აზერბაიჯანში 63 წლის ქალის ისტორია, რომელმაც პირველად იმშობიარა, სოციალურ ქსელებსა და მედიაში დიდი განხილვის საგანი გახდა.
ექიმ ნატიგ მაჰარამოვის ინფორმაციით, მისი პაციენტი, ჰაგიგატი, დედობაზე ათწლეულების განმავლობაში ოცნებობდა. 40 წელზე მეტი ხნის განმავლობაში არაერთი უშედეგო მცდელობის მიუხედავად, მან საბოლოოდ შეძლო ბავშვის გაჩენა.
ექიმის თქმით, ჩატარებული მკურნალობის შემდეგ ორსულობა წარმატებით განვითარდა. ქალმა ბავშვი ბუნებრივი გზით გააჩინა, რაც მსგავსი ასაკისთვის განსაკუთრებით იშვიათ შემთხვევად მიიჩნევა.
„ღვთის დახმარებით, მრავალწლიანი ლოდინის შემდეგ, ჩვენს 63 წლის პაციენტს ხელში საკუთარი შვილი უჭირავს. მადლობელი ვართ, რომ ამ ბედნიერი ისტორიის ნაწილი გავხდით“, – აღნიშნა ნატიგ მაჰარამოვმა სოციალურ ქსელში.
ჰაგიგატის ისტორიამ ათასობით ადამიანის ემოციური გამოხმაურება გამოიწვია. სოციალური ქსელების მომხმარებლები დედასა და ახალშობილს ჯანმრთელობას უსურვებენ და აღნიშნავენ, რომ ეს ისტორია იმედისა და შეუპოვრობის მაგალითია.
სპეციალისტების განმარტებით, 60 წლის შემდეგ ორსულობა უკიდურესად იშვიათია და მაღალი სამედიცინო რისკებით ხასიათდება. ასეთ შემთხვევებში აუცილებელია ორსულობის განმავლობაში მუდმივი მეთვალყურეობა, რადგან ასაკი ზრდის როგორც დედის, ისე ნაყოფის ჯანმრთელობასთან დაკავშირებულ გართულებათა ალბათობას.
თანამედროვე რეპროდუქციულმა ტექნოლოგიებმა და მედიცინის განვითარებამ ბოლო წლებში მნიშვნელოვნად გაზარდა იმ ქალების შესაძლებლობა, რომლებიც გვიან ასაკში დედობას ცდილობენ. თუმცა, ექიმები ხაზგასმით აღნიშნავენ, რომ თითოეული შემთხვევა ინდივიდუალურია და საჭიროებს პაციენტის ჯანმრთელობის მდგომარეობის საფუძვლიან შეფასებას.
