უახლოეს ორ დღეში, ამ დიდ რელიგიურ დღესასწულთან დაკავშირებით, თუ დავარღვევთ შეზღუდვებს, არ მინდა ასე მოხდეს, მაგრამ შეიძლება, საქართველოში ის სცენარი განმეორდეს, რაც დღეს ევროპის ყველა წამყვან ქვეყანაში გვაქვს , – ამის შესახებ ინფექციური საავადმყოფოს დირექტორმა თენგიზ ცერცვაძემ ტელეკომპანია „პალიტრანიუსის“ გადაცემაში „360 გრადუსი“ განაცხადა.
წამყვანის კითხვაზე, კორონავირუსთან ბრძოლაში საქართველოს მიერ მიღწეული შედეგი შეიძლება თუ არა კითხვის ნიშნის ქვეშ დადგეს, ან წყალში ჩაიყაროს, ცერცვაძემ უპასუხა, რომ ეს ასე მოხდება, თუკი საზოგადოება მკაცრი შეზღუდვების შესრულებას საჭიროდ არ ჩათვლის.
„კითხვის ნიშნის ქვეშ ეს შედეგი არ დადგება, მაგრამ მომავალში, რომ ცუდი შედეგი შეიძლება დაიდოს, რა თქმა უნდა, ეს კითხვის ნიშნის ქვეშ დააყენებს იმას, რასაც ჩვენ აქამდე მივაღწიეთ. წყალში ბოლომდე გადაყრილი არაფერია, მაგრამ შეიძლება მაინც ჩაითვალოს წყალში ჩაყრილად ერთადერთ შემთხვევაში, თუ ჩვენ ამ შედეგებით გავთამამდებით; თუ ჩავთვლით, რომ არ არის საჭირო იმ მკაცრი ზომების და საკმაოდ მკაცრი შეზღუდვების შესრულება, რომელიც ჯანდაცვის სისტემის რეკომენდაციით მთავრობამ დააწესა. უახლოეს ამ ორ დღეში, ამ დიდ რელიგიურ დღესასწულთან დაკავშირებით, თუნდაც, ამ მიზეზით თუ დავარღვევთ ამ შეზღუდვებს, არ მინდა ასე მოხდეს, მაგრამ მაშინ შეიძლება საქართველოში ის სცენარი გამეორდეს, რაც დღეს ევროპის ყველა წამყვან ქვეყანაში გვაქვს. ეს არ უნდა მოხდეს, მაშინ დადგება ყველაფერი კითხვის ნიშნის ქვეშ და მაშინ ჩაითვლება წყალში ჩაყრილად. ეს არ უნდა დავუშვათ. ჩვენს მონაპოვარს, რომელიც ამდენი მოთმინებით, ერთმანეთზე ზრუნვით, კვალიფიციური მიდგომით და სწორი საპასუხო ზომებით მივაღწიეთ, უნდა გავუფრთხილდეთ“, – განაცხადა ცერცვაძემ.
ტელეწამყვანის კითხვაზე, რამდენი პაციენტის შემთხვევაში შეიძლება აღმოჩნდეს ჩვენი ჯანდაცვის სისტმა კრიტიკულ ზღვარზე, თენგიზ ცერცვაძე პასუხობს, რომ ამის განსაზღვრა წინასწარ შეუძლებელია. თუმცა, დასძენს, რომ ეს 1000 პაციენტის შემთხვევაში არ მოხდება.
„ამას ზუსტად ვერავინ გეტყვით, ეს დროში და პრაქტიკაში უნდა გამოიცადოს. გულწრფელი არ იქნება, ვინც გეტყვით, რომ ეს შეიძლება მოხდეს 3000-2000 პაციენტის შემთხვევაში. ფაქტი ერთია, სადღაც 1000 პაციენტამდე ეს არავითარ შემთხვევაში არ მოხდება, აი, 1000-ის ზემოთ როდის მოხდება, 2000-3000 თუ 4000-ის შემთხვევაში, ამას ზუსტად ვერავინ გეტყვით, რადგან ეს კარგად აწყობილი სისტემა, რომელიც დღეს საქართველოში მუშაობს, არავის გამოუცდია, არ ყოფილა საშუალება, რომ საქმეში გამოეცადათ, თუ რა დატვირთვებს გაუძლებდა ეს სისტემა. ეს დაახლოებით, იგივეა, იკითხოთ, რა სიჩქარის განვითარებას გაუძლებს თვითმფრინავი, ან ავტომანქანა ისე, რომ არ დაიშალოს“, – განაცხადა ცერცვაძემ.
