„კორონავირუსი საქართველოში: როგორ მოახერხეს ქვეყანაში აღდგომის შემდეგ COVID 19-ის აფეთქების თავიდან არიდება“ – სტატიას ამ სათაურით Deutsche Welle-ს რუსულენოვანი სამსახური აქვეყნებს.
ავტორი აღნიშნავს, რომ საქართველოში კავკასიაში კორონავირუსით დაავადებულთა და გარდაცვლილთა მაჩვენებელი რეკორდულად დაბალია და აღნიშნავს, რომ ექსპერტები მთავრობის მიერ გადადგმულ ნაბიჯებს „აქტიური რეაგირების მაგალითს“ უწოდებენ.
სტატიაში ასევე ნათქვამია, რომ ეპიდემიოლოგების დიდ ყურადღებას აღდგომის დღესასწაული იწვევდა, რადგან ღამის ლიტურგიასა და სასაფლაოებზე მასობრივი მისვლის შემთხვევაში, ეპიდემიის მკვეთრი აფეთქება გარდაუვალი იქნებოდა.
„საქართველოში ეკლესია ჯარის შემდეგ ყველაზე სანდო ინსტიტუტია და მთავრობის ქმედებებზე იყო დამოკიდებული, ხალხი რელიგიას აირჩევდა თუ მედიკოსების რეკომენდაციებს გაითვალისწინებდა“, – წერია სტატიაში.
ავტორი აღნიშნავს, რომ მთავრობა პატრიარქთან ტაძრების დაკეტვის შესახებ მოლაპარაკებებს თვეზე მეტხანს უშედეგოდ აწარმოებდა, ამიტომ პრემიერ-მინისტრი გიორგი გახარია პატრიარქთან კონფრონტაციაზე უნდა წასულიყო ან რისკების შემცირების სხვა გზა ეპოვნა.
სტატიაში აღნიშნულია, რომ კონფრონტაციის ვარიანტი გამორიცხულია, რადგან ეკლესიის პოზიციას ოქტომბრის არჩევნების შედეგზე პრაქტიკულად გადამწყვეტი გავლენა ექნებოდა, ამიტომ ხელისუფლება პატრიარქთან ურთიერთობას არ გააფუჭებდა.
„თავიდანვე ცხადი იყო, რომ ღია კონფლიქტზე არავინ წავიდოდა, რადგან ეკლესიის ავტორიტეტი საზოგადოებაში ძალიან მაღალია, – ამბობს ჰენრიხ ბიოლის ფონდის სამხრეთ კავკასიის განყოფილების ხელმძღვანელი შტეფან მაისტერი. – ამ პირობებში მთავრობამ შემოვლითი გზა იპოვა. კერძოდ – ნაბიჯ-ნაბიჯ მოქალაქეთა მობილობა შეზღუდა“, – წერს Deutsche Welle.
გამოცემა აღნიშნავს, რომ აღდგომამდე 1 კვირით ადრე საქართველოში 4 დიდი ქალაქი ჩაიკეტა, რათა ხალხი ნათესავებთან არ წასულიყო. დაიკეტა სასაფლაოები, ქალაქებში კი 5 დღით პირადი ტრანსპორტით მოძრაობა აიკრძალა, რის გამოც სააღდგომო ლიტურგიაზე დასწრების მსურველებს ტაძრებში ფეხით მისვლა და იქ 21:00 საათიდან 06:00 საათამდე დარჩენა მოუწიათ.
ავტორი მიიჩნევს, რომ ზომებმა გაამართლა, რადგან აღდგომიდან მეათე დღეს ქვეყანაში ინფიცირების 511 შემთხვევა დაფიქსირდა.
„ეს ნიშნავს, რომ მიღებულმა ზომებმა იმოქმედა, ამბობენ ექსპერტები. იმოქმედა შეზღუდვამ ადამიანის გადაადგილებაზე, ცალკეული მოძღვრების მოწოდებებმა, მედიკოსების ემოციურმა გამოსვლებმა, რომლებსაც ხელისუფლებამ რთულ სიტუაციაში აგიტატორების როლი ანდო. აპრილის ბოლო რიცხვებში პრემიერ-მინისტრმა გახარიამ შეზღუდვების რამდენიმე ეტაპად მოხსნის შესახებ განაცხადა“, – წერს ავტორი.
საქართველოში კორონავირუსი 610 ადამიანს დაუდასტურდა, აქედან 269 უკვე გამოჯანმრთელდა. ინფექციას სულ 9 ადამიანი ემსხვერპლა.