დღეიდან აბასთუმნის საჰაერო სივრცის გადაკვეთა აიკრძალა. ამის შესახებ „საქართველოს საჰაერო სივრცის სტრუქტურისა და დიზაინის წესის დამტკიცების შესახებ“ მთავრობის 9 თებერვლის დადგენილებაშია საუბარი.
აღნიშნული დოკუმენტით ცვლილებები შევიდა 2018 წლის 28 დეკემბრის დადგენილებაში და ქვეყნის საფრენოსნო არეალი დაკორექტირდა.
ოფიციალური ინფორმაციით, აბასთუმანში ფრენების შეზღუდვის მიზეზი შემდეგია – „ატმოსფეროს გამჭვირვალობის უზრუნველყოფა ასტრონომიული დაკვირვებებისთვის“.
ამასთან, დადგენილებაში აღნიშნულია, რომ აბასთუმნის საჰაერო სივრცის გადაკვეთა აკრძალულია 24/7-ზე, თუმცა მხოლოდ გამონაკლის უწყებებს აქვს მისი დარღვევის უფლება.
კერძოდ, ფრენები არ არის დაშვებული შემდეგი გამონაკლისების გარდა:
საქართველოს სახელმწიფო ავიაციის საჰაერო ხომალდებისათვის;
ძებნა-შველის ოპერაციებში ჩართული საჰაერო ხომალდებისათვის;
შეზღუდული არეს ფარგლებში მომფრენი და გამფრენი საჰაერო ხომალდებისათვის;
ცუდი ამინდის შემოვლის მიზნით, ან თუ წარმოიქმნება ფრენების უსაფრთხოებასთან დაკავშირებული სხვა საჭიროება.
ცნობისთვის, აბასთუმანში საჰაერო სივრცე დროებით 2019 წელსაც დაიკეტა. იმ დროისთვის მაშინდელი ეკონომიკისა და მდგრადი განვითარების მინისტრი ნათია თურნავა განმარტავდა, რომ ეს საერთაშორისო პრაქტიკაა და ამ ნაბიჯით სახელმწიფოს არანაირი ზარალი არ ადგებოდა. მისი თქმით, სახელმწიფოსთვის მნიშვნელოვანია, რომ აბასთუმნის ობსერვატორია, როგორც უნიკალური სამეცნიერო ცენტრი, განვითარდეს.
„აბასთუმნის ობსერვატორია ჩვენი ერთ ერთი უნიკალური და მსოფლიოსთვისაც უნიკალური სამეცნიერო ცენტრია, სადაც 70-ზე მეტი მეცნიერი მოღვაწეობს და 100-ზე მეტი სამეცნიერო ნაშრომი სრულდება. ამ ცენტრის მთავარი მიმზიდველობა, მთელი იდეა, 100 წლის წინ მისი სწორედ აბასთუმანში განთავსების ისაა, რომ იქ არის ერთ ერთი ყველაზე უნიკალური ჰაერი, ატმოსფერო, რაც მაღალი სიზუსტის კვლევების ჩატარების საშუალებას იძლევა. აქედან გამომდინარე, როდესაც მოგვმართა ჩვენ, საჰაერო ადმინისტრაციას, აბასთუმნის ობსერვატორიამ, რომ ყოფილიყო მცირედი კორექტირება ასე ვთქვათ საჰაერო მარშრუტების, დროებითი შეზღუდვის 8 კილომეტრიანი არეალი დაწესებულიყო, თანაც იმგვარად, რომ არც ერთი თეთრი არ იკარგება და არანაირი ზარალი არ ადგება სახელმწიფოს, არც ერთი საერთაშორისო მარშრუტი არ გადის საქართველოს ფრენების არეალიდან, რა საკვირველია, ჩვენ ამას დავუჭირეთ მხარი.
აქ არ არის არანაირად საუბარი საერთაშორისო მარშრუტებზე. ეს არის ჩვეულებრივი საერთაშორისო პრაქტიკა, მათ შორის საქართველოშიც, როდესაც არის გარკვეული გარემოებები, ეს მცირე, დროებითი ზომები დაწესდეს. მაგალითად გეტყვით, იგივე კახეთში, როდესაც სეტყვის საწინააღმდეგო ტექნიკის გამოყენება ხდება, ვაწესებთ ამას. სხვადასხვა ნავთობ-ტერმინალის თავზე წესდება დროდადრო, ასე რომ განსაკუთრებული აქ არაფერია“,- აცხადებდა ნათია თურნავა.
