ხარაგაულის სოფლებში მეწყრული პროცესები გრძელდება

ხარაგაულის სოფლებში მეწყრული პროცესები გრძელდება. ვიტარება ყოველდღიურად უფრო რთულდება. ადგილობრივი მარადი გელაშვილი სოციალურ ქსელში ახალ ფოტო-ვიდეო მასალას აქვეყნებს და წერს:

“ე.ი. მაშინ როდესაც თოვლს ბრალდება, ეს ნაპრალი რატომღაც მაინცდამაინც იწყება რკინიგზისთვის აფეთქებული მთის ფერდიდან, ორ სოფელს რკალისებურად უვლის გარშემო და მიდის მდინარისკენ, რაც გზად ხვდება და შუალედში მოექცა ყველაფერს მდინარისკენ ექაჩება. ნაპრალის სიგრძე 2.5 კმ-ია -+ და სიგანე (მდინარემდე მანძილი) დაახლოებით კილომეტრამდე. წითლად მონიშნული მთის ძირში გადის მდინარე. დაახლოებით წარმოგიდგენიათ რა მასშტაბის კატასტროფის წინაშე დგას რაიონი? გარდა უკვე დაზარალებული ორი სოფლისა (ხემაღალი და ღვერკი), ასევე საფრთხის ქვეშაა, უჩამეთი, ლაშე, ლაშის იგორეთი, ლელაძისეული, ძირულა, ვაშპარიანი, ქვედა წევა და შეიძლება შორაპანიც კი. რკინიგზაც და ძირულა-ხარაგაულის საავტომობილო გზის მონაკვეთი. მე კიდევ ერთხელ შეგახსენებთ, მერე არ თქვათ არ ვიცოდით ან ასეც არ გვეგონაო.

– მთავარი ნაპრალი

– მდინარე

– რკინიგზის ლიანდაგი

ხარაგაულის მუნიციპალიტეტის ორ სოფელში – ხემაღალსა და ღვერკში ერთი თვის წინ დაძრული მეწყერი დღითიდღე ძლიერდება.

ამ დროისათვის მეწყერულ ზონაში 50 ოჯახი გეოლოგიური მონიტორინგის ქვეშ იმყოფება, 30-მა ოჯახმა კი, საცხოვრებელი სახლები დატოვა.

ხემაღალში მცხოვრები ოთარ კვინიკაძე ამბობს, რომ ,დამეწყრილ ადგილებში ბზარები ყოველდღე მატულობს, მიწა იშლება და მასა მდინარე ყარნებასკენ იწევს.

შესაძლოა, მეწყერმა მდინარე ყარნება დააგუბოს და სანაპირო ზოლში მცხოვრები სოფელ ლაშის მოსახლეობა დააზარალოს. მეწყერის ჩამოწოლის შემთხვევაში საფრთხე ემუქრება რკინიგზასაც”.

მეწყერისგან დაზარალებული მოქალაქეები ეკომიგრანტების სააგენტოდან სახლის შესაძენი თანხის დროულად გამოყოფას მოითხოვენ. იაინი ამბობენ, რომ ამ მიზნით განსაზღვრული 30 000 ლარი მცირეა და ამ თანხით ახალი სახლის შეძენას ვერ შეძლებენ.