საქართველოს პირველი პრეზიდენტის ვაჟი, ცოტნე გამსახურდია გერმანიაში ჩატარებული მკურნალობის შემდეგ რეაბილიტაციის კურსს სამშობლოში გადის.
მისი მეუღლის, ანა ჯაბაურის ინფორმაციით, მდგომარეობა უმჯობესდება. მისივე განმარტებით, ცოტნე გამსახურდია უკვე ორჯერადად არის ვაქცინირებული, რამაც ექიმთა ჯგუფის გაფართოების შესაძლებლობა მისცა.
ირკვევა, რომ უკანასკნელ პერიოდში პირველი პრეზიდენტის შვილი მესამე პრეზიდენტის, მიხეილ სააკაშვილის ყოფილ რეზიდენციაში, წეროვანში ცხოვრობს.
“4 თვეა წეროვანში ვართ და ვცხოვრობთ მიხეილ სააკაშვილის ყოფილ რეზიდენციაში, რომელიც მოგვიანებით თავდაცვის სამინისტროს გადაეცა. არაჩვეულებრივი გარემო – სუფთა ჰაერი და ულამაზესი ტყე-პარკი გვაკრავს გარს. არ გვაკლია არც სითბო და ყურადღება. აქვე ახლოს, ამავე შემოსაზღვრულ ტერიტორიაზეა განთავსებული მარო მაყაშვილის სახელობის სამხედრო სარეაბილიტაციო ცენტრი, რომელიც სასიამოვნოდ გაგაკვირვებთ ყველაფრით – თანამედროვე, მაღალი სტანდარტებით გამორჩეული დარბაზებითა და უახლესი აპარატურით, მაღალპროფესიული გუნდითა და მოტორულ-კოგნიტური უნარების განვითარებისთვის საჭირო ბევრი სიახლით. სწორედ ამ ცენტრის სპეციალისტები უტარებენ ცოტნეს ყველა ფიზიოთერაპიულ პროცედურას, რომელიც ამ ეტაპზეა საჭირო.
გარდა აღნიშნული თერაპიისა, ცოტნეს ორჯერადი ვაქცინაციის შემდეგ, გვყოფნის გამბედაობა გავზარდოთ მასთან მომუშავე სპეციალისტთა რიცხვი და რეაბილიტაციის პროცესში დამატებით ჩავრთოთ ისეთი მეთოდებიც, როგორიცაა ჰაილეურითმია და ჩინური მედიცინა. ყველა სპეციალისტი, რომელიც ცოტნესთან მუშაობს, ცხადია, სრულად ვაქცინირებული და მკაცრად ეკიპირებულია. ცოტნეს ამჟამინდელ მდგომარეობას რაც შეეხება, ამა წლის თებერვალ-მარტში რეაბილიტაციის შედეგი საკმაოდ იმედისმომცემი და თვალსაჩინო იყო – მან დაიწყო ლაპარაკი, ყოველდღე ამბობდა ახალ სიტყვებს, აწყობდა წინადადებებს, ჰქონდა სრულიად ნათელი გონება, იცინოდა, ხუმრობდა, თანდათან აუმჯობესებდა მოტორულ ფუნქციებსაც. მე და ცოტნეს ძმები სიხარულისგან ლამის დავფრინავდით, ზეიმი გვქონდა ყოველდღიურად.
მაგრამ, სამწუხაროდ, მოულოდნელად ცოტნეს ძალიან მძიმე ეპილეფსიური სტატუსი დაეწყო, რომლის მოხსნაც ძალიან გაუჭირდათ გერმანელ პროფესორებს. ორჯერ გადაიყვანეს ხელოვნურ კომაში, დაუნიშნეს უძლიერესი ანტიკონვულსიური მედიკამენტები, რამაც მნიშვნელოვნად დაგვხია უკან – აპრილში, რეაბილიტაციის უმძიმესი 15 თვის შემდეგ, ისევ ნულიდან დავიწყეთ ყველაფერი. დღესდღეობით ცოტნეს მდგომარეობა ახლიდან უმჯობესდება. ჯერ, სამწუხაროდ, ვერ მივაღწიეთ ეპილეფსიურ სტატუსამდელ მდგომარეობას, მაგრამ გონება ისევ ნათელი აქვს, დაიწყო კიდურების ამოძრავება, აქტიურად მეკონტაქტება ბგერებით და ვატყობ, რომ უკვე ლაპარაკის დაწყებას ცდილობს” – ამბობს ანა ჯაბაური “ამბები.ჯის-თან” ინტერვიუში.
შეგახსენებთ, ცოტნე გამსახურდია თბილისში, ვერაზე 2019 წლის 19 დეკემბერს დაჭრეს.