საქართველოს ეროვნული საფეხბურთო ნაკრები ევროპის ჩემპიონატის მერვედფინალური ეტაპის მატჩს ესპანეთის ნაკრების წინააღმდეგ დღეს გამართავს.
საქართველო – ესპანეთის დაპირისპირება კიოლნში თბილისის დროით 23:00 საათზე შედგება.
30 ივნისს, ევროპის ჩემპიონატზე, მერვედფინალურ მატჩში საქართველოს ეროვნული საფეხბურთო ნაკრების და ასევე, სხვა ქვეყნების გუნდების თამაშების პირდაპირი ტრანსლირება ქუთაისში, 100 საფეხურიანი კიბის მიმდებარე ტერიტორიაზე მოეწყობა.
18 : 00 საათიდან დაუკრავს DJ და ჯგუფი „ოჩოს ქოხი“, მოეწყობა სპორტული აქტივობები, ადგილობრივი ბიზნესის წარმომადგენლები კი, გამაგრილებელ სასმელებს შესთავაზებენ გულშემატკივრებს.
ევროპის ჩემპიონატზე პირველი მატჩი საქართველოს ნაკრებმა 18 ივნისს, თურქეთთან გამართა და 1:3 დამარცხდა, ხოლო 22 ივნისს ჩეხეთის ნაკრებთან შეხვედრა ფრედ, 1:1 დაასრულა და ევროპის ჩემპიონატზე პირველი ქულა მოიპოვა. 26 ივნისს კი საქართველოს ნაკრებმა ჯგუფური ეტაპის მესამე მატჩში პორტუგალია 2:0 დაამარცხა და თავის პირველ ევროპის ჩემპიონატზე პლეი-ოფში გავიდა.
ერთად ვუგულშემატკივროთ ჩვენი ქვეყნის ეროვნულ ნაკრებს!
