ბერძნული სანაპირო დაცვა ბოლო სამი წლის განმავლობაში, ხმელთაშუა ზღვაში ათობით მიგრანტის სიკვდილის მიზეზი გახდა – ამის შესახებ მოწმეები BBC-სთან საუბრობენ.
BBC-ის გამოძიების თანახმად, 9 ადამიანი წყალში განზრახ გადააგდეს. ისინი იმ 40-ზე მეტ შემთხვევას მიეკუთვნებიან, როცა ადამიანები ბერძნული ტერიტორიული წყლებიდან გაძევების ან ბერძნულ კუნძულებზე შესვლის შემდეგ ზღვაში უკან დაბრუნების შედეგად დაიღუპნენ.
ბერძნულმა სანაპირო დაცვამ BBC-ს განუცხადა, რომ უკანონო საქმიანობის შესახებ ყველა ბრალდებას კატეგორიულად უარყოფს.
ბერძნულ მთავრობას დიდი ხანია, იძულებითი სახის ქმედებაში ადანაშაულებენ, მაგრამ ეს პირველი შემთხვევაა, როდესაც BBC-მ გამოთვალა იმ ინციდენტების რაოდენობა, რომლებშიც ბერძნულ სანაპირო დაცვას მიუძღვის ბრალი. 15 ინციდენტი, რომელთა ანალიზიც BBC-მ გააკეთა, 2020 წლის მაისიდან 2023 წლამდე პერიოდით თარიღდება – შედეგად კი, 43 ადამიანი დაიღუპა.
BBC-ის სტატიაში ვკითხულობთ, რომ პირველწყარო ძირითადად ადგილობრივი მედია, არასამთავრობო ორგანიზაციები და თურქეთის სანაპირო დაცვა იყო.
ასეთი შემთხვევების ვერიფიცირება ძალიან რთულია – მოწმეები ხშირად ქრებიან ან წინა პლანზე გამოსვლის ეშინიათ. მაგრამ ამ შემთხვევებიდან ოთხზე – ინფორმაცია BBC-მ პირდაპირ მოწმეებთან საუბრით მოიპოვა.
კვლევამ, რომელიც ახალ BBC დოკუმენტურ ფილმშია ასახული, ბევრი რამ ცხადი გახადა. 5 შემთხვევაში, მიგრანტები აცხადებდნენ, რომ ბერძნულმა ოფიციალურმა პირებმა ისინი პირდაპირ ზღვაში ჩაყარეს. რამდენიმე სხვა შემთხვევაში კი მიგრანტები აცხადებდნენ, რომ ისინი ტივებში ჩასხეს, რომელთაც ძრავა არ ჰქონდათ, შემდეგ კი ეს ტივები დაიშალა ან გაიხვრიტა.
