რუსთავის გუნდმა საქართველოს ჩემპიონობა 11-წლიანი პაუზის შემდეგ მოიგო.
ანატოლი ბოისას მთავარი მწვრთნელობით, რომელსაც ასისტენტობას მიხეილ ბერუაშვილი და ზურა მაჭავარიანი უწევდნენ, გუნდმა ფინალური სერიის მე-3 მატჩიც მოუგო “ცხუმ-აფხაზეთს” და 2010 წლის შემდეგ, პირველად, სუპერლიგის ჩემპიონი გახდა.
ჩემპიონობის მომტან მატჩში რუსთაველებს სუპერლიგის სეზონის საუკეთესო მოთამაშედ დასახელებულმა მაიკ დევისმა ულიდერა, რომელმაც 21 ქულა, 13 მოხსნა, 6 პასი და 4 ჩაჭრა დააგროვა. 30 ქულით ბომბარდირი მალიქ უაითი გახდა, ჯილან ვაშინგტონის ანგარიშზე კი 17 ქულა, 6 მოხსნა და 5 პასი აღმოჩნდა. ცხუმ-აფხაზეთში 22 ქულითა და 8 მოხსნით საუკეთესო იყო ალექსანდრე ფევაძე. 21 ქულა ჯოშუა მაკფოლმა მიითვალა, ტაილერ გრინის ანგარიშზე კი 17 ქულა, 8 მოხსნა და 4 პასი დაგროვდა.
დაჯილდოების ცერემონიალზე ცნობილი გახდა 2020-2021 წლების სეზონის სუპერლიგის საუკეთესო მოთამაშე – MVP. ჩატარებული გამოკითხვის შედეგად, რომელშიც მონაწილეობა მიიღეს სუპერლიგის გუნდების მწვრთნელებმა, სპორტულმა ჟურნალისტებმა, სუპერლიგის მსაჯთა კოლეგიამ და კომისრებმა მიიღეს, გაიმარჯვა რუსთავის გუნდის მოთამაშემ, მაიკლ დევისმა.
მაიკლ დევისს MVP-ის თასი გადასცა საქართველოს კალათბურთის მოთამაშეთა ასოციაციის თავჯდომარემ, ლაშა გამყრელიძემ.
სუპერლიგის საუკეთესო მწვრთნელი გახდა ანატოლი ბოისა,რომელსაც ცნობილი მწვრთნელის, გიორგი ავალიშვილის სახელობის თასი გადაეცა. ანატოლი ბოისა კალათბურთის ეროვნული ფედერაციის გენერალურმა მდივანმა, გიორგი ქართველიშვილმა დააჯილდოვა.
საქართველოს კალაბურთის ეროვნული ფედერაციის გენერალურმა სპონსორმა, კომპანია „აჭარაბეთმა” სუპერლიგის საუკეთესო მოთამაშისთვის და სუპერლიგის საუკეთესო მწვრთნელისთვის დააწესა ფულადი პრიზი, თითოეულს გადასცემს 3000 ლარს.
სუპერლიგის მე-2 ადგილის მფლობელი გახდა საკალათბურთო გუნდი „ცხუმ-აფხაზეთი“, რომელიც ვერცხლის მედლებით დააჯილდოვეს ვეტერანმა კალათბურთელებმა – გივი ბიჭიაშვილმა და ვლადიმერ ძიძიგურმა.
2020-2021 წლების სეზონის სუპერლიგის ჩემპიონი „რუსთავი” ოქროს მედლებით დააჯილდოვეს კალათბურთის ეროვნული ფედერაციის გენერალური მდივანმა – გიორგი ქართველიშვილმა და ფედერაციის პრეზიდენტმა პაატა გურასპაულმა.
„ვულოცავ სუპერლიგის მონაწილე გუნდებს 2020-2021 წლების სეზონის დასრულებას. სასიხარულოა, რომ პანდემიის მიუხედავად, ჩვენ ყველამ ერთად შევძელით სირთულეებისა და გამოწვევების დაძლევა, რათა წლევანდელი საკალათბურთო სეზონი ჩატარებულიყო.
მივულოცავ სუპერლიგის გამარჯვებულ რუსთავის გუნდს, მის ხელმძღვანელობას და მოთამაშეებს. ასევე, ყველა გულშემატკივარს და სპონსორებს, რომლებიც გვერდში უდგანან ქართულ კალათბურთს. განსაკუთრებით დიდ მადლობას გადავუხდი კალათბურთის ეროვნული ფედერაციის გენერალურ სპონსორს, კომპანია „აჭარაბეთს“, რომელიც ჩვენი თანამშრომლობის პირველივე დღიდანვე ჩაერთო კალათბურთში და მოთამაშეებთან ერთად უამრავი აქტივობა განახორციელა. ნებისმიერი ფინანსური მხარდაჭერა უმნიშვნელოვანესი და დიდი სტიმულია მოთამაშეებისთვის და ჩვენი ფედერაციისთვის, მით უფრო რომ წინ უმაღლესი რანგის ღონისძიების, ევრობასკეტ 2022-ის მასპინძლობა გველოდება.
მიუხედავად იმისა, რომ სეზონის განმავლობაში გულშემატკივარი ვერ ესწრებოდა ეროვნული ჩემპიონატის მატჩებს, დასაფასებელია, რომ ჩვენი სპონსორები პანდემიის პირობებშიც უჭერდნენ მხარს ქართულ კალათბურთს და მთლიანად სპორტს. იმედია, გულშემატკივრები დაბრუნდებიან დარბაზებში ეროვნულ ჩემპიონატებზე, რადგან ისინი პანდემიამდეც ძალიან აკლდნენ, როგორც კალათბურთის, ასევე სპორტის სხვადასხვა სახეობის შიდა ჩემპიონატებს და მათი მხარდაჭერა მოთამაშეებისთვის დიდი მოტივაციაა.“-განაცხადა საკალათბურთო სუპერლიგისა და ასაკობრივი ლიგების აღმასრულებელმა დირექტორმა გიორგი ზაბახიძემ.
