თენგიზ არჩვაძის გარდაცვალება, მიუხედავად მისი ხანდაზმულობისა, მოულოდნელი, უსიამოვნო აღმოჩნდა… გული დაწყვიტა ერს. გახლდათ ერთ-ერთი უკანასკნელი წარმომადგენელი მისი თაობის არტისტებისა. და ვერ იპოვით (ვერც ადრეულ წლებში იპოვიდით) ადამიანს, ვისაც რაიმე სახის აუგი დასცდება მასზე. იყო თავმდაბალი, ხმაურიან ცხოვრებას მოკლებული, განყენებული და ჭეშმარიტი მამულიშვილი…
პანაშვიდი გაიმართება დღეს, არტისტის სახლში. ხოლო დაკრძალვა შედგება ხვალ, სამშაბათს.
მსახიობს 14 საათზე დიდუბის ღვთისმშობლის ეკლესიიდან გამოასვენებენ და იქვე, პანთეონში დაკრძალავენ.
თენგიზ არჩვაძემ ქართულ თეატრსა და კინოში 100-ზე მეტი როლი განასახიერა და არაერთი დასამახსოვრებელი სახე შექმნა.
მან სცენური სახეები შექმნა სპექტაკლებში: “მოკვეთილი“, “დედა”, “ღალატი”, “თვალი პატიოსანი”, “როცა ქალაქს სძინავს” “მე ვხედავ მზეს”, “დღის წესრიგშია ერთი საკითხი”, “კვაჭი კვაჭანტირაძე”, “30 აგვისტო”, “ჯორდანო ბრუნო”, “ძველი ვალსი“, “ასი წლის წინათ“, “ისევ ამ ქვეყნად დავრჩები“, “სახლის ანგელოზები“, “მგზავრის წერილები“ და სხვა.
მონაწილეობდა ფილმებში: “კეთილი ადამიანები”, “ერთი ცის ქვეშ”, “ხევისბერი გოჩა”, “ხევსურული ბალადა”, “დიდოსტატის მარჯვენა”, “დათა თუთაშხია”, “მე ვხედავ მზეს”, “შეხვედრა წარსულთან”, “მალე გაზაფხული მოვა” და სხვა.
თბილისის შოთა რუსთაველის სახელობის თეატრალური ინსტიტუტის დამთავრების შემდეგ, სიცოცხლის ბოლომდე, თენგიზ არჩვაძე კოტე მარჯანიშვილის სახელობის თეატრის მსახიობი იყო. 1967-1973 წლებში იგი მუშაობდა რუსთავის დრამატულ თეატრშიც.
2011 წელს მარჯანიშვილის თეატრის წინ გაიხსნა მსახიობის სახელობის ვარსკვლავი. თენგიზ არჩვაძე იყო შოთა რუსთაველის, კოტე მარჯანიშვილის, მიხეილ თუმანიშვილის, აკაკი ხორავას სახელობის პრემიების, აგრეთვე, სახელმწიფო პრემიის ლაურეატი, ღირსების ორდენის კავალერი. 2017 წელს ხელოვნების განვითარებაში შეტანილი განსაკუთრებული წვლილისთვის მას კულტურის სამინისტროს სპეციალური ჯილდო – “ხელოვნების ქურუმის“ წოდება მიენიჭა. იმავე წელს გამოიცა წიგნი “სახალხო არტისტი – თენგიზ არჩვაძე“, რომელიც მსახიობის ცხოვრებასა და შემოქმედებას ეძღვნება.
