ქუთაისში, მიწის ნაკვეთი, რომელზედაც მწვანე საფარი გაჩეხეს, გაიყიდა

ქუთაისში, ბალახვანში, ასსაფეხურიან კიბესთან მწვანე საფარისგან ახლახან გაჩეხილ მიწის ნაკვეთი სახელმწიფომ გაყიდა. eauction.ge-ზე აუქციონი 17:00საათზე დასრულდა. სასტუმრო “ქუთაისი ინნ”-ის სასტუმროსთან, კედარის ხეების გაჩეხის შემდეგ, სახელმწიფომ 190 კვ.მ ტერიტორია 75 000 ლარად გაყიდა.

ტერიტორიის შესყიდვაზე ერთი განაცხადი შევიდა. შემსყიდველი “მომხმარებელი #1-ის სახელითაა დარეგისტრირებული. მან ტერიტორიის 75 000 ლარად შეძენის განაცხადი გუშინ 30 აგვისტოს 15:11 საათზე გააკეთა.

,,იყიდება ქალაქ ქუთაისში, დ. აღმაშენებლის გამზ., N2-ის მიმდებარედ არსებული 190 კვ.მ. არასასოფლო-სამეურნეო დანიშნულების მიწის ნაკვეთი(ს/კN03.03.26.480).

საწყისი გასაყიდი ღირებულება შეადგენს 74,600,00 (სამოცდათოთხმეტი ათას ექვსასი) ლარს, ბიჯი 400,00 (ოთხასი) ლარი, საგარანტიო თანხა ბე – 15,000 (თხუთმეტი ათასი) ლარი.

პირობა

– აუქციონში გამარჯვებული პირი ვალდებულია, ნივთის ნასყიდობის საფასური სრულად დაფაროს აუქციონის დასრულებიდან არაუგვიანეს 15 (თხუთმეტი) საბანკო დღის ვადაში და გააფორმოს უძრავი ქონების ნასყიდობის ხელშეკრულება, წინააღმდეგ შემთხვევაში მას არ გადაეცემა უძრავი ქონება და გადახდილი საგარანტიო თანხა უკან არ დაუბრუნდება.

– უძრავი ქონების ნასყიდობასთან დაკავშირებით რეესტრში რეგისტრაციის და სხვა ხარჯებს (ასეთის არსებობის შემთხვევაში) გაიღებს აუქციონში გამარჯვებული პირი/მყიდველი.

– ქონების გამოყენება შესაძლებელია, როგორც საცხოვრებელი ასევე კომერციული მიზნებისთვის.” – ნათქვამი იყო აუქციონის დოკუმენტში.

არასამთავრობო ორგანიზაციის “ევროპა ჩვენი სახლია” წარმომადგენლები ხეების გაჩეხვას აპროტესტებდნენ. ფაქტს ეწინააღმდეგებოდნენ მოქალაქეებიც, მათ არა ერთხელ მიმართეს ქალაქის მერიას თუმცა უშედეგოდ. ქუთაისის მერიის წარმომადგენელმა ,,მეგა ტვ”-ს განუცხადა რომ საკითხი მათ კომპეტენციაში არ შედიოდა.

,,ევროპა ჩვენი სახლია” წევრები ხეების გაჩეხვას წვანე ვანდალიზმად აფასებენ და პასუხისმგებელი პირების დასჯას მოითხოვენ. ასევე, ამბობენ, რომ გაჩეხვის შემდეგ ეროზიის რისკების გათვალისწინებით, ფერდის მდგრადობა კითხვის ნიშნის ქვეშ დგას.