად მოხდება ყველა სპორტული სკოლის სრული განახლება, რათქმაუნდა, მათ შორისაა საფეხბურთო კლუბი “მართვეც”.
ამასთან, მოსახლეობის სოციალურ-ეკონომიკური მდგომარეობის გათვალისწინებით ჩვენ გავაუქმეთ ის მინიმალური გადასახადი, რაც დაწესებული იყო სპორტული სკოლებისთვის და ამ ეტაპზე მუნიციპალიტეტი სრულად აფინანსებს აღნიშნულ სასწავლებლებს. სწავლის საფასურის გაუქმების შემდეგ სპორტული სკოლების კონტინგენტი 1500 ბავშვით გაიზარდა და დღეს 4 388 -ს შეადგენს. ჩვენი პრიორიტეტი არის აღნიშნულ სკოლებში თანამედროვე სტანდარტების სივრცეების მოწყობა, თუმცა ვიმეორებ, რომ ქალაქში არსებული 43 სპორტული სკოლის ძირეული რეაბილიტაცია დაკავშირებულია ვადებთან, ეს არის დროში, შესაბამისი ბიუჯეტით გაწერილი პროცესი.
რაც შეეხება ჯანსაღი ცხოვრების წესის პოპულარიაციას და ახალგაზრდებისთვის მოსასვნებელი და სპორტული სივრცეების მოწყობას, ყველა ასაკობრივი კატეგორიისთვის, ქალაქის მასშტაბით მიმდინარეობს როგორც რეკრეაციული, ასევე გასართობი და სპორტული სივრცეების მოწყობა. ბოლო რამდენიმე წლის განმავლობაში განახლდა 32 მინი საფეხბურთო სტადიონი, აქედან 2020 წლის ბიუჯეტით გათვალისწინებულია 10 მათგანის რეაბილიტაცია. ამ პროცესის შეუქცევადობა არის ჩვენი გუნდის უმთავრესი ამოცანა და ყოველდღიური საქმიანობის ნაწილი, რასაც ძალიან კარგად ხედავს საზოგადოება და ვფიქრობ, მათი შეფასებაც შესაბამისი იქნება.” – განაცხადა ქუთაისის საკრებულოს თავმჯდომარის მოვალეობის შემსრულებელმა ირაკლი შენგელიამ.
კლუბ ”მართვეს”, ქუთაისის 94-ე საფეხბურთო სპორტ ბაზაზე არსებულ პრობლემებზე “ლელოს” ერთ-ერთმა ლიდერმა ანა ნაცვლიშვილმა გუშინ ბრიფინგზე ისაუბრა და განაცხადა რომ აქ ვარჯიშის დროს ბავშვებმა შეიძლება სერიოზული დაზიანება მიიღონ.
