მერებაშვილისა და შაქარაშვილის საქმეებში ერთი და იგივე პროკურორი ფიგურირებს, რის შესახებაც
“ლელოს” ლიდერებმა ანა ნაცვლიშვილმა და კახა კოჟორიძემ დღეს გამართულ ბრიფინგზე ისაუბრეს და 2018 წლის 6 ივლისს მოკლულ თორნიკე მერებაშვილის გამოუძიებელ საქმესთან დაკავშირებით საზოგადოებას კიდევ ერთხელ აცნობეს, რომ საგამოძიებო ორგანოებს საქმე არასწორი მიმართულებით მიჰყავთ. მერებაშვილის რეალური მკვლელი თავისუფალია, ხოლო სასჯელს ის ადამიანი იხდის, რომლის ბრალეულობაც არ დასტურდება.
“ლელოს” ერთ-ერთი ლიდერის, ანა ნაცვლიშვილის თქმით, მერებაშვილისა და შაქარაშვილის საქმეებში ერთი და იგივე პროკურორი ფიგურირებს, რაც სისტემის გაუმართაობაზე მეტყველებს:
“იმის ნაცვლად, რომ თორნიკეს მკვლელობის საქმე გამოიძიონ და დამნაშავე პირები პასუხისმგებლობაში მიეცნენ, გამოძიება დაკავებულია საქმის გაყალბებით. ეს საქმე სხვა საქმეებისგან განსხვავდება იმითაც, რომ არ მტკიცდება იმ ადამიანის დანაშაული, რომელიც დამნაშავედ ცნეს და ციხეში ზის, ნამდვილი მკვლელი კი დღემდე დაუსჯელია. სახელმწიფოს მხრიდან არასწორად ჩატარებული გამოძიების გამო მშობლები ვერ იღებენ სამართალს. ეს არის წარმოუდგენელი ბოროტება, რომელიც შექმნა ხელისუფლებამ. მერებაშვილის საქმეში ყველა დეტალი მოწმობს იმაზე, რომ არ ჩატარებულა გამოძიება, რომელიც დაადგენდა სიმართლეს. “შეკერეს” საქმე და მშობლებს და საზოგადოებას აჩეჩებენ სიცრუეს. მერებაშვილისა და გიორგი შაქარაშვილის საქმის პროკურორი ერთი და იგივე ადამიანია, რაც მიუთითებს იმაზე, რომ საქმის გამყალბებელ ადამიანებს სისტემა აწინაურებს და უფრთხილდება, ეს პროკურორი არის ნანა გუგუტიშვილი,”- განაცხადა ანა ნაცვლიშვილმა.
“უამრავი მტკიცებულების მიუხედავად, რომელიც თორნიკე მერებაშვილის საქმეში ფიგურირებს, გამოძიება მიდის არასწორი გზით, საქმეს შეგნებულად აყალბებენ”-ამის შესახებ ბრიფინგზე “ლელოს” ერთ-ერთმა ლიდერმა კახა კოჟორიძემ განაცხადა.
“ნაცვლად იმისა, რომ თორნიკე მერებაშვილის საქმე გამოეძიებინათ, რეალური ფაქტები დამალეს, სიყალბის მცდელობით, მშობლებს სამართლის მიღების საშუალებას არ აძლევენ და მათი შვილის მკვლელს არ იჭერენ. მე მაქვს სამხარაულის ორი დასკვნა, რომელიც 2018-2019 წლებში გაიცა. ორივე დასკვნა ერთმანეთს ეწინააღმდეგება, რადგან დამოუკიდებელი ექსპერტის დასკვნა სამხარაულის დასკვნას უარყოფს. ოჯახმა და მათმა ადვოკატმა არაერთი საჩივარი დაწერეს, თუმცა საქმე დღემდე გამოუძიებელია. პრემიერ-მინისტრმა გიორგი გახარიამ დაღუპულის მშობლებს უთხრა, რომ პირად კონტროლზე აიყვანა საქმე, მათი პირადი კონტროლი კი საქმის ერთპიროვნულად გაყალბებას ნიშნავს,”-განაცხადა კახა კოჟორიძემ.
შეგახსენებთ, რომ 18 წლის თორნიკე მერებაშვილი გორი-მეჯვრისხევის გზაზე, სოფელ ხელთუბნის მონაკვეთზე 2018 6 ივლისს გარდაცვლილი იპოვეს. იმ დროს შინაგან საქმეთა სამინისტროს ინფორმაციით, გამოძიება სისხლის სამართლის კოდექსის 115-ე მუხლით მიმდინარეობს, რაც თვითმკვლელობამდე მიყვანას გულისხმობს.
შეგახსენებთ, თორნიკე მერებაშვილი გორი-მეჯვრისხევის გზაზე, სოფელ ხელთუბნის მონაკვეთზე 6 ივლისს გარდაცვლილი იპოვეს. ოჯახის ინფორმაციით, გარდაცვალებამდე თორნიკემ ბიძაშვილს დაურეკა და უთხრა, რომ დაჭრილი იყო და დახმარება სჭირდებოდა. მშობლები აცხადებდნენ, რომ მათი შვილი ავტოავარიის შედეგად არ დაღუპულა, იგი სასიკვდილოდ დაჭრეს, რის შემდეგაც ავარიის ინსცენირება მოხდა. მერებაშვილები პოლიციას დამნაშავეების მფარველობაში ადანაშაულებდნენ. გარდაცვლილის ოჯახის წევრებმა და ნათესავებმა ობიექტური გამოძიების ჩატარების მოთხოვნით თბილისი-სენაკი-ლესელიძის საავტომობილო გზაც კი გადაკეტეს.
