ქვეყანა ასეც და ისეც განაგრძობს განვითარებას, მაგრამ იმისთვის, რომ შეუფერხებელი იყოს განვითარების პროცესი, „ნაცმოძრაობის“ გასამართლება არის აუცილებელი. არ შეიძლება, მუდმივი მუხრუჭის პირობებში და მუდმივი რისკის ქვეშ ცხოვრობდეს ქვეყანა, – განაცხადა საქართველოს პრემიერ-მინისტრმა ირაკლი კობახიძემ ჟურნალისტებთან საუბრისას.
მისი თქმით, ქვეყანას განვითარების პრობლემა ექმნება, როდესაც ჰყავს არაჯანსაღი ოპოზიცია.
„პირველ რიგში „ნაცმოძრაობის“ გასამართლება სჭირდება ჩვენი ქვეყნის ნათელ, ევროპულ მომავალს. სწორედ მომავლისთვის არის აუცილებელი „ნაცმოძრაობის“ გასამართლება. რა თქმა უნდა, ქვეყანა ვითარდებოდა ამის გარეშეც, მთელი 12 წლის განმავლობაში და ჩვენ ვისაუბრეთ მათ შორის მცხეთაში, ჩვენს საარჩევნო შეკრებაზე იმ მიღწევებზე, რომელიც აქვს ჩვენს ქვეყანას. მაგალითად 28 მილიარდი იყო ჩვენი ქვეყნის ეკონომიკა, როცა ნაცმოძრაობამ დატოვა ხელისუფლება და დღეს უკვე არის მიღწეული თითქმის 90 მილიარდს. ეს არის ერთ-ერთი ფუნდამენტური მიღწევა. სამჯერ გაიზარდა სახელმწიფო ბიუჯეტი, შემოღებული იქნა საყოველთაო ჯანდაცვის პროგრამა, რამდენჯერმე გაიზარდა სოციალური პაკეტის მოცულობა და ა.შ. აღარ ჩამოვთვლი მთელს ამ მიღწევებს.
რა თქმა უნდა, გარკვეული დაბრკოლება ყოველთვის ექმნება ქვეყანას, განვითარების პრობლემა, როდესაც გყავს არაჯანსაღი ოპოზიცია, რომელიც მუდმივად გესაუბრება ხან რიგგარეშე არჩევნებზე, ხან რევოლუციაზე, ქვეყნის არევაზე და ა.შ. ეს არის სერიოზული პრობლემა. და მეორე, ზოგადად არის მნიშვნელოვანი ის, რომ სტაბილურობა გქონდეს დემოკრატიულ სისტემაში. თუ შენს ქვეყანაში ოპოზიციას წარმოადგენს უცხოური აგენტურა, რომელიც მუდმივად არის მომართული ომისკენ, ქვეყნის არევისკენ, რა თქმა უნდა რისკები მუდმივად იარსებებს. აქედან გამომდინარე სწორედ მომავლისთვის არის აუცილებელი, რომ გასამართლდეს „ნაცმოძრაობა“. რა თქმა უნდა, ქვეყანა ასეც და ისეც განაგრძობს განვითარებას მაგრამ იმისთვის, რომ შეუფერხებელი იყოს განვითარების პროცესი „ნაცმოძრაობის“ გასამართლება არის აუცილებელი. არ შეიძლება მუდმივი მუხრუჭის პირობებში და მუდმივი რისკის ქვეშ ცხოვრობდეს ქვეყანა, ეს პოლიტიკური ძალა უნდა გასამართლდეს სწორედ იმისთვის, რომ ქვეყანას ჰქონდეს ნათელი მომავალი“, – განაცხადა ირაკლი კობახიძემ.
