საკონსტიტუციო სასამართლოს მოსამართლე ვასილ როინიშვილისთვის ბათუმში ბინის დაქირავებაზე ბიუჯეტიდან 43 240 ლარი დაიხარჯა, თუმცა მას ზღვისპირა ქალაქში უკვე სამი წელია საკუთარი სახლი აქვს.
“ბათუმელების” ინფორმაციით, მთლიანობაში, საკონსტიტუციო სასამართლოს 8 მოსამართლის ბინით უზრუნველყოფაზე ბიუჯეტიდან 338 990 ლარი დაიხარჯა – ეს სამი წლის თანხაა. მათგან ყველაზე ბევრი – 50 ათას 750 ლარი, ანუ თვეში 1 450 ლარი სასამართლოს თავმჯდომარის, მერაბ ტურავას ბინის ქირაზეა დახარჯული.
საკონსტიტუციო სასამართლოს მიერ მოწოდებული ინფორმაციის თანახმად, ბოლო სამი წლის განმავლობაში არც ერთი თეთრი არ არის დახარჯული მოსამართლე ხვიჩა კიკილაშვილის ბინით უზრუნველყოფაზე [საკონსტიტუციოს სულ 9 მოსამართლე ჰყავს]. დოკუმენტის თანახმად, ეს იმიტომ, რომ ხვიჩა კიკილაშვილი ბათუმში საკუთარ ბინას ფლობს. „გააჩნია საკუთარი საცხოვრისი და არ საჭიროებს დამატებით უზრუნველყოფას“, – წერია დოკუმენტში.
ამავე დოკუმენტის თანახმად, 2021 წლიდან დღემდე სოლიდური თანხა, კონკრეტულად კი 43 ათას 240 ლარი დახარჯულა ვასილ როინიშვილის ბინის ქირაზე ბოლო სამი წლის განმავლობაში. ვასილ როინიშვილი საკონსტიტუციო სასამართლოს თავმჯდომარის მოადგილეა.
საკონსტიტუციო სასამართლოს მიერ „ბათუმელებისთვის“ მოწოდებულ დოკუმენტში არაფერია ნათქვამი იმის შესახებ, თუ რატომ დაიხარჯა ვასილ როინიშვილისთვის ბინის ქირაობაზე სოლიდური თანხა.
ვასილ როინიშვილი საკონსტიტუციო სასამართლოდან რამდენიმე კვარტალში, კონკრეტულად კი ბათუმში, ექვთიმე თაყაიშვილის ქუჩაზე, 100 კვადრატულ მეტრ ბინას ფლობს.
2023 წელს შევსებული დეკლარაციის თანახმად, ამ მოსამართლეს საბანკო ანგარიშებზე ნახევარი მილიონი ლარის დანაზოგიც აქვს. შესაბამისად, გაუგებარია, რატომ დაიხარჯა ბიუჯეტიდან მისთვის ბინის დაქირავებაზე 43 ათას 240 ლარი, ანუ თვეში 1 200 ლარი.
ვასილ როინიშვილის ხელფასი თვეში 12 819 ლარია.
რაც შეეხება დანარჩენ მოსამართლეებს, მათივე ქონებრივი დეკლარაციების მიხედვით თუ ვიმსჯელებთ, არც ერთ მათგანს და არც მათი ოჯახის წევრებს ბათუმში ბინა არ აქვთ.
„ბათუმელებმა“ მოსამართლეების საცხოვრებელთან დაკავშირებული ხარჯები საკონსტიტუციო სასამართლოდან 2023 წლის 27 ოქტომბერს გამოითხოვა. გამოცემა წერს, რომ სასამართლომ, რომელიც კონსტიტუციის დაცვის გარანტია, საჯარო ინფორმაცია არასრულად მიაწოდა და ფინანსებთან დაკავშირებული მონაცემები დამალა, რის გამოც, “ბათუმელებმა” 11 დეკემბერს საკონსტიტუციოში ადმინისტრაციული საჩივარი გააგზავნა, საჯარო ინფორმაციის სრულად გაცემის მოთხოვნით.
მხოლოდ ადმინისტრაციული საჩივრის მომზადების შემდეგ, 19 დეკემბერს, საკონსტიტუციო სასამართლომ მოთხოვნილი საჯარო ინფორმაცია გამოცემას გადასცა.
