„როდესაც პოლონეთში იაროსლავ კაჩინსკის მიშას ფოტო აჩვენეს, ადამიანი უბრალოდ ვერ იცნო..
ეს ის ადამიანია, ვინც მიყვარდაო?”-
თქვა ეკა ხერხეულიძემ ტვ-პირველთან ინტერვიუში.
„მე მაინტერესებს ერთი რამ.
როდესაც ჩვენ ვსაუბრობთ იმაზე, რომ ხელისუფლება არ ითვალისწინებს თურმე (თურმე კი არა, ასეა – არ ითვალისწინებს) აშშ-ს სახელმწიფო დეპარტამენტის ანგარიშს და არაფრად არ აგდებს,
მე ოპოზიციას მინდა ვკითხო:
ისინი იყენებენ სახელმძღვანელოდ ამას?
როდესაც სახელმწიფო დეპარტამენტის ანგარიშში ერთი თავი აქვს მიძღვნილი საქართველოს ყოფილი პრეზიდენტის, მიხეილ სააკაშვილის წამებასა და მის მიმართ არაადამიანურ მოპყრობას,
ჩვენთვის რა დასკვნები გამოგვაქვს?
ჩვენ რა გადავწყვიტეთ საკუთარ თავებთან?
ხვალიდან როგორები ვართ ამ საკითხთან მიმართებაში?
აუცილებელია ამ საკითხის ირგვლივ ოპოზიციის ერთობა და აუცილებელია ამ საკითხის მთავარ საკითხად დაყენება.
როდესაც ევროინტეგრაციისკენ მიისწრაფვი და საქართველოს ყოფილი პრეზიდენტი გყავს ციხეში, ესენი სრულიად შეუსაბამო რამეა.. და გვყავს როგორ პირობებში – წამების პირობებში.. მიხეილ სააკაშვილის ჯანმრთელობას გამოუსწორებელი ზიანი მიადგა და ეს გადაწყვეტილი საკითხია.
შემიძლია ერთი დეტალი გითხრათ – როდესაც პოლონეთში ვიზიტით იყო ჩასული ჩვენი წარმომადგენლობა და იაროსლავ კაჩინსკის შეხვდნენ, ადამიანმა მიშას ფოტოს რომ შეხედა, თქვა – ეს ის ადამიანია, რომელიც მიყვარდა, რომლისგანაც მაგალითს ვიღებდით, როგორ ეცხოვრა ჩვენს ქვეყანას, როგორ გაგვეტარებინა რეფორმები და როგორ გაგვეგრძელებინა ჩვენი ქვეყნის განვითარების გზა?.. ეს ის ადამიანია?..
ადამიანი ვერ იცნო, უბრალოდ..
ველოდები ამას:
როგორც „ნაციონალური მოძრაობა” არის სოლიდარული და ყველა აქციაზე, ყველა საპროტესტო ღონისძიებაში იღებდა მონაწილეობას, რომ ის უმსგავსობა, ძალადობა, არაადამიანური მოპყრობა და ტერორი დაეგმო თავისი მხრიდან იმ პირთა მიმართ განხორციელებული, ვინც სახელმწიფო დეპარტამენტის ანგარიშშია მოხსენიებული (ტელეკომპანია პირველის მესვეურნი და ყველა, ყველა…),
ასევე ვალდებულია ოპოზიციაში შემავალი ყველა პოლიტიკური პარტია, რომ ძალიან მნიშვნელოვანი საკითხების ირგვლივ გაერთიანდეს.
და ეს არის ძალიან მნიშვნელოვანი საკითხი, როდესაც ანგარიშის ერთ თავში საუბრობენ მიხეილ სააკაშვილის წამებაზე და მის მიმართ არაადამიანურ მოპყრობაზე.
ეს სიცხადე გვაკლია!
არ არის უხერხული. ეს კომპლექსი ყველამ როგორღაც საკუთარ თავში უნდა მოიკლას.
უხერხულობის განცდა აქვთ, რომ როგორ შეიძლება მიხეილ სააკაშვილის ირგვლივ მოხდეს ასეთი კონსოლიდაცია.
ძალიან დიდი ბოდიში, მაგრამ როდესაც ქვეყნებზე ვსაუბრობთ, ჩვენ მათი ლიდერები გვახსენდება და ზოგადად, ისტორია ასეთია, რომ ლიდერები განასახიერებენ საკუთარი ქვეყნების სახეს და არ არის ეს მხოლოდ და მხოლოდ საქართველოში აღმოჩენა.
როდესაც ვსაუბრობთ ამერიკაზე, გვახსენდება ჯეფერსონი, გვახსენდება რეიგანი.. როდესაც ვსაუბრობთ საფრანგეთზე, გვახსენდება დე გოლი… როდესაც ვსაუბრობთ ბრიტანეთზე, გვახსენდება ჩერჩილი…
და ეს არ არის უხერხული.
ჩვენ დღეს საქართველოს ყოფილი პრეზიდენტი გვიკვდება ციხეში… ეს იცოდეს ყველამ.
ვისაც უშუალო შეხება აქვს მიხეილ სააკაშვილთან, იცის, რომ მისი ჯანმრთელობის მდგომარეობა არის იმ კრიტიკულ ზღვარზე, რომ შეიძლება უკვე ვერც ვერაფერი ვეღარ გამოვასწოროთ, თუკი დადგება ის დრო, როდესაც მისი გათავისუფლების საკითხი მართლა ისეთ აქტიურ ფაზაში იქნება, რომ ეს ხელისუფლება ვერაფერს ვეღარ იზამს.
ვარწმუნებ ყველას, რომ როდესაც აშშ-ს სახელმწიფო დეპარტამენტი ასე ხმამაღლა საუბრობს მის ჯანმრთელობაზე, მის წამებაზე და მის მიმართ განხორციელებულ არაადამიანურ მოპყრობაზე, ეს არ იქნება მხოლოდ ერთი ფაქტი და ამას ექნება განგრძობადი სახე… ეს იქნება შეუქცევადი დღის წესრიგი და აუცილებლად მოხდება მიხეილ სააკაშვილის გათავისუფლება.
იმიტომ, რომ როგორ უიმედოდაც არ უნდა ვიყოთ ამ ხელისუფლების მიმართ განწყობილნი, ჩვენ მარტო არ ვართ ამ სამყაროში”.”-განაცხადა ეკა ხერხეულიძემ.
