ტროტუარზე დგომისთვის ლუკა ნაგლიაშვილს, მიხეილ ზაქარეიშვილს, სანდრო მეგრელიშვილს და დიმიტრი ჯამბურიას 4 და 5 დღით პატიმრობა შეეფარდათ.
აქციის მონაწილე ლუკა ნაგლიაშვილს 5-დღიანი ადმინისტრაციული პატიმრობა შეუფარდეს. მას შინაგან საქმეთა სამინისტრო პარლამენტის წინ, ტროტუარზე დგომას და მოქალაქეებისთვის გზის შეფერხებას ედავებოდა. გადაწყვეტილება თბილისის საქალაქო სასამართლოს მოსამართლე, ზვიად ცეკვავამ მიიღო.
როგორც მან პროცესის დაწყებამდე ჟურნალისტებს განუცხადა, პატიმრობის შემთხვევაშიც, აქციაზე ყოფნას მაინც გააგრძელებდა.
„ველოდები, რომ მომისჯიან. ალბათ, მინიმუმ 4 დღეს, როგორც სხვა თანამოქალაქეებს. არ მაქვს არანაირი შიში. თანადგომა სხვა პატიმრებს, ვინც დღეს უკვე დააკავეს. რა თქმა უნდა, ეს არ შემიშლის ხელს. 4-დღიანი ან 15-დღიანი პატიმრობა რომ მომისაჯონ, მაინც გამოვალ და მაინც დავდგები ტროტუარზე. თუ ეს დანაშაულია, მე მაინც ისევ იმ ადგილას ვიდგები. დრაკონული კანონია ესეც იმისთვის, რომ ხალხი დააშინონ და განსხვავებული აზრი ჩაახშონ“, – განაცხადა ლუკა ნაგლიაშვილმა.
მოქალაქეებს სანდრო მეგრელიშვილს და დიმიტრი ჯამბურიას ტროტუარზე დგომის ფაქტზე 4-4 დღიანი ადმინისტრაციული პატიმრობა შეეფარდათ.
გადაწყვეტილება მოსამართლე დავით მაკარაძემ მიიღო.
სანდრო მეგრელიშვილის უფლებადამცველის ირაკლი აბესაძის განმარტებით, გადაწყვეტილება „პაპუაშვილის პარლამენტის სულელური კანონიდან გამომდინარეობს, როცა ცდილობენ ადამიანებს ძალმომრეობით გაუსწორდნენ“.
აბესაძის თქმით, საქმე სტრასბურგის ადამიანის უფლებათა დაცვის სასამართლოში აუცილებლად გასაჩივრდება.
როგორც აბესაძე აცხადებს, არანაირი მტკიცებულება არ არსებობს, გარდა იმისა, რომ ადამიანი ტროტუარზე მშვიდად იდგა.
„კობახიძე-პაპუაშვილის სულელურ კანონს აბსოლუტურად კომიკური განმარტება მოაყოლა მურუსიძე-ჩინჩალაძის კლანის მოსამართლე მაკარიძემ – ანუ თუ თქვენ ტროტუარზე დგახართ, სვამთ ლუდს, მიირთმევთ მზესუმზირას და ჭორაობთ მეზობლის ცხოვრებაზე ან საუბრობთ ივანიშვილის ზებრებზე ან თუნდაც ფეხბურთზე – თქვენ კანონს არ არღვევთ. მაგრამ თუ თქვენ ტროტუარზე დგახართ, გიჭირავთ საქართველოს დროშა და მსჯელობთ ქვეყნის უკეთეს მომავალზე, საქართველოს განვითარების გზებზე – თქვენ უხეში კანონდამრღვევი ხართ და საპატიმროშია თქვენი ადგილი 15 დღემდე ვადით. თუ გაბედეთ და კიდე ერთხელ იმსჯელეთ სამშობლოს ბედზე ტროტუარზე, მაშინ ეს უკვე სისხლის სამართლის დანაშაულია და თქვენ 1 წლამდე პატიმრობა გემუქრებათ.
სანდრო მეგრელიშვილი ამისთვის მზად იყო – აი, ამ რეჟიმის მონა მსახურები რას აპირებენ მომავალში, ეს აღარ ვიცი“, – აცხადებს ირაკლი აბესაძე.
მოსამართლე დავით მაკარიძემ ადმინისტრაციულ სამართალდარღვევათა კოდექსის 174-ე პრიმა მუხლის დარღვევისთვის, ტროტუარზე დგომის გამო დიმიტრი ჯამბურიას 4-დღიანი პატიმრობა შეუფარდა. ჯამბურია სასამართლო სხდომას არ ესწრებოდა.
„სამსახური აქვს და ვერ ცხადდება დღეს, წინა შემთხვევაშიც გათავისუფლება მოუწია“, – თქვა მისმა ადვოკატმა ანა გეწაძემ სხდომაზე.
შინაგან საქმეთა სამინისტრო დიმიტრი ჯამბურიას პარლამენტთან მიმდინარე პროდასავლურ აქციაზე ტროტუარზე ქვეითთა გადაადგილებისთვის დაბრკოლების შექმნას ედავებოდა.
