რა შემთხვევაში თავისუფლდება პირი ჯარიმის გადახდის ვალდებულებისგან, რას უნდა ითვალისწინებდეს გადაუხდელი ჯარიმების შემთხვევაში აღსრულების ეროვნული ბიურო და რა ვადებში ხდება ჯარიმის გადახდა ან გასაჩივრება?
ამ კითხვებით „პრაიმტაიმმა“ ახალგაზრდა იურისტთა ასოციაციის წარმომადგენელს შორენა ლოლაძეს მიმართა.
მისი თქმით, ჯარიმის გასაჩივრების ვადა ათი დღით, ხოლო გადახდის პერიოდი 30 დღითაა განსაზღვრული.
ჯარიმის გადახდას არ ექვემდებარებიან სოციალურად დაუცველი სტატუსის მქონე პირები.
„საკარანტინო რეჟიმის გამო, დისტანციურად ვმუშაობთ და ამდენად, მომართვიანობის შესახებ ზუსტ სტატისტიკას ვერ დავასახელებ,
მაგრამ დაახლოებით, რამდენიმე ათეულმა მოქალაქემ უკვე კონსულტაციის მიღების მიზნით, მოგვმართა.
მათ შორის არიან ისეთები, ვისაც სამართლებრივი არგუმენტები არ აქვთ. არგუმენტები ძირითადად გადამხდელუნარიანობას ეხება.
ზოგიერთი ამბობს, რომ სოციალურად დაუცველის სტატუსი აქვს. ზოგიერი აცხადებს, რომ პანდემიის გამო, სამუშაო დაკარგა და შესაბამისად, ჯარიმის გადახდის საშუალება არ აქვთ.
მომართვიანობის დროს, იყო ერთი შემთხვევა, როცა მოქალაქე იმის გამო დააჯარიმეს, რომ მარტოხელა მეზობელი ყვიროდა და დახმარებას ითხოვდა.
ჯანმრთელობის მდგომაროების გაუარესების გამო, ეს ადამინი გარეთ გამოვიდა და სასწრაფო დახმარების ბრიგადა გამოიძახა, რომელსაც პატრული მოყვა და ეს პირი დააჯარიმეს.
ამგვარი აბსურდთან მიახლოებული შემთხვევაც არის.
არის დაჯარიმებული პირი, რომელიც კომენდანტის საათის ამოქმედებიდან ორი წუთის დაგვიანების გამო, ჯარიმა გამოუწერეს.
– რა ვადა ეძლევათ დაჯარიმებულ პირებს ჯარიმის გადახდისა და გასაჩივრებისთვის?
– დღეიდან განახლდა ჯარიმის გასაჩივრების 10 დღიანი ვადა. ამ პერიოდში ადამიანებმა, რომლებიც ჯარიმას არ ეთანხმებიან, უნდა გაასაჩივრონ.
განხილვის პერიოდში ჯარიმის გადახდის ვადა შეჩერებულად ითვლება. ისინი, ვინც არ აპირებენ გასაჩივრებას, მათ ეძლევათ 30 კალენდარული დღე ჯარიმის გადასახადისთვის.
– დაერიცხებათ თუ არა და რა ოდენობით საურავები, ვინც ჯარიმის გადახდას ვერ შეძლებს?
– მინდა, ხაზგასმით აღვნიშნო, რომ შემდეგი განმარტება ჩვენი ხედვაა და არ გვსურს, ადამიანები შეცდომაში შევიყვანოთ.
მიგვაჩნია, რომ დაჯარიმებულ პირებს საურავები არ დაერიცხებათ, რადგან სამართალდარღვევათა კოდექსი ამ ტიპის ჯარიმებს არ ითვალისწინებს.
საგანგებო მდგომარეობის დროს დაჯარიმება მოხდა პრეზიდენტის დეკრეტის საფუძველზე, სადაც ჩანაწერის სახით საურავზე არაფერია ნათქვამი. ამიტომ, დაჯარიმებულ პირებს საურავი არ უნდა დაერიცხოთ.
– გადაუხდელობის შემთხვევაში სოციალურად დაუცველი პირების ქონება დაყადაღებას ექვემდებარება?
– ის ადამიანები, რომლებიც სოციალურ შემწეობას იღებენ, მათი ქონება დაყადაღებას არ ექვემდებარება.
– რამდენად შესაძლებელია იმ ადამიანების გათავისუფლება ჯარიმის გადახდის ვალდებულებისგან, რომლებსაც საარსებო მინიმუმთან გათანაბრებული ხელფასი აქვთ?
– პრაქტიკაში გვქონია შემთხვევა, როცა საარსებო მინიმუმთან გათანაბრებული შემოსავალი აღმასრულებელს დაუყადაღებია.
წესით, საარსებო მინიმუმის თანხა ხელშეუხებლად უნდა დარჩეს კონკრეტული პირისთვის ხელმისაწვდომი.
არის შემთხვევები, როცა დასაქმებულ მოქალაქეს მზრუნველობაში ჰყავს შრომის უუნარო მშობლები ან არასრულწლოვანი შვილები და მათი საარსებო მინიმუმი უნდა ანგარიშდებოდეს, თუმცა ასეთი პრაქტიკა არ არსებობს.
– დაჯარიმებული პირების უმრავლესობა რა სახის სამართალდარღვევის ფაქტებზე საუბრობენ?
– ფიზიკური პირები ძირითადად, კომენდანტის საათის დარღვევის ფაქტებზე საუბრობენ.
ხოლო ინდ. მეწარმეები და პატარა მაღაზიები წესების დარღვევაზე: ხელთათმანის გარეშე ფულთან შეხება, პირბადის გარეშე მაღაზიაში მყიდველის შეშვება და ა.შ.
შეგახსენებთ, დღეიდან, საგანგებო მდგომარეობის დროს დაწესებული ჯარიმებისა და საურავების გადახდაზე საშეღავათო პერიოდი გაუქმდა.
primetime.ge
