ქუთაისის ოპერის შემოქმედებით და ინფრასტრუქტურულ განვითარებასთან დაკავშირებით თეა წულუკიანმა ქუთაისში შეხვედრა გამართა
საქართველოს კულტურის, სპორტისა და ახალგაზრდობის მინისტრმა თეა წულუკიანმა და მინისტრის პირველმა მოადგილემ, კახა სიხარულიძემ ქუთაისის მელიტონ ბალანჩივაძის სახელობის ოპერისა და ბალეტის პროფესიულ სახელმწიფო თეატრში სამუშაო შეხვედრა გამართეს.
შეხვედრაზე მინისტრმა და მისმა პირველმა მოადგილემ განიხილეს ქუთაისის ოპერის ახალი კადრებით გაძლიერების აუცილებლობა იმისთვის, რომ ამ უდიდესი ისტორიის და ტრადიციის მქონე თეატრს სათანადო პირობები ჰქონდეს განვითარებისათვის. შეხვედრაზე გადაწყდა, რომ ხელი უნდა შეეწყოს ქუთაისის ოპერის სცენაზე იმ ადგილობრივი ახალგაზრდების დაბრუნებას, ვინც დედაქალაქის თეატრებსა და ორკესტრებში მუშაობს. ბუნებრივია, რომ ასევე ხელი უნდა შეეწყოს სხვა კვალიფიციური კადრებით ქუთაისის ოპერის თეატრის შევსებას. ამ მიზნით, ქუთაისის ოპერა გაძლიერდება ახალი საშტატო ერთეულებით, ხოლო არსებულ ზოგიერთ შტატზე გაიზრდება ანაზღაურება, რაც აუცილებელია თეატრის სრულფასოვანი შემოქმედებითი ფუნქციონირებისთვის.
შეხვედრაზე, ასევე, ქუთაისის ოპერის შენობის რეაბილიტაციის შესახებ იმსჯელეს. აღინიშნა, რომ შენობის რეაბილიტაციის პროექტირება ზაფხულში დასრულდება, რის შემდეგაც, მიმდინარე წლის ბოლოსთვის, უკვე შესაძლებელი იქნება სარეაბილიტაციო სამუშაოების დაწყება.
