გიორგი მარგველაშვილის სიძის, სოსო ყიფშიძის დედა თეა ყიფშიძე სოციალურ ქსელში ფოტოებს ავრცელებს წარწერით “ბრაზი მახრჩობს! აი, ესაა ე.წ. თავდამსხმელი”
“პატიმრის დედა – 20 დღეა, ამ სტატუსს ვატარებ, მაგრამ ვერაფრით ვეგუები – ბრაზი მახრჩობს! აი, ესაა ე.წ. თავდამსხმელი (ყველა დაზიანება, რასაკვირველია, არ ჩანს), რომელიც ლამის ტერორისტად გამომიცხადეს, თან ისეთად, გირაოთიც რომ არ გაიშვებოდა სახლში! და რატომ? უბრალოდ ვიღაცას სადღაც ძალიან ეამა, რომ ციხეში აღმოჩნდებოდა ადამიანი, ვიზეც სააგენტო-სააგენტოზე და ზედ დამატებული ტვ პირველი იტყოდა – მარგველაშვილის სიძემ ეს რა ჩაიდინა… და რა ჩაიდინა? დაინტერესებულხართ? წადით, ჯერ დაჭრილები იპოვეთ და მოინახულეთ, მერე ხელყუმბარაც მოიკითხეთ… საქმის მასალები რომ დიდად არ გაინტერესებთ, ვხვდები… და მერე წერეთ… წერეთ, რამდენიც გინდათ…P.S. ისე, რა უცნაურია, რომ პირველი ცნობა რუსთავი2-მა გაავრცელა, სადაც წლები ვიმუშავე მეც და გარკვეულ ხანს მუშაობდა სოსოც.პატიმრის დედა! – ვერა, ვერ შევეგუები! მაინც ვიპოვით სამართალს!” | წერს სოსო ყიფშიძის დედა
თეა ყიფშიძე მოკლედ აღწერს იმ დღეს განვითარებულ მოვლენებს, მისი თქმით კონფლიქიტი ანა მარგველაშვილის მიერ არასწორად გაჩერებული მანქანის გამო დაიწყო.
“ამბავი ძალიან მოკლედ ასეთია – ანა მარგველაშვილი მანქანას აჩერებს ეზოში, სახლთან, როგორც ირკვევა, მეზობლის ადგილას (რომელსაც რასაკვირველია, არ უყიდია ის ადგილი, მაგრამ ჯიგრულად ნომერი დააწერა), მის მანქანას კეტავს ავტომობილით ძალიან შეგნებულად ის, ვისი ადგილიცაა. მალე ანა წასასვლელია, ჩადის და ასიგნალებს, რომ მანქანა გაწიონ. 3 დღის ჩამოსული და 3 საათით ადრე დაბუსტული სოსო 1 წლის ბავშვთან მარტოა და აჭმევს. მალე 2 კაცი (მამა-შვილი) ჩაქანდება და საქმეებს ურჩევს ქალს, აგინებს ცოცხალ-მკვდარს. ხმაური ესმის სოსოსაც და ესარჩლება მე-9 სართულიდან. მალე მამა-შვილი (როგორც თავად აცხადებენ, მე-9 სართულიდან შეშინებულები) დაეძებენ ფიცრებს და ასე შეიარაღებულები ადიან (ასევე როგორც თავად აცხადებენ თავის სართულზე, მე-12-ზე), მაგრამ აღმოჩნდებიან სოსოს სართულზე (ამბობენ, რომ ლიფტი სოსომ გააჩერა, თუმცა კოდირებულ ლიფტს როცა მგზავრი აყავს, არსად ჩერდება). უმოწყალოდ ცემენ, ურტყამენ, არ ესმით ქალის კივილი, რომელიც გაშველებას ცდილობს (და ამ დროს 1 წლის ბავშვი სახლში მარტოა) და მერე ვითომ თანხმდებიან, რომ მეზობლებში კონფლიქტი ვის არ მოსვლია, მაგრამ შეაქვთ საჩივარი და სოსოს იჭერენ. ჰო, კიდევ ერთი დეტალი – ამბობენ, რომ სოსო გაიქცა და ამ დროს ადამიანი იყო მედიქლაბში სერიოზული დაზიანებებით. ასეთია ძალიან მოკლედ ეს ამბავი. კამერები, რომლის იმედიც გვქონდა – წაშლილია. კიდევ ბევრი დეტალია, თუმცა ამას აღარ ჩავუღრმავდები ”
შეგახსენებთ, რომ 20 დღის წინ , სოსო ყიფშიძე მამა-შვილის მიმართ ძალადობის ბრალდებით დააკავეს. ბრალდებულს პროკურატურამ ბრალი უკვე წარუდგინა და წინასწარი აღკვეთი ღონისძიების შეფარდების შუამდგომლობით სასამართლოსაც მიმართა.
