9 წელიწადში საქართველოში „კერძო მევახშეებთან“ 24 785 კაბალური ხელშეკრულება გაფორმდა – ამის შესახებ ინფორმაციას ნოტარიუსთა პალატა ავრცელებს.
კერძოდ, საუბარია ნასყიდობა/გამოსყიდვის ხელშეკრულებაზე, რომელსაც კერძო მევახშეები უფორმებენ მოქალაქეებს სესხების სანაცვლოდ. იურისტები და ექსპერტები აცხადებენ, რომ ამ ხელშეკრულებით მსესხებელი ავტომატურად უფორმებს ქონებას გამსესხებელს.
ცნობისთვის, 2018 წლიდან კერძო გამსესხებლებს საკმაოდ მკაცრი რეგულაციები დაუწესდათ, თუმცა, გამოსავალს მიაგნეს და იპოთეკის ნაცვლად ნასყიდობა/გამოსყიდვის ხელშეკრულებების გაფორმება დაიწყეს.
ხოლო „კერძო მევახშეების“ რეგულირების დაწყების შემდეგ, 2018 წლის 1-ლი სექტემბრიდან 2024 წლის პირველ იანვრამდე პერიოდში – 22 903 გამოსყიდვის უფლებით უძრავი ნივთის ნასყიდობის ხელშეკრულება არის გაფორმებული.
შეგახსენებთ, რომ გასული თვის მიწურულს მედიაში გააქტიურდა აღსრულების ეროვნული ბიუროს მიერ საცხოვრებელი სახლიდან ოჯახების იძულებით გამოსახლების ფაქტები. როგორც ცნობილია, აღნიშნული კერძო გამსესხებლების მიმართ შეუსრულებელ ვალდებულებებთან არის დაკავშირებული.
იურისტები თუ საკითხის სპეციალისტები აღნიშნული საკითხის რეგულირების კუთხით არსებულ ხარვეზებზე საუბრობენ. კერძოდ, იურისტები ხაზს უსვამენ იმას, რომ იპოთეკის ხელშეკრულების ნაცვლად კერძო გამსესხებლები თანხის გასესხების სანაცვლოდ მოქალაქეს უფორმებენ ნასყიდობა-გამოსყიდვის უფლებით ხელშეკრულებებს, რაც ფაქტობრივად, იმას ნიშნავს, რომ „მსესხებელი ავტომატურად უფორმებს უძრავ ქონებას გამსესხებელს“.
ამასთან, იურისტების ნაწილი აცხადებს, რომ ასეთი კაბალური ხელშეკრულებების შესახებ დავები ამ დროისათვის ძირითადად ჯერ სასამართლოებშია და წინ არის მათი აღსრულების დრო და გამოსახლებები.
