დღეს ცნობილი გახდა, რომ შინაგან საქმეთა სამინისტროს ცენტრალური კრიმინალური პოლიციის დეპარტამენტისა და საქართველოს გენერალური პროკურატურის თანამშრომლებმა, ამერიკის შეერთებული შტატების სახელმწიფო დეპარტამენტის წარმომადგენლებთან გაფორმებული ერთობლივი დეკლარაციის ფარგლებში, გამოძიების ფედერალურ ბიუროსთან (FBI) ორმხრივი მჭიდრო კოორდინაციის შედეგად, დააკავეს პირი, რომელიც საერთაშორისო ძებნაში იმყოფებოდა სხვადასხვა მძიმე დანაშაულის გამო.
- შსს-ს ცნობით, სამართალდამცველებმა აღნიშნული პირი, ჩატარებული საგამოძიებო მოქმედებების შედეგად თბილისის საერთაშორისო აეროპორტში დააკავეს. იგი ამერიკის შეერთებული შტატების გამოძიების ფედერალური ბიუროს (FBI) მოთხოვნის საფუძველზე იძებნებოდა სხვადასხვა დანაშაულისთვის, მათ შორის: დანაშაულებრივი საქმიანობის ხელშეწყობისა და თანამონაწილეობის, დანაშაულებრივი შეთქმულებისა და ფულის გათეთრების ბრალდებებით.
ინტერპოლის მიერ ძებნილი ქალი, რომელიც თბილისის აეროპორტში დააკავეს, რუსეთის მოქალაქეა. ამის შესახებ მისი უფლებადამცველი ბექა ნემსიწვერაძე “ტვ პირველთან” აცხადებს. მისი თქმით, ძებნილი ქალი საქართველოში ტურისტული მიზნით ჩამოვიდა.
“დაკავებული არის ერთი ადამიანი, რომელიც ინტერპოლის მიერ არის ძებნილი. გახლავთ რუსეთის მოქალაქე. მის მიმართ არსებობს ამერიკაში კითხვები სანქცირებული პროდუქციის იმპორტ-ექსპორტთან დაკავშირებით და აღნიშნულთან დაკავშირებით დაწყებულია გამოძიება. შესაბამისად აშშ-ის მოთხოვნის შესაბამისად იქნა ეს ადამიანი ჩასმული ინტერპოლის მიერ ძებნილთა სიაში. გუშინ ჩამოფრინდა საქართველოში და დაკავებული იქნა თბილისის აეროპორტში. მისთვის ეს მოულოდნელი იყო, რადგან არ იყო ცნობილი ამერიკაში მიმდინარე სისხლის სამართლის საქმის შესახებ და არც იმის შესახებ იყო ცნობილი, რომ ის იყო ძებნილი ინტერპოლის ხაზით. საუბარი არის საავიაციო ნაწილების დეტალების იმპორტ-ექსპორტზე. საქართველოში უბრალოდ ტურისტული მიზნით ჩამოფრინდა და აეროპორტში გაირკვა, რომ თურმე ინტერპოლით იძებნებოდა” – ამბობს ადვოკატი ბექა ნემსიწვერიძე.
ამჟამად, დაკავებულის მიმართ კანონით გათვალისწინებული საექსტრადიციო პროცედურები მიმდინარეობს.
