წმ. ანდრიას ქართული უნივერსიტეტი, რომლის საერთაშორისო აბრევიატურაა – ,, SANGU“, 15 წელია ეროვნულ და ზოგადსაკაცობრიო ღირებულებათა ჰარმონიზაციას, სამეცნიერო, აკადემიურ და სამოქალაქო საზოგადოების განვითარებას ემსახურება.
უნივერსიტეტის მისია იმთავითვე განისაზღვრა, როგორც წვლილი ქვეყნის განვითარებასა და მრავალსაუკუნოვანი მატერიალური და სულიერი ფასეულობების დაცვაში, შრომით ბაზარზე მოთხოვნადი მაღალი დონის სპეციალისტების, ახალი სამეცნიერო პერსონალის მომზადებასა და ჯეროვანი სასწავლო შემოქმედებითი გარემოს შექმნაში.
,,SANGU“-ს კარი ღიაა ყველასათვის ვინც დაინტერესებულია გაეცნოს უნივერსიტეტის მიღწევებსა და შესაძლებლობებს. გარემოს, სადაც ცოდნის მიღებისა და ახალი იდეების რეალიზებისათვის თანამედროვე მიდგომებსა და ტექნოლოგიებს სთავაზობენ.
უნივერსიტეტის დირექტორი, პატრიარქის სრულუფლებიანი წარმომადგენელი ბოდბელი მთავარეპისკოპოსი იაკობი თვლის, რომ ტექნოლოგიების საუკუნეში საგანმანათლებლო სისტემა და საზოგადოებაც უნდა პასუხობდეს თანამედროვე გამოწვევებს, რისთვისაც მნიშვნელოვანია ახალი თაობის სტუდენტებს შესაბამისი ცოდნის მიღებისა და გამოცდილების გაზიარების შესაძლებლობა ჰქონდეთ.
საქართველოს მართლმადიდებლური ეკლესიისა და საქართველოს საპატრიარქოს წმინდა ანდრია პირველწოდებულის ქართული უნივერსიტეტის წარმომადგენლებმა ამ მიმართულებით ეფექტური სამუშაო გასწიეს. ისინი ესტუმრნენ შეერთებულ შტატებს და შეარჩიეს ჩრდილოეთ კენტუკის უნივერსიტეტი და გადაწყდა, რომ ერთობლივი სამაგისტრო პროგრამა კიბერუსაფრთხოებაში საუკეთესო იქნებოდა მიზნის მისაღწევად. პარტნიორებმა შეძლეს ამ პროგრამის დანერგვა, ხოლო ეკლესიამ დააფინანსა ამ პროგრამაზე ჩარიცხული სტუდენტების სწავლა.
უნივერსიტეტი არანაკლებ შესაძლებლობებს სთავაზობს სამართლისა და ჰუმანიტარული მიმართულების სტუდენტებს.
ევროპის უნივერსიტეტებთან გაცვლითი პროგრამები, საინტერესო სამეცნიერო და შემოქმედებითი ტურები, კულტურული და გასართობი ღონისძიებები, სტუდენტური თვითმმართველობის დამოუკიდებლობა და საუნივერსიტეტო ცხოვრებაში ჩართვა არის მთავარი, რაც ,,სანგუს“ ახალგაზრდებისათვის სასურველს და უფრო საინტერესოს ხდის.
უნივერსიტეტის ოფიციალურ ფბ. გვერდი წერს:
,,12 ოქტომბერი SANGU-ს დაბადების დღეა!
15 წლის წინ უწმინდესისა და უნეტარესის, სრულიად საქართველოს კათოლიკოს-პატრიარქის ლოცვა-კურთხევით დაფუძნდა ახალი, თუმცა ძველი, ტრადიციული, ქართული სააზროვნო გზის გამგრძელებელი საგანმანათლებლო კერა, რომელმაც ღირებულებათა გადაფასების თანამედროვე ეპოქაში სულიერებისა და ეროვნული ფასეულობების დაცვა და შენარჩუნება, რწმენისა და ცოდნის სინთეზი დაისახა მიზნად.
ამ დროიდან დღემდე წმ. ანდრია პირველწოდებულის სახელობის ქართულ უნივერსიტეტში, სადაც მეგობრული და სიყვარულით გაჯერებული ატმოსფეროა, უმაღლესი აკადემიური განათლების სამივე საფეხურზე ხარისხიან ცოდნას აწვდიან სტუდენტებს მაღალი პროფესიონალიზმით გამორჩეული პროფესორ-მასწავლებლები.
დაარსებიდან დღემდე უნივერსიტეტმა, თანამედროვე სტანდარტებს მორგებული პროფესიონალების არაერთი თაობა გამოუშვა.
ყველა თაობის SANGU-ელს ვულოცავთ მშობლიური უნივერსიტეტის იუბილეს!“
