„საშუალო ქართველის შემოსავალი დღეში დაახლოებით, 53 ლარია, მიტინგზე გასვლისთვის 3-6 წლის დანაზოგის შესაბამისი თანხით აჯარიმებენ ხალხს,“ – ამის შესახებ პლატფორმების Freebusiness-სა დაFreedonation-ს იდეის ავტორი გიორგი ჩუგოშვილი „ფეისბუქის“ პირად გვერდზე წერს და ეხმაურება პროკურატურის მიერ 5 ფონდის ანგარიშების დაყადაღების ფაქტს.
ჩუგოშვილის პოსტს უცვლელად გთავაზობთ:
„საშუალო ქართველის შემოსავალი „საქსტატის“ მონაცემებით არის 2 056.7 ლარი, გადასახადების ჩათვლით. გადასახადებს რომ გამოვაკლებთ რჩება დაახლოებით 1 580 ლარი, ანუ დღეში დაახლოებით 53 ლარი.
1 580 ლარიდან 10%-ზე მეტს რომ ვერ დაზოგავს ადამიანი ხომ გასაგებია. ანუ 158 ლარი თვეში, ესეც ბევრია, 140 ლარი მაქსიმუმია, რაც შეიძლება დაზოგო ამ თანხიდან.
5 000 ლარი არის საშუალო შემოსავლიანი ქართველის დაახლოებით 3 წლის დანაზოგი. ძალიან ბევრი ადამიანისთვის კი 6 წლის დანაზოგი. უბრალოდ მიტინგზე გასვლისთვის ხალხს აჯარიმებენ 3 და 6 წლის დანაზოგის შესაბამისი თანხით! და როდესაც ერთმანეთის დახმარებას ვიწყებთ, რომ 6 წლის დანაზოგის გადახდა არ მოუწიოს ხალხს, ამის შესაძლებლობასაც კლავენ. დასკვნები თქვენთვის მომინდვია! ბოლოს მაინც სიკეთე გაიმარჯვებს,“ – წერს ჩუგოშვილი.
შეგახსენებთ, რომ საქართველოს პროკურატურამ სასამართლოს განჩინების საფუძველზე საქართველოში არსებულ ყველა საბანკო დაწესებულებაში განახორციელა „ნანუკას ფონდის“ , „ფროსფერითის“, „ფონდი ერთმანეთისთვის 24/7“-ის, „სირცხვილიას“ და „თბილისის ადამიანის უფლებათა სახლის“ საბანკო ანგარიშების და მათზე არსებული ფულადი სახსრების დაყადაღება.
პროკურატურისვე განმარტებით, „შეგროვებული ფინანსების ძირითად ნაწილს ე.წ. „ფონდები“ ახმარენ ჯგუფური ძალადობის ორგანიზების და მასში მონაწილეობის ფაქტზე ბრალდებულ პირთა და მათი ოჯახის წევრთა ფინანსურ უზრუნველყოფას”.
