ერთ-ერთი ყველაზე მონახულებადი ტურისტული ადგილი ოკაცეს კანიონი თებერვლის შემდეგ დახურულია. ადგილობრივები, რომლებიც ტურიზმით არიან დაკავებული, შექმნილ პრობლემებზე საუბრობენ.
“მეგა ტვ”-მა დაცული ტერიტორიების სააგენტოს მიმართა თუ რა სამუშაოები ტარდება ტურისტულ ლოკაციაზე და როდის შეიძლება გაიხსნას ადგილობრივებისთვის სასიცოცხლოდ მნიშვნელოვანი ოკაცეს კანიონი. წერილში კანიონის გახსნის თარიღი დაკონკრეტებული არ არის.
“ოკაცეს კანიონზე განახლება-რეაბილიტაციის პროექტი ძირითადად მოიცავს ვიზიტორთა ცენტრიდან გამშვებ პუნქტამდე მიმავალ 2,5 კილომეტრიან საფეხმავლო ბილიკზე არსებული 11 ხიდის რეაბილიტაცია-აღდგენის სამუშაოებს, ასევე, კანიონის 1 000 მეტრზე მეტი სიგრძის კიდული ბილიკის ძველი საღებავისგან გასუფთავებას, კონსტრუქციის დეტალების განახლებას და ხელახლა შეღებვას.
აღნიშნული ტურისტული ინფრასტრუქტურის განახლება-რეაბილიტაციის სამუშაოები აქტიურ ფაზაში მარტის თვის დასაწყისიდან შევიდა. მანამდე არსებული მკაცრი კლიმატური პირობები, კანიონის ძირითად ნაწილზე სამუშაოების განხორციელების შესაძლებლობას არ იძლეოდა, სპეციფიკიდან და სირთულიდან გამომდინარე.
სამუშაოების დასრულება დაგეგმილი იყო მაისის თვის პირველ ნახევარში, თუმცა მარტის თვიდან მიმდინარე პერიოდამდე რეგიონში მოსული უხვი ნალექის გათვალისწინებით დასრულების ვადამ გადაიწია. დღეისათვის სამუშაოების უდიდესი ნაწილი შესრულებულია და შესაბამისი კლიმატური პირობების შემთხვევაში დასრულდება უახლოეს პერიოდში. ოკაცეს კანიონის გახსნის შემდეგ, ტარიფი უცვლელი დარჩება და კანიონი ჩვეულ რეჟიმში განაახლებს ვიზიტორთა მიღებას.” – ნათქვამია დაცული ტერიტორიების მიერ “მეგა ტვ”-სთვის მოწოდებულ ინფორმაციაშია.
ხონის მუნიციპალიტეტის მერი ლადო ჯურხაძე “მეგა ტვ”-თან საუბრირსას აღიშნავდა, რომ ოკაცეს კანიონი მაისის ბოლოს გაიხსენობდა, თუმცა ყველაზე მონახულებადი ტურისტული ლოკაციის გახსნის თარიღი, უკვე აქტიურ სეზონზეც, როცა კალენდარი 10 ივნისს აჩვენებს, უცნობია.
ცნობისთვის, 2023 წელს ოკაცეს კანიონს 84 276 ვიზიტორი ესტუმრა.
რაც შეეხება 2023 წელს ეკოტურისტული სერვისებიდან მიღებულ შემოსავლებს, 10 447 166 ლარი შეადგინა, აქედან 42% მარტვილისა და ოკაცეს ბუნების ძეგლებზე მოდის.
