RT-ის მთავარმა რედაქტორმა მარგარიტა სიმონიანმა შეაქო ივანიშვილს:
“საქართველო შემაშფოთებლად სათანადოდ იქცევა. თითქოს ხანგრძლივი “ზაპოის” ან ფსიქოზის მდგომარეობიდან გამოვიდა, რასაც, ზოგადად, გულთბილად მივესალმები!”
“ივანიშვილის განცხადება “ისტორიულია” და მას თბილისის და მოსკოვის ურთიერთობა “ახალ დონეზე გადაჰყავს”, – თქვა კრემლის კიდევ ერთმა პროპაგანდისტმა, ნადანა ფრიდრიხსონმა.
“მობოდიშებისთვის მზადყოფნა ანადგურებს იმ შეგონებებს, რომლითაც 16 წელი ქართველების ცნობიერებას წამლავდნენ, რომ, თითქოსდა, რუსეთმა მოახდინა აფხაზეთისა და სამხრეთ ოსეთის ოკუპაცია,” – დაამატა მან.
“სააკაშვილის, შევარდნაძის, გამსახურდიას დანაშაულებრივი პოლიტიკის აღიარება – სამხრეთ ოსეთის დაბომბვისა და ეკონომიკური ბლოკადისთვის, ადამიანთა დახოცვისა და ეკონომიკური ზარალისთვის კომპენსაციის გადახდა და, რა თქმა უნდა, ოსური სახელმწიფოს დამოუკიდებლობის აღიარება. ამის შემდეგ შესაძლებელია, აბსოლუტურად, ცივილიზებული დიალოგი წართმეულ ქართულ სახელმწიფოსთან“, – წერს სამხრეთ ოსური “ტელეგრამარხი” «БОНВ[Ӕ]РНОН».
სოციალურ ქსელებში ოსები ძირითადად შემდეგი შინაარსის კომენტარებს წერენ:
- “საქართველომ ბოდიშის გარდა, უნდა გადაიხადოს მატერიალური და მორალური ზიანისთვის კომპენსაცია, აღიაროს სამხრეთ ოსეთის დამოუკიდებლობა და შემდეგ ჩვენ შეგვიძლია ვისაუბროთ მეზობლურ ურთიერთობებზე”
- “შეწყვიტეთ 1920-იანი წლების იგნორირება. მაშინ ჩვენ არანაკლებ ვიტანჯებოდით“.
- “რას ნიშნავს საკუთარ თავში ძალის პოვნა? საქართველომ უნდა აგოს პასუხი, რაც გააკეთა და აანაზღაუროს სამხრეთ ოსეთს და ოსებს მიყენებული ზიანი“.
ე.წ. სამხრეთ ოსეთის ოპოზიციური პარტიის “სამართლიანობისთვის“ განცხადებაში ვკითხულობთ:
“ქართული ნაციონალიზმის იდეოლოგიამ ძალიან ბევრი ოსური სისხლი დაიღვარა, ამიტომ უბრალოდ ბოდიშის მოხდა საკმარისი ვერ იქნება. ქართულმა მხარემ უნდა აღიაროს სამხრეთ ოსი ხალხის მიმართ ქართული სახელმწიფოს პოლიტიკის გენოციდური ხასიათი, ისევე, როგორც სამხრეთ ოსეთის რესპუბლიკის დამოუკიდებლობა“.
პარტია “ერთიანი ოსეთის“ თავმჯდომარემ აცამაზ ბიბილოვმა კი განაცხადა:
“საქართველოს ხელისუფლება არ იღებს ზომებს რეგიონში უსაფრთხოების ძირითად საკითხებზე და არაფერს აკეთებს სამხრეთ ოსეთთან საზღვრების დელიმიტაციისთვის. საქართველომ უნდა აღიაროს ოსების გენოციდი და სამხრეთ ოსეთის დამოუკიდებლობა, რათა ვისაუბროთ მისი განცხადებების გულწრფელობაზე“.
მან ასევე აღნიშნა, რომ წინასაარჩევნო პერიოდში ასეთი განცხადებები ხშირად კეთდება, მაგრამ რეალური ქმედება საქართველოს მხრიდან არ არის.
აფხაზი ჟურნალისტი ინალ ხაშიგი მიიჩნევს, რომ საქართველომ უნდა გააუქმოს “კანონი ოკუპაციის შესახებ“:
“ლოგიკური იქნება, თუ ივანიშვილის შემდეგი ნაბიჯი იქნება ბოდიში აფხაზებთან 1992 წლის აგვისტოში დაწყებული ომის გამო. გარდა ამისა, თუ ამ ლოგიკას მივყვებით, საქართველოს პარლამენტმა უნდა გააუქმოს ე.წ. კანონი “ოკუპაციის შესახებ“. იმედი მაქვს, რომ მონანიების პროცესი არ არის მხოლოდ იარაღი ივანიშვილისა და “ქართული ოცნებისთვის”, რათა გაუმკლავდნენ მათ მთავარ შიდაპოლიტიკურ მტერს, “ნაციონალურ მოძრაობას”, არამედ ეს არის გულწრფელი გაგება იმისა, თუ რა სახის უბედურება დაატრიალეს ქართველებმა”.
14 სექტემბერს, გორში, ბიძინა ივანიშვილმა გაიმეორა, რომ 2008 წლის აგვისტოს ომი იმჟამინდელი ხელისუფლების ბრალია და “ნაციონალურ მოძრაობას” მის “სატელიტებიანად” გაასამართლებს “ქვეყნის ღალატისთვის”, რის შემდეგაც მან გაახმაურა ახალი თეზისი: “აუცილებლად გამოვძებნით საკუთარ თავში ძალას, რათა ბოდიში მოვიხადოთ იმის გამო, რომ დავალების შესაბამისად, მოღალატე “ნაციონალურმა მოძრაობამ“ 2008 წელს ცეცხლის ალში გახვია ჩვენი ოსი დები და ძმები”.
წყარო: ამბები.ge
