“საქართველო რომ რეალურად და სამწუხაროდ, კვლავ რუსეთის მიერ წარმოებულ ომშია და მოჩვენებითი და ფასადური მშვიდობა გაცხადებულ საომარ მდგომარეობაზე რომ გაცილებით საშიში და საზარელია, დღევანდელმა ტრაგედიამაც დაადასტურა”, – წერს სოციალურ ქსელში ისტორიის დოქტორი ლაშა დეისაძე-შარვაშიძე და რუსეთის საოკუპაციო ძალების მიერ საქართველოს მოქალაქის მკვლელობის ფაქტს ეხმაურება.
“უპირველეს ყოვლისა, ვუსამძიმრებ ჩვენი მოკლული თანამოქალაქის ოჯახსა და სრულიად საქართველოს!
ეს არ არის ერთჯერადი გასროლა ერთი ქართველის წინააღმდეგ – ეს არის რუსეთის მიერ 1783 წლიდან დღემდე საქართველოს წინააღმდეგ მიმდინარე ომისა და სისხლიანი აგრესიის მორიგი გამოვლინება, რომელიც სამწუხაროდ, თითქმის 2 საუკუნენახევარია გრძელდება რუსეთის მხრიდან ჩვენი ქვეყნის წინააღმდეგ.
რუსეთზე უფრო ვერაგი და მოუშორებელი მტერი საქართველოს არ ჰყოლია თავისი მრავალათასწლოვანი არსებობის მანძილზე!
არც ის დაიჯეროთ, რომ რუსი ხალხი თითქოს სხვა არის და რუსეთის ხელისუფლება – სხვა, არამედ ეს არის ერთი მთლიანი საოკუპაციო სისხლიანი ძალა საქართველოს წინააღმდეგ! რუსი ოკუპანტი მკვლელი, რომელმაც დღეს მოკლა ჩვენი თანამემამულე, ერთი მხრივ არის რუსეთის სახელმწიფოს საერთო სახე და მეორე მხრივ ის არის რუსულ ოჯახში დაბადებულ-გაზრდილი რუსი მოქალაქე და რუსი ხალხის წარმომადგენელი!
რუსეთს არ აინტერესებს და მასთან არ ჭრის არცერთი ტიპის მაამებლური ქმედება – რუსეთი ყოველთვის და ერთმნიშვნელოვნად არის მკვლელი და სისხლიანი ოკუპანტი ნებისმიერ ვითარებაში და ეს დღევანდელმა ტრაგედიამაც ცხად-ჰყო!
ჩვენი თანამემამულე, ღირსეული ქართველი, აწ უკვე ნეტარხსენებული თამაზ გინტური, რომელიც დღეს ოკუპანტმა რუსეთმა მოკლა, 2008 წლის რუსეთ-საქართველოს ომის მონაწილე იყო და 2008 წელს დაწყებული თავისი გმირობა მან დღეს დაამტკიცა თავისი აღსასრულით, შეუერთდა ცათა სასუფეველში მოზეიმე ჩვენი გმირების მრავალათასოვან დასს და მჯერა ზესთასოფლიდან შეეწევა თავის სამშობლოს, რომელსაც ამქვეყნად ყველაზე ძვირფასი – სიცოცხლე შესწირა!
ვიკითხოთ და ვიფიქროთ ჩვენ, საქართველოს ამქვეყნად დარჩენილმა მოქალაქეებმა, როგორ ვუშველოთ ჩვენს სამშობლოს, რომ დეოკუპაცია ჯერ ჩვენი ზოგიერთი თანამემამულეების ცნობიერებაში უნდა განხორციელდეს, რადგან ძალა ერთობაშია და ამის შემდგომ ფიზიკურადაც იქნება რეალური შესაძლებლობა, რომ ერთხელ და სამუდამოდ საქართველო ვიხსნათ მკვლელი რუსეთის სისხლიანი კლანჭებისგან! სწორედ ეს იქნება ჩვენი სახელოვანი გმირების ღირსეული პატივგებაც და ჩვენი სამშობლოს ღირსეული მომავლისაკენ აღებული გეზი!”, – წერს ისტორიის დოქტორი ლაშა დეისაძე-შარვაშიძე.
შეგახსენებთ, რომ 2023 წლის 6 ნოემბერს, სოფელ კირბალის მიმდებარედ რუსეთის საოკუპაციო ძალების მიერ მოკლულია საქართველოს მოქალაქე თამაზ გინტური და გატაცებულია საქართველოს კიდევ ერთი მოქალაქე ლევან დოთიაშვილი.
