სურსათის ეროვნული სააგენტოს რეგიონულმა დეპარტამენტებმა სამეგრელოსა და იმერეთში ცხოველთა არალეგალური სასაკლაოები გამოავლინეს.
“სურსათის ეროვნული სააგენტოს სამეგრელოს და იმერეთის დეპარტამენტების უფლებამოსილმა პირებმა ცხოველთა არალეგალური სასაკლაოები გამოავლინეს.
ჩატარებული არაგეგმური ინსპექტირების შედეგად დადგინდა, რომ ფიზიკური პირი ჯ.ს. (მის: აბაშა, გამსახურდიას ქ.N116.) განმეორებით და სააგენტოსაგან მინიჭებული სავალდებულო საქმიანობის აღიარების გარეშე, შემდგომი რეალიზაციის მიზნით, კლავდა მსხვილფეხა პირუტყვს.
არალეგალური საწარმოები გამოვლინდა ასევე თერჯოლასა და ზესტაფონში. ინდმეწარმე გ. ზ. (მის: თერჯოლის რ-ნი, სოფ. ღვანკითი) და ფიზიკური პირი ს.მ. (მის: ზესტაფონი, მეორე სვირი ) სააგენტოსაგან მინიჭებული სავალდებულო აღიარებისა და ვეტერინარული ზედამხედველობის გარეშე კლავდნენ ცხოველებს.
ორივე ობიექტზე გამოვლინდა კრიტიკული შეუსაბამობები; გ.ზ.-ს არალეგალურ სასაკლაოზე, შემდგომი განადგურების მიზნით, დაილუქა ვეტერინარული ზედამხედველობის გარეშე დაკლული 70 კილოგრამზე მეტი გოჭის და მსხვილფეხა საქონლის ხორცი, ხოლო ს.მ.-ს სასაკლაოზე დაილუქა 8 კილოგრამი ბოცვრის ხორცი.
ინდმეწარმე და ფიზიკური პირები დაჯარიმდნენ და შეუსაბამობების გამოსწორებამდე საწარმოო პროცესი შეუჩერდათ, ხოლო სურსათი, კანონმდებლობის შესაბამისად დაილუქა.
ვეტერინარული ზედამხედველობის გარეშე ცხოველის დაკვლა საფრთხეს უქმნის ადამიანის ჯანმრთელობასა და სიცოცხლეს, ზრდის ზოონოზური დაავადებების (ჯილეხი, ბრუცელოზი და სხვა) გავრცელებისა და მოწამვლის რისკებს. სააგენტო აფრთხილებს ფიზიკურ პირებს, არ დაკლან ცხოველი თვითნებურად, კუსტარულად მოწყობილ სასაკლაოზე.” – ნათქვამია სურსათის ეროვნული სააგენტოს მიერ გავრცელებულ ინფორმაციაში.
📰 გააგრძელე კითხვა...
