24 წლის ანი და 18 წლის არტური სოფელ ეფრემოვკაში, იმ ფერმაში დაბრუნდნენ, რომლის მფლობელებიც მათზე ძალადობის და მუქარის ბრალდებით არიან დაკავებულები. და–ძმა ამბობს, რომ ისინი ტრეფიკინგის მსხვერპლი არ ყოფილან, შესაბამისად მწყემსის ჩვენება, რომელიც წლების განმავლობაში მათთან ერთად ცხოვრობდა და სამართალდამცავებმა საქართველო–სომხეთის საზღვრის გადაკვეთის დროს დააკავეს, სიმართლეს არ შეესაბამება.
შინაგან საქმეთა სამინისტროს სასაზღვრო პოლიციის თანამშრომლებმა, სამი პირის მიმართ ჩადენილი ტრეფიკინგის ბრალდებით, სოფელ ეფრემოვკაში მცხოვრები მამა–შვილი მიმდინარე წლის მარტში დააკავეს.
გამოძიების ინფორმაციით, ბრალდებულებმა 2015-016 წლებში სომხეთის რესპუბლიკის სამი მოქალაქე, კარგი სამუშაო პირობების დაპირებით, საქართველოში, სოფელ ეფრემოვკასთან მდებარე ფერმაში ჩამოიყვანეს, სადაც მუქარითა და იძულებით უწევდნენ შრომით ექსპლუატაციას. ჩამოართვეს პირადობის დამადასტურებელი დოკუმენტაცია და ანაზღაურების გარეშე, მრავალი წლის განმავლობაში ამყოფებდნენ მონობის თანამედროვე პირობებში.
სამართალდამცველებისთვის აღნიშნული დანაშაულის შესახებ მაშინ გახდა ცნობილი, როდესაც სომხეთის ერთ-ერთმა მოქალაქემ (მწყემსმა) ფერმიდან გაქცევა მოახერხა და საქართველოს სახელმწიფო საზღვრის უკანონოდ გადაკვეთას შეეცადა.
და–ძმა აღნიშნულ ინფორმაციას კატეგორიულად უარყოფს. მათი თქმით, ფერმაში კარგ პირობებში და საკუთარი ნებით მუშაობდნენ.
„მე და ჩემი ძმა ღამის 11 საათზე წაგვიყვანეს პოლიციაში. მე მითხრეს, რომ დაზარალებული ვარ. მკითხეს ძალით ხომ არ გამუშავებენო,მე კი ვუთხარი – არა. ავუხსენი, რომ მათი ვალი გვქონდა და ამიტომ იქამდე უნდა მემუშავა ეფრემოვკაში ვიდრე სრულად არ დავფარავდით. მონობაში არ ვყოფილვართ, პოლიციას აქვს ჩვენი პასპორტები და ნახოს, ბოლო ხუთი წლის განმავლობაში საქართველო–სომხეთის საზღვარი რამდენჯერმე გვაქვს გადაკვეთილი. ჩვენ არანაირი პრობლემა არ გვაქვს დამსაქმებელთან“, – აცხადებს „სამხრეთის კარიბჭესთან“ ანი.
და–ძმის თქმით, სიცრუეა ისიც, თითქოს ბრალდებულები მათ გადაადგილებას უზღუდავდნენ და მუდმივად აკონტროლებდნენ.
„ყოველ თვეს ვწერდით პროდუქტების სიას, რის მიხედვითაც ჩვენი უფროსი ბაზარში ყიდულობდა და მოჰქონდა. ჩვენ აქეთ მადლობლები ვართ, რადგან მანქანა არ გვყავს და აღარ გვიწევდა ქალაქში ავტობუსით წასვლა. ვკითხე პოლიციელს, რატომ ვარ დაზარალებული–მეთქი და მითხრა, საქართველოს კანონმდებლობით იმ ხელფასს, რომელსაც შენ იღებ ძალიან ცოტააო. გარდა ამისა, სომხეთის მოქალაქე ხარ, ხუთი წელია არალეგალურად მუშაობო“, – ამბობს ანი.
მისი თქმით, ანაზღაურებით კმაყოფილი იყო, რადგან დამსაქმებლის სახლში უფასოდ ცხოვრობდნენ და ყველაფრით უზრუნველყოფილნი იყვნენ.
