,,გაუქმდეს უკანონოდ, მოსახლეობისგან მალულად და შესაძლო კორუფციული სქემით გაცემული ბალდის კანიონის იჯარის ხელშეკრულება და სამშენებლო ნებართვა.
გათავისუფლდეს უსამართლოდ დაკავებული ინდიკო ბჟალავა!” – ამ მოთხოვნებით მარტვილში, მერიის წინ, ბალდის კანიონის მცველებისა და მათი მხარდამჭერების აქცია მიმდინარეობს.
მოქალაქეები ბალდის კანიონის დასაცავად აქციაზე საქართველოს სხვადასხვა კუთხიდან ჩამოვიდნენ. ისინი სოლიდარობას უცხადებენ ბრალდებებს და აცხადებენ რომ ბუნება ეკუთვნის ხალხს.
,,თავიდან ჩვენი სოფლის, ბალდის გულის – ხელშეუხებელი კანიონის მალულად გაყიდვას ვეწინააღმდეგებოდით. დღეს გვიწევს ბრძოლა თანამებრძოლთა სიცოცხლისა და თავისუფლებისთვის. განვლილი გზა გრძელია:
ჩვენ ჩამოგვართვეს უფლება, მონაწილეობა მიგვეღო ჩვენივე სოფლის ბედის გადაწყვეტაში. ბალდის კანიონის ჩვენგან მალულად, 40 წლით გასხვისების გამო სასამართლოს მივმართეთ. ერთი წლის განმავლობაში განხილვა არ ჩანიშნულა. თითქოს სასამართლო ჩვენთვის არც არსებობს.
მოგვიწია, ჩვენვე გამოგვეძიებინა ყველა უკანონობა და როცა პოლიციას მათზე რეაგირება ვთხოვეთ, პასუხად მივიღეთ კანონზე მაღლა დაყენებული ინვესტორის ინტერესები. თითქოს პოლიცია ჩვენთვის არც არსებობს.
ვითმენთ ინვესტორის წარმომადგენლებს, რომლებიც ხან სოფლის გზას პოლიციის თვალწინ კეტავენ, ხან ჩვენს ოჯახებს საჯაროდ აგინებენ, ხან ლამის სუნთქვის გამოც კი გვიჩივიან და ხან ჩვენი სოფლის ბავშვებს თვალების ამოჩიჩქვნით ემუქრებიან.
ჩვენმა მოძრაობამ და დამოუკიდებელმა ჟურნალისტებმა, აღმოვაჩინეთ კორუფციული სქემა, რომელიც ბალდის და სხვა ბუნების ძეგლების მიტაცებას ეხება და იმდენად ცხადია, გამოსაძიებელიც კი არაფერი დარჩა. თუმცა ყველა უწყება დუმს.
მიუხედავად ამდენი თმენისა და მშვიდობიანი პროტესტისგან არცერთი გადაცდენისა, ბოლოს ინვესტორი კომპანიისგან მივიღეთ საპროტესტო კარავზე შეიარაღებული თავდასხმა, ერთი თანამებრძოლის დაჩეხვა და მეორე უდანაშაულო თანამებრძოლის – დაკავება.
მომხდარ უკანონობასა და ძალადობაზე მთავარმა პასუხისმგებელმა, გარემოს დაცვის სამინისტრომ, სიკვდილს სასწაულებრივად გადარჩენილ ხალხს “დესტრუქციული ძალა” გვიწოდა და უარი გვითხრა საჯარო შეხვედრაზე.
მოვითხოვთ გაუქმდეს უკანონოდ, მოსახლეობისგან მალულად და შესაძლო კორუფციული სქემით გაცემული ბალდის კანიონის იჯარის ხელშეკრულება და სამშენებლო ნებართვა. გათავისუფლდეს უსამართლოდ დაკავებული ინდიკო ბჟალავა!” – აცხადებენ აქციის ორგანიზატორები.
ცნობისთვის, სახელმწიფომ ბალდის კანიონი 40 წლით იჯარით გადასცა კომპანიას ,,კანიონი350″, რომელიც ადგილზე ტურისტული ატრაქციონი მოწყობას გეგმავს. ადგილობრივები ბუნებაში ჩარევასა და მის დაბეტონებას თითქმის ერთი წელია აპროტესტებენ. ადგილობრივების წინააღმდეგობის გამო კანონზე მშენებლობა შეჩერებულია. როგორც ადგილობრივები ამბობენ, კომპანიას სოფლის მოსახლეობის დაპირისპირებას ცდილობს.
11 ივნისს, ბალდაში ,,კანიონი 350″-ის თანამშრომელმა და მისმა ძმამ, ძმები ბჟალავები დაჭრეს, კარავში შეკრებილ 20-მდე ადამიანს, მათ შორის ქალებსა და ბავშვებს იარაღით ემუქრებოდნენ.
შსს-მ გელა და გიგა ხურცილავები დააკავა, თუმცა ასევე დააკავეს კანიონზე მშენებლობის მოწინააღმდეგე ინდიკო ბჟალავა.
შსს-ს ცნობით, გამოძიებით დადგინდა, რომ 11ივნისს, ბრალდებული მარტვილის მუნიციპალიტეტში მცხოვრებ 41 წლის სოფო შავყულაშვილს, რომელიც ,,კანიონი 350″-ზე დასაქმებული გელა ხურცილავას მეუღლეა კონფლიქტის ნიადაგზე სიცოცხლის მოსპობით დაემუქრა.
31 წლის ინდიკო ბჟალავას დაკავება მოულოდნელი აღმოჩნდა ოჯახის წევრებისთვის და მეგობრებისთვის. კანიონზე მშენებლობის მოწინააღმდეგეთა მიერ გავრცელებული განცხადების თანახმად, ინდიკო ბჟალავას სიცოცხლის მოსპობის მუქარას აბრალებს სამშენებლო სამუშაოების ჩატარების მომხრე თანასოფლელი ქალი.
