პოლიტოლოგი ვახტანგ ძაბირაძე არ გამორიცხავს, რომ საჭიროების შემთხვევაში ბიძინა ივანიშვილი პოლიტიკაში მესამედ დაბრუნდეს.
როგორც ძაბირაძემ „ინტერპრესნიუსთან“ საუბრისას განაცხადა, ბიძინა ივანიშვილის პოლიტიკიდან წასვლა პირობითია. ის ასევე ვარაუდობს, რომ „ქართული ოცნების“ წევრები არ არიან დარწმუნებულები იმაში, რომ წასვლის მიუხედავად ბიძინა ივანიშვილი არ ჩაერევა პარტიის საქმიანობასა და პოლიტიკაში.
„ეს არ არის პირველი შემთხვევა, როდესაც ბიძინა ივანიშვილმა გააკეთა განცხადება, რომ პოლიტიკიდან მიდის. ანალოგიური შემთხვევა გვქონდა ადრეც, როდესაც მან თქვა, რომ თავისი მისია შეასრულა, მშვენიერი გუნდია, რომელსაც აბარებს ქვეყნის განვითარებას, თუმცა გარკვეული დროის შემდეგ დაბრუნდა პოლიტიკაში იმ მოტივით, რომ მძიმე ვითარებაა, რომ ფაქტობრივად, გიორგი კვირიკაშვილი ცდილობს პარტიას ჩამოაშოროს და პირველი პირი გახდეს.
ამ ცვლილებას ბევრი არაფერი მოყოლია, არც სოციალურ-ეკონომიკური და არც პოლიტიკური.
მისი წასვლა შეიძლება ითქვას, რომ პირობითია. მაშინაც პირობითი იყო, საზოგადოებამ არ მიიღო სიმართლედ ეს განცხადება, თვლიდა, რომ არაფორმალური მმართველობა იყო. როგორც აღმოჩნდა ასეც ყოფილა.
დღესაც არა მოწინააღმდეგეებში ან ნეიტრალურ ხალხში, თავად „ქართული ოცნების“ შიგნით, თუნდაც უმაღლეს ეშელონებში, რა თქმა უნდა, მედიასთან იტყვიან, რომ პოლიტიკიდან წავიდა, თუ გულწრფელები იქნებიან, არამგონია მათ ირწმუნონ ის, რომ ბიძინა ივანიშვილი მართლაც წავიდა პოლიტიკიდან, პოლიტიკაში ან პარტიის საქმიანობაში არ ჩაერევა. თუ ერთი პრეცედენტი იყო, როდესაც მოვიდა მეორედ, ქართულ პოლიტიკაში ბიძინა ივანიშვილის მესამე მოსვლაც შეიძლება იყოს, საჭიროების შემთხვევაში.
მის წერილში გამოქვეყნებული მიმოხილვიდან შეიძლება ითქვას, რომ მართლაც სიმართლეა და წყალი არ გაუვა იმას, რომ მან მიხეილ სააკაშვილი ჩამოაშორა ხელისუფლებას.
ფაქტობრივად, თუ სახელმწიფოს სისტემას ავიღებთ, მან ჩაიბარა ისეთი სისტემა, როგორიც სააკაშვილს ჰქონდა და ისეთივე დატოვა. რადიკალური ცვლილება ამ სისტემას არ განუცდია. დემოკრატიული ინსტიტუტები ყველაზე მეტად გვჭირდება. ყველაზე პირველი პრობლემა არის დემოკრატიული ინსტიტუტების ჩამოყალიბება“, – აცხადებს ძაბირაძე.
ვახტანგ ძაბირაძე გავრცელებულ ინფორმაციასაც გამოეხმაურა, რომლის თანახმადაც, „ქართული ოცნების“ თავმჯდომარის თანამდებობას, სავარაუდოდ, ირაკლი კობახიძე დაიკავებს. ძაბირაძის თქმით, კობახიძე „ქართული ოცნების“ გამორჩეული ფიგურაა, თუმცა დასძენს, რომ თუ პარტიის ლიდერი გიორგი გახარიაა, მანვე უნდა დაიკავოს პარტიის თავმჯდომარის თანამდებობა.
„საპარლამენტო მმართველობისას, ამ შემთხვევში თუ გახარია არის პარტიის ლიდერი და არა ბიძინა ივანიშვილი, მაშინ ის უნდა იყოს თავმჯდომარე, თუ არ არის ლიდერი გახარია და ფორმალურ გადანაწილებაზეა საუბარი, რა თქმა უნდა, კობახიძე უნდა იყოს. მან საკმაოდ დიდი გზა გაიარა, თავის დროზე, როდესაც მივიდა პარტიაში ორგანიზაციულ საკითხებს განაგებდა, შემდეგ პარლამენტის თავმჯდომარე იყო, საკმაო გამოცდილება მიიღო. ჩემთვის ეს მოულოდნელი არ ყოფილა“,-აცხადებს ძაბირაძე.
