საფრანგეთის ქალაქ მულუზში შემზარავი ფემიციდის შემთხვევა მოხდა. ქმარმა, საქართველოს მოქალაქე, 33 წლის ყოფილი ცოლი, ლელა ტოროშელიძე სამსახურთან ცივი იარაღით მოკლა. ფრანგული მედია მომხდარს აქტიურად აშუქებს.
შაბათს, 25 ოქტომბერს, დილით, საფრანგეთის ქალაქ მულუზში, (ზემო რეინის დეპარტამენტი) ბარის მიმტანი, ლელა ტოროშელიძე საკუთარ სამსახურთან სასიკვდილოდ დაჭრეს. ახალგაზრდა ქალი წარმოშობით ოზურგეთის მუნიციპალიტეტის სოფელ შემოქმედიდან იყო.
ადგილობრივი პროკურატურის ინფორმაციით, ქალს “რამდენიმე სასიკვდილო ჭრილობა” მიაყენეს, როდესაც ის დაწესებულების გახსნას აპირებდა. ლელა სასწრაფოდ გადაიყვანეს საავადმყოფოში, თუმცა მიღებული დაზიანებებისგან გარდაიცვალა.
ფრანგული მედიის ცნობითვე, ბრალდებული მისი ყოფილი მეუღლეა.
გამოძიების პირველადი მონაცემებით, ლელა ტოროშელიძე 3 წლის განმავლობაში ცხოვრობდა მამაკაცთან, რომელსაც ცოტა ხნის წინ დაშორდა. პროკურორი ნიკოლა ჰაიცი აცხადებს, რომ მთავარი ეჭვმიტანილი სწორედ მისი ყოფილი მეუღლეა, რომელიც შემთხვევის ადგილიდან მიიმალა და ამჟამად პოლიცია ეძებს.
“ეს პიროვნება პოლიციის მიერ აქტიურად იძებნება… ყველაფერი კეთდება იმისთვის, რომ სავარაუდო დამნაშავე სწრაფად დააკავონ და ამ ტრაგედიის დეტალები გაირკვეს”, – განაცხადა პროკურორმა.
ტრაგედიამ შეძრა ლელას ახლობლები და მეგობრები საქართველოში. ერთ-ერთი ახლობელი ემოციურ პოსტს აქვეყნებს სოციალურ ქსელში:
“სიტყვებს ვერ ვალაგებ, რომ გავიგე, ჩემი ბავშვობის ნაწილი აღარ დადის ამ ქვეყანაზე. როგორი მწარე და რთულია, როცა იმას გაიგებ, რომ შენს ცხოვრებაში იყო ისეთი თბილი და ტკბილი გოგო, როგორიც შენ იყავი, ლე. უფალმა ნათელი და ცათა სასუფეველი დაგიმკვიდროს იმიერში. მიყვარხარ და ასე გაგრძელდება მუდამ”.
საფრანგეთის პოლიცია მკვლელობის საქმეზე აქტიურად მუშაობს. ჩვენი ინფორმაციით, სავარაუდო მკვლელი უცხოელია.
