საქართველოს პრეზიდენტი 24 საათის განმავლობაში საქართველოს პრეზიდენტია – მას ნებისმიერი აქტის გამოცემა, რომელიც მის ექსკლუზიურ უფლებამოსილებას შეესაბამება, 24 საათის განმავლობაში შეუძლია, – ამის შესახებ „ქართული ოცნების“ დეპუტატმა, თენგიზ შარმანაშვილმა ჟურნალისტებთან პატიმრების შეწყალების აქტზე საუბრისას განაცხადა.
მისი თქმით, თუნდაც ერთი ან ორი პატიმრის დამატებითი ინფორმაციის მოძიება იმისთვის, რომ შეწყალებულთა სიაში მოხვედრილიყვნენ, ღირდა იმათ, რომ 1-2 ან მეტი საათით გვიან გამოცემულიყო ეს აქტი.
„საქართველოს პრეზიდენტი 24 საათის განმავლობაში საქართველოს პრეზიდენტია. მას ნებისმიერი აქტის გამოცემა, რომელიც მის ექსკლუზიურ უფლებამოსილებას შეესაბამება, 24 საათის განმავლობაში შეუძლია. შეიძლება რაღაც ტექნიკური საკითხები იყო დასაზუსტებელი, შეიძლება რაღაც დოკუმენტაცია იყო დამატებით მოსაძიებელი – რაც მთავარია შეწყალების აქტი გამოიცა.
შეიძლება თუნდაც ერთი ადამიანის საკითხი იყო დასაზუსტებელი. ერთი კაცის გათავისუფლებაც ღირს იმისთვის, რომ 1 საათით გვიან გამოსცე ასეთი აქტი. ვერ გეტყვით რასთან იყო ეს დაკავშირებული, მაგრამ თუნდაც 1 ან 2 კაცის დამატებითი ინფორმაციის მოძიება იმისთვის, რომ შეწყალებულთა სიაში მოხვედრილიყვნენ, ღირდა იმათ, რომ 1-2 ან მეტი საათით გვიან გამოცემულიყო ეს აქტი“, – განაცხადა შარმანაშვილმა.
კითხვაზე, გაიარა თუ არა რაიმე სახის კონსულტაცია საპარლამენტო უმრავლესობასთან შეწყალების აქტის მომზადების დროს, შარმანაშვილმა უპასუხა, რომ ასეთი კონსულტაცია არ ყოფილა.
„ეს მისი ექსკლუზიური უფლებამოსილებაა და მას აქვს უფლება არც კი გაიაროს კონსულტაცია ვინმესთან. არა, არ ყოფილა კონსულტაცია, ეს მისი ექსკლუზიური უფლებაა და ჩვენ მის საქმეში არ და ვერ ჩავერევით“, – განაცხადა შარმანაშვილმა.
დეპუტატის განცხადებით, „ნებისმიერ ჰუმანურ აქტში პოლიტიკური ანგაჟირების შეტანა ამ აქტს აფუჭებს და ცრუ მოლოდინებს წარმოშობს“.
„მივესალმებოდი, რომ ამ შემთხვევაში გავყვეთ კონსტიტუციურ წესებს. ვინაიდან კონსტიტუციამ გადაწყვიტა, რომ ეს იყოს აპოლიტიკური აქტი და მხოლოდ პრეზიდენტის უფლებამოსილების სფეროშია, ჯობს ასე გაგრძელდეს, რადგან ასეთ შემთხვევაში უფრო მეტი ჰუმანიზმია, ვიდრე პოლიტიკური ანგაჟირების დროს.
არავითარი მოლოდინები არ შექმნილა, უბრალოდ უნდათ, რომ ხელოვნურად შექმნან ასეთი მოლოდინები. ნებისმიერი სიტუაცია, რომელიც საქართველოში ტრიალებს, უნდათ, რომ პოლიტიკური დაპირისპირებებისა და ურთიერთბრალდებების სფეროში გადაიტანონ. ეს ძალიან ცუდია და ხელს უშლის შიდა სამოქალაქო ინტეგრაციას საქართველოში“, – განმარტა შარმანაშვილმა.
კითხვაზე, შეწყალების აქტის შედგენის დროს იყო თუ არა გათვალისწინებული ის ფაქტორი, რომ აქციების დროს დაკავებულები არ აღიარებდნენ და არ ინანიებდნენ ჩადენილ დანაშაულს, შარმანაშვილმა უპასუხა, რომ კონკრეტულად რა და როგორი ფაქტორით ახდენს გავლენას პრეზიდენტის გადაწყვეტილებაზე, ალბათ, თავად განმარტავს.
„რთულია პრეზიდენტის ნაცვლად მის მოტივებზე ვისაუბრო, მაგრამ ფაქტი ერთია, რომ როდესაც შენ საჯაროდ აცხადებ, რომ ამ პრეზიდენტის ლეგიტიმურობას არ ცნობ, აცხადებ, რომ ის ძალადობრივი აქტები თურმე გამოხატვის თავისუფლება ყოფილა, როცა „მოლოტოვის კოქტეილებს“ ესროდნენ სამართალდამცავებს, პარლამენტის შენობასთან ხანძრები გააჩინეს და ამასაც გამოხატვის თავისუფლებას უწოდებენ. როცა ადამიანი დაჯდება და ამაზე ფიქრს დაიწყებს, რა თქმა უნდა, ეს ფაქტორები ამაზე გავლენას მოახდენს. თუმცა კონკრეტულად რა და როგორი ფაქტორით ახდენს გავლენას პრეზიდენტის გადაწყვეტილებაზე, ალბათ, თავად განმარტავს. წმინდა ლოგიკიდან გამომდინარე, თეორიულად ასეთი რაღაცები გავლენას მოახდენს და ეს ნორმალურიც არის“, – განაცხადა შარმანაშვილმა.
ცნობისთვის, ნათლისღების დღესასწაულთან დაკავშირებით მიხეილ ყაველაშვილმა 159 პირი შეიწყალა. იყო მოლოდინი, რომ შეწყალება შესაძლოა, შეხებოდათ აქციების დროს დაკავებულ პირებს, რის გამოც, როგორც რუსთავის, ასევე გლდანის ციხესთან მსჯავრდებულების ოჯახის წევრები, მეგობრები და ახლობლები მივიდნენ, თუმცა ამ დრომდე უცნობია იმ პირთა ვინაობა, ვინ შეიწყალა მიხეილ ყაველაშვილმა.
