კორონავირუსით ინფიცირებულთა პირველ ხუთეულში შემავალ პაციენტთან დაავადება მკურნალობას დაემორჩილა და არანაირი სიმპტომი არ აქვს, თუმცა ცხვირ-ხახის ნიმუშზე კვლევისას ვირუსზე ნეგატიური პასუხი ვერ მივიღეთ, – ამის შესახებ „ინტერპრესნიუსს“ ინფექციური საავადმყოფოს სამედიცინო დირექტორმა მარინა ეზუგბაიამ განუცხადა. მისივე ინფორმაციით, ამ პაციენტთან კლინიკური გამოჯანმრთელება, დაახლოებით, მე-20 დღეს დადგა, თუმცა ვირუსზე ტესტირების პასუხი კვლავ სუსტი დადებითია.
ეზუგბაიას ინფორმაციით, უახლოეს დღეებში ეს პაციენტი შესაძლოა, საკარანტინო სივრცეში ან ბინაში თვითიზოლაციაში გადაიყვანონ, რადგან მისი გამოჯანმრთელება სტაბილურია.
„მასთან დაავადება მკურნალობას დაემორჩილა და არანაირი სიმპტომი არ აქვს. მისი კლინიკური გამოჯანმრთელებაც, დაახლოებით, მე-20 დღეზე დადგა, რაც ნიშნას, რომ ტემპერატურა ნორმაში ჰქონდა, არანაირი ჩივილი არ ჰქონდა, რადიოლოგიური მონაცემების დინამიკა გაუმჯობესებული იყო, უბრალოდ, ამ ადამიანთან ვირუსის ელიმინაცია გახანგრძლივდა. ეს ნიშნავს, რომ ცხვირ-ხახის ნიმუშზე კვლევისას ვირუსზე ნეგატიური პასუხი ვერ მივიღეთ. დინამიურად ბოლოსკენ რჩებოდა სუსტი დადებითი. ამიტომ, ეს პაციენტი კლინიკური გამოჯანმრთელების მიუხედავად, კვლავ განაგრძობს ჩვენთან მეთვალყურეობას, კვლევები გრძელდება და არსებული კლინიკური ლაბორატორიული მონაცემებით არსად ცვლილებები არ ვითარდება, მისი გამოჯანმრთელება სტაბილურია, ვირუსის ელიმინაცია გვიანდება. პაციენტის სიტუაციიდან გამომდინარე, შესაძლებელია მისი საკარანტინო სივრცეში გადაყვანა ან ბინაზე სრული იზოლაცია იმიტომ, რომ ინფექციურობის ხარისხი ძალიან დაბალია და ტესტირების დროს ძალიან სუსტი კონცენტრაციით არის ვირუსი. თუ არ ვცდები, ეს პაციენტი 5 მარტს მოთავსდა კლინიკაში. რამდენიმე დღეში მივიღებთ გადაწყვეტილებას, მასთან მიმართებაში როგორ მოვიქცეთ,“ – განაცხადა ეზუგბაიამ.
კითხვაზე, ყველაზე ადრე რამდენ დღეში მოხდა კორონავირუსისგან პაციენტის გამოჯანმრთელება, მარინა ეზუგბაია პასუხობს, რომ ეს დამოკიდებულია იმაზე, როდის მოთავსდა პაციენტი კლინიკაში. მისივე თქმით, თუ პაციენტი სიმპტომების დაწყებიდან მე-10 მე-11 დღეს მოთავსდება საავადმყოფოში, მასთან გამოჯანმრთელება უფრო ადრე დგება და კლინიკიდანაც მალე ეწერება.
ეზუგბაიას თქმით, ინფექციური საავადმყოფოდან ერთ-ერთი პაციენტი მე-4 დღეს გაეწერა. „ამაზე პასუხი ასეთი მარტივი არ არის. ეს დამოკიდებულია იმაზე, პაციენტი როდის შემოვა ჩვენთან. შეიძლება ასეთი ვარიანტი: პაციენტი პირველივე დღესვე მოთავსდება კლინიკაში. ამიტომ დაავადების მიმდინარეობა სულ მცირე 2 კვირას პროგრესირებს. სანამ ეს არ ჩამთავრდება და არ გავა რაღაც პერიოდი, მასთან ანალიზის გაკეთება გვიანდება. მეორე ვატიანტი: პაციენტი შემოდის სიმპტომების დაწყებიდან მე-9, მე-10, მე-11 დღეს. მასთან გამოჯანმრთელება უფრო ადრე დგება იმიტომ, რომ ეს 2 კვირიანი პერიოდი თითქმის გავლილია და მასთან მონიტორინგის, კვლევის ჩატარების საშუალება უფრო ადრე გვეძლევა და შესაბამისად, გამოჯანმრთელებაც შეიძლება უფრო ადრე იყოს. არის კიდევ მესამე, მეოთხე ვარიანტები და ამიტომ გამოჯანმრთელების კონკრეტულ ვადაზე საუბარი რთულია. მე შემიძლია გითხრათ, რომ ერთი პაციენტი კლინიკაში ყოფნის მე-4 დღეს გავწერეთ, რადგან კლინიკის გამოვლენიდან თითქმის მე-14 დღეს შემოვიდა და 4 დღეში გავწერეთ. მახსოვს ასევე პაციენტი, რომელიც მე-7 დღეს გავწერეთ. ამ ბოლო ხანებში კლინიკაში ყოფნის 16 დღეზე ადრე გამოჯანმრთელება არ არის ხოლმე. გამოჯანმრთელებაზე ყველაზე გახანგრძლივებული პერიოდი ჩვენთვის იყო 20 დღეს გადაჭარბებული. ამ პერიოდში ყველასთან დადგა გაჯანმრთელება და ტოვებენ კლინიკას,“ – განაცხადა მარინა ეზუგბაიამ.
