4 ივნიის ბიჭვინთაში პანიონატ „სამშიტოვაია როშჩას” ტერიტორიაზე მდებარე საზაფხულო კაფე „აფსნიში” ადგილობრივი მკვიდრი რუსი ტურისტების ჯგუფს თავს დაესხა და ორი დამსვენებელი დაჭრა. დაჭრილები სამკურნალოდ სასწრაფოდ სოჭში გადაიყვანეს. თავდამსხმელი დაკავებულია. ამ ინციდენტმა აფხაზეთში საყოველთაო შეშფოთება გამოიწვია. ადგილობრივი მოსახლეობა შიშობს, რომ ამან შესაძლოა ტურისტული სეზონი ჩაშალოს. დე ფაქტო პრეზიდენტმა ასლან ბჟანიამ კი მეორე დღესვე საგანგებო თათბირი გამართა და მომხდარს „აფხაზეთის წინააღმდეგ ჩადენილი დანაშაული” უწოდა.
დაკავებულია გუდაუთის რაიონის სოფელ ლიხნის მკვიდრი, 43 წლის დიმიტრი ფილია. დადგენილია, რომ მან კონფლიქტის შედეგად მან ცეცხლსასროლი იარაღით საზარდულსა და ფეხებში დაჭრა რუსეთის მოქალაქე მამაკაცები – 1985 წელს დაბადებული ა. ფილოიანი და ასევე 1985 წელს დაბადებული ტ. სალიმგარიევი, რომლებიც კაფეში იმავე პანსიონში გაცნობილ სამ ქალბატონთან ერთად იმყოფებოდნენ, რომლებიც ასევე რუსეთის მოქალაქეები არიან.
ამასთან, ფილიამ მათ ორი მჭიდი დააცალა, საერთო ჯამში 12 ტყვია – 9 ერთ და 3 მეორეს. თვითმხილველთა გადმოცემით, იგი რუს სტუმრებს მიზანმიმართულად ფეხებსა და საზარდულში ესროდა. გარდა ამისა, სროლისას ასხლეტილი ტყვიით თავად ფილიაც დაიჭრა.
ყველაზე საინტერესო ისაა, რომ ფილიას წინააღმდეგ სისხლის სამართლის საქმე მანამდეც იყო აღძრული და იგი დღე-დღეზე ელოდებოდა სასამართლოს. კერძოდ, ეს 43 წლის მამაკაცი მაისის შუა რიცხვებში იარაღის უკანონო შეძენა-შენახვა-ტარების ბრალდებით დააკავეს, თუმცა მეორე დღესვე გამოუშვეს გაუსვლელობის ხელწერილით. 4 ივნისს დე ფაქტო პროკურატურამ მის საქმეზე გამოძიება დაასრულა და მასალები დე ფაქტო სასამართლოს გადაუგზავნა.
როგორც „სპუტნიკს” დაზარალებულების მეგობარმა ვიტალი ვასენკომ განუცხადა, დაჭრილთაგან ერთ-ერთის მგდომარეობა განსაკუთრებით მძიმეა. ექიმების ინფორმაციით არცერთი მათგანის სიცოცხლეს საფრთხე არ ემუქრება, თუმცა შესაძლოა მიღებული ტრამვების გამო დაინვალიდდნენ.
ვასენკოს თქმით, ფილოიანი და სალიმგარიევი აფხაზეთში პირველად არიან. პანსიონატს 13 ივნისს ეწვივნენ და სამი დღით იქირავეს ნომერი. კონფლიქტი კი იმის გამო მოხდა, რომ კაფეში ფილია მათთან მივიდა და უთხრა, რომ მაგიდასთან მყოფი ქალბატონების გაცნობა სურდა.
„მათ არსად არანაირი კონფლიქტი არ ჰქონიათ, ისინი აფხაზეთში პირველად იყვნენ, ალკოჰოლური თრობის ქვეშ არ იყვნენ, ისინი უბრალოდ საღამოს კაფეში გავიდნენ დასასვენებლად და მათ პროვოცირება არ დაუწყიათ. ის (მსროლელი) მათ თავად მიუახლოვდა, პროვოკაცია დაიწყო, ამოიღო პისტოლეტი და სასტიკი სროლა დაიწყო,” – თქვა ვასენკომ.
აღსანიშნავია, რომ პანსიონატის დირექტორი იგორ აკალოვიჩი განსხვავებულ ვერსიას ყვება და მომხდარში პრაქტიკულად დაზარალებულებს ადანაშაულებს. მისი ცნობით, რუსეთიდან ჩასული სტუმრები გამომწვევად იქცეოდნენ და ხმაურის გამო მათ კაფეს სხვა სტუმრებმაც მისცეს შენიშვნა. მეტიც, აკალოვიჩის თქმით, ისინი პანსიონატში რეგისტრაციის დროსაც საეჭვოდ იქცეოდნენ.
„ჩვენი პანსიონატის სამედიცინო ბლოკში მათ ყურადღება მიიქციეს. მთავარმა ექიმმა თქვა, რომ მათ რაღაც ისე არ ჰქონდათ. შესაძლოა ეს რაიმე სახის ნერვული აშლილობა იყო, ან ნასვამ მდგომარეობაში იყვნენ, დანამდვილებით ვერ გეტყვით,” – თქვა იგორ აკალოვიჩმა.
მომხდარზე დე ფაქტო ხელისუფლებაში საგანგებო თათბირი გაიმართა. დე ფაქტო პრეზიდენტმა ასლან ბჟანიამ განაცხადა, რომ დამნაშავე მკაცრად უნდა დაისაჯოს. მანვე ე.წ. ძალოვან მინისტრებს მოსთხოვა ტურისტების უსაფრთხოებაზე კონტროლის გაძლიერება და ყველა ტურისტული ობიექტის მკაცრად შემოწმება იმის დასადგენად, თუ რამდენად ეფექტური დაცვის სამსახური ჰყავთ მათ და აქვთ თუ არა სათვალთვალო კამერები.
„შეხვედრას ესწრებოდნენ პრემიერ-მინისტრი ალექსანდრე ანქვაბი, პრეზიდენტის ადმინისტრაციის უფროსი ალხას კვიცინია, უშიშროების საბჭოს მდივანი სერგეი შამბა, გენერალური პროკურორი ადგურ აგრბა, შინაგან საქმეთა მინისტრი დიმიტრი დბარი, სახელმწიფო უსაფრთხოების სამსახურის თავმჯდომარე რობერტ კიუტი,” – წერს აფხაზური მედია.
როგორც დიმიტრი დბარმა რადიო „სპუტნიკს აფხაზეთთან” ინტერვიუში განაცხადა, ფილიას მინიმუმ ხუთი წლით პატიმრობა ემუქრება. იგი ამჯამად სოხუმის საავადმყოფოში მკურნალობს და გაძლიერებული დაცვის ქვეშ იმყოფება.