„მე და ჩემი ძმა მწველავად ვმუშაობდით, 15-15 ძროხას ვწველიდით დღეში და თვეში ხელფასს 200 ლარს ვიღებდით, თანხა ყოველი თვის 17 რიცხვში გვერიცხებოდა. არანაირი მონობა და არანაირი უხელფასობა, სიცრუეა. მწყემსმა რაღაც მოიტყუა, მე მაწყობდა ის თანხა, რასაც მიხდიდნენ. ადამიანმა სახლი მომცა, საჭმელი, ვისი რა საქმეა მე 100 ძროხას მოვწველი თუ 200–ს, რომელი კანონი მიზღუდავს ამ შესაძლებლობას, რის საფუძველზე მეუბნებიან, რომ ტრეფიკინგის მსხვერპლი ვარ? მსგავსი მდგომარეობა, რომ ყოფილიყო ახლა მე აქ ისევ ამ სახლში ვიცხოვრებდი?“, – კითხულობს ანი.
ანის მსგავსად საუბრობს მისი ძმა არტურიც.
„იმ დღეს, რომელ დღესაც საზღვრის გადაკვეთა სცადა მწყემსმა ნასვამი იყო. მეც იქ ვიყავი, როცა ჩვენმა უფროსმა უთხრა, მაცადე მე თვითონ წაგიყვან მანქანითო, მაგრამ მაინც წავიდა. გამოძიებას, რომ უთხრა საბუთებს არ მაძლევდნენო ტყუილია, მან თავისივე ხელით მისცა პასპორტი უფროსს. თქვა, რომ ვსვამ და არსად არ დამეკარგოს შემინახეთო. ამას როგორ ახსნით, რომ ჩვენ არ გამოგვართვეს საბუთები და მხოლოდ მწყემსს ჩამოართვეს?!“, – კითხულობს არტური.
„სამხრეთის კარიბჭემ“ დაკავშირება მწყემსთანაც სცადა, მაგრამ ვერ შეძლო, იგი ამჟამად სოფელში არ იმყოფება. და–ძმა ამბობს, რომ მამაკაცი სამართალდამცავებმა თბილისში მდებარე ერთ–ერთ თავშესაფარში გადაიყვანეს.
ეფრემოვკაში მომხდართან დაკავშირებით წინასასამართლო სხდომა 5 მაისს გაიმართა, მორიგი პროცესი კი 22 ივნისსაა ჩანიშნული. დაკავებულების ოჯახის წევრს იმედი აქვს, რომ მორიგ სხდომაზე მამა–შვილს გაათავისუფლებენ:
„ყველა ბრალდება სიცრუეა, ბავშვებმაც სიმართლე თქვეს დაკითხვაზე, მწყემსმა რატომ მოიტყუა არ ვიცი. ჩემი მეუღლე და შვილი არაფრის გამო ორ თვეზე მეტია პატიმრობაში იმყოფებიან, გული მწყდება, მაგრამ რით დავეხმარო არ ვიცი“.
და–ძმა ამბობს, რომ ფერმის მეპატრონეებისგან აღებული ვალი სრულად დაფარეს, ამიტომ სასამართლო პროცესების დასრულების შემდეგ სომხეთში დაბრუნდებიან:
„ვალი იმიტომ გვქონდა, რომ წინასწარ ვთხოვდით ფერმის მეპატრონეს თანხას, ხან რაში გვჭირდებოდა, ხან რაში, ახლა დავფარეთ და წავალთ“.
და–ძმის უფლებებს ადვოკატი რამაზ ჩინძალაძე იცავს, როგორც იგი ამბობს, საქმეში ახლა ჩაერთო, ამიტომ რა განაცხადეს დაკითხვის დროს ანამ და არტურმა, მისთვის ამჟამად უცნობია:
“შეიძლება ითქვას, რომ საგამოძიებო მოქმედებები უკვე ამოწურულია. მომდევნო სხდომაზე, როცა მათ დაიბარებენ მეც დავესწრები სასამართლოს სხდომას და გავიგებ მეტ დეტალს. მე მხოლოდ დავესწარი მათი დედის გამოკითხვას, ის აცხადებს, რომ ფერმის მეპატრონეებთან პრეტენზია არ აქვს”.
სამი პირის მიმართ ჯგუფურად ჩადენილ ადამიანით ვაჭრობის (ტრეფიკინგის) ფაქტზე გამოძიება საქართველოს სისხლის სამართლის კოდექსის 143-ე პრიმა მუხლის მესამე ნაწილის „ბ“ და „ე“ ქვეპუნქტებით მიმდინარეობს.
დანაშაული 12-დან 15 წლამდე ვადით თავისუფლების აღკვეთას ითვალისწინებს. და–ძმის ჩვენების გამო, გადაკვალიფიცირდება თუ არა მუხლი, ამ ეტაპზე უცნობია, რედაქცია შსს–სგან პასუხს ელოდება.
