“ქუთაისის ცენტრალურ ბულვარში არანაირი ატრაქციის, მოედნის ან რაიმე სხვა გასართობი საშუალების მოწყობა არ იგეგმება – აცხადებს ქუთაისის მერიის სტრატეგიული კომუნიკაციების განყოფილების ხელმძღვანელი თეონა გიორგაძე და ეხმაურება გავრცელებულ ინფორმაციას იმის შესახებ რომ, ქალაქის ცენტრალუ ბულვარში რამდენიმე სტადიონის მოწყობა იგეგმება:
“ქუთაისის ცენტრალური ბულვარი არის კულტურული მემკვიდრეობის ნუსხაში და იქ დაუშვებელია რაიმე სახის ნაგებობის განთავსება.
რაც შეეხება დოკუმენტაციას, რომელშიც გაწერილია მოედნების, ატრაქციონების მოწყობა, ეს არის პრეისკურანტის ნაწილი, ქალაქში დაგეგმილი სარეაბილიტაციო სამუშაოების მთლიანი ჩამონათვალი, რომელიც არის ე.წ ” დიზაინ ბილდის” შემადგენელი ნაწილი და ეს არ ეხება ცენტრალურ ბულვარს. ამიტომ , ყველა გამოკითხვა თუ განცხადება – ემხრობა თუ არა მოსახლეობა ბულვარში რაიმე სახის გასართობი ატრაქციის მოწყობას – არის არასწორი და მიზნად აქვს მოსახლეობის შეცდომაში შეყვანა, განზრახ ან დაუკვირვებლობით.” – აცხადებს ქუთაისის მერიის სტრატეგიული კომუნიკაციების განყოფილების ხელმძღვანელი თეონა გიორგაძე.
ცნობისთვის, 28 ოქტომბერს კაფე-ბარ “სავანეს” მეპატრონეებმა ადვოკატებთან ერთად გამართეს ბრიფინგი, სადაც ჟურნალისტებს მერიის მიერ სასამართლოზე წარდგენილი დოკუმენტაცია წარუდგინეს, რის საფუძველზედაც “სავანეს” შენობა უნდა დაინგრეს და მის ადგილას 4 განყოფილებიანი ფანჩატური უნდა მოეწყოს. “სავანეს” ადვოკატების თქმით მერიის მიერ წარმოდგენილ ხარჯთააღრიცხვის დოკუმენტში ისეთი შენობების დემონტაჟია მითითებული, რომლებიც ბაღში არ არის. როგორც ადვოკატი ნინო მეფარიშვილი ამბობს, დოკუმენტის მიხედვით ქალაქის ცენტრალურ ბულვარში სტადიონები, გასახდელი და გასართობი ატრაქციები უნდა მოეწყოს. მისივე თქმით აქ, უკვე მხოლოდ კაფე-ბარ “სავანის” ბედი არ წყდება, აქ საუბარია ქალაქის ცენტრალური, ისტორიული ბულვარის გადარჩენაზე.
ქუთაისის ცენტრალური ბულვარისა და მიმდებარე შენობების რეაბილიტაციისთვის ტენდერი NAT220025121 მუნიციპალურმა განვითარების ფონდმა გასულ წელს გამოაცხადა. სამუშაოების შესრულების ვალდებულება შპს “დაგმა” აიღო.
მხარეებს შორის გაფორმებული ხელშეკრულების მიხედვით “დაგს” ცენტრალური პარკისა და მის მიმდებარედ განთავსებული შენობების (დაზუსტებული არ არის რომელ შენობებზეა საუბარი) დეტალური საპროექტო-სახარჯთაღრიცხვო დოკუმენტაციის მომზადება და ამის საფუძველზე, სამუშაოების განხორციელება ევალება. აღნიშნულისთვის 14 მილიონ 850 000 ლარია გამოყოფილი, საიდან 8 მილიონი, თანხის 55% უკვე გახარჯულია, თუმცა ბულვარში ჯერ გაკეთებული არაფერია.
რაც შეეხება ქუთაისის მერიასა და კაფე-ბარ ,,სავანეს” მფლობელებს შორის არსებულ დავას, ქუთაისის საქალაქო სასამართლო გადაწყვეტილებას 16 ნოემბერს გამოაცხადებს.
