გუშინ პარლამენტში საქართველოს პრემიერ მინისტრს ირაკლი ღარიბაშვილს უსმენდნენ. სხდომა ხმაურისა და სიტყვიერი დაპირისპირებების ფონზე მიმდინარეობდა. არაერთი შეურაცხმყოფელი რეპლები გააკეთა თავად პრემიერმა ტრიბუნიდან,რის გამოც მან საზოგადოებას ბოდიში მოუხადა. პრემიერს გამოსვლის შემდეგ სიტყვით დეპუტატებმა მიმართეს. მათი გამოსვლები მწვავე და კრიტიკული იყო.
„მე პირადად, ერთი ადამიანი და ჩემთან ერთად ძალიან ბევრი სხვა ადამიანი, მათ შორის ის, ვინც საქართველოს მომავალს უყურებს პერსპექტივით ევროპაში, გავაკეთებთ ყველაფერს, რომ ბიძინა ივანიშვილი, რომელიც ევტუშენკოვს ეჭუკჭუკება, ბიძინა ივანიშვილი, რომელიც არის ოლიგარქი და საქართველოს ინტერესების საწინააღმდეგოდ ერევა ინსტიტუტების საქმიანობაში, ბიძინა ივანიშვილი, რომელიც განკარგავს ამ ადამიანებს, რომლებიც ამ ლოჟაში სხედან [პრემიერი და მთავრობის წევრები], ბიძინა ივანიშვილი, რომელიც მოხვდა ევროპარლამენტის რეკომენდაციაში, რომ დასანქცირდეს. გავაკეთებ ყველაფერს იმისთვის, რომ საქართველოში არასდროს აღარ იყოს ერთპიროვნული მმართველობა. გავაკეთებთ ყველაფერს იმისთვის, რომ პირველ რიგში თქვენს შვილებს, ჩემს შვილებს, ჩემი მეგობრის შვილებს და ჩვენს ყველა თანამოქალაქეს, ვინც გარეთ არის, არასდროს მოუწიოს ევროპული მომავლის დაცვა მეორედ. ამიტომ, ჩემო ძვირფასო თანამოქალაქეებო, ძმებო, დებო, შვილებო, სტუდენტებო, ყველას, ვინც ვიყავით 20 ივნისს, უნდა გესმოდეთ, რომ ამ ადამიანების საუბარს აზრი არ აქვს. აზრი აქვს იმას, რასაც თქვენ იტყვით, როდესაც გამოხვალთ და საქართველოს ევროპულ მომავალს დაიცავთ“, – განაცხადა ხატია დეკანოიძემ.
საერთოდ რა გაცინებთ? ერთი ღატაკი, გაუბედურებული ქვეყნის პრემიერი ხართ – როდესაც პრემიერის საეტაპო სიტყვა იწყება ისე, რომ ჩვენი სიძულვილით ხართ განმსჭვალული, არ შეიძლება პრემიერი გერქვათ, თქვენ ქვეყანას დაღუპავთ , – ასე მიმართა „ერთიანი ნაციონალური მოძრაობის“ დეპუტატმა, ეკა ხერხეულიძემ პარლამენტის პლენარულ სხდომაზე პრემიერ-მინისტრ ირაკლი ღარიბაშვილს.
თქვენ დღეს თავი დაიმცირეთ და ანახეთ საზოგადოებას, რომ ხართ ძალიან სუსტი და პოლიტიკურად ხეიბარი პრემიერ-მინისტრი! პოლიტიკური ინტუიცია მკარნახობს, რომ საქართველოს პარლამენტში, დღეს, აი ამ ტრიბუნაზე, თქვენი პრემიერ-მინისტრის სტატუსით ალბათ ბოლო გამოსვლა იყო, – ასე შეაფასა პარტია “საქართველოსთვის” წევრმა, დეპუტატმა შალვა კერესელიძემ პარლამენტში პრემიერ-მინისტრის სიტყვით გამოსვლა.
„ნაციონალური მოძრაობის” დეპუტატის გიორგი ბოტკოველის განცხადებით, დღეს პრემიერ-მინისტრმა ირაკლი ღარიბაშვილმა უკრაინაში რუსეთთან ომში მყოფ ქართველ მებრძოლებს „დაქირავებული“ უწოდა.
„ბატონო პრემიერო, იცით ვინ არიან ეს ადამიანები? ისინი დაქირავებული ადამიანები არ ყოფილან. ეს ადამიანები, გათავისებული თავისი შეგნებით წავიდნენ იქ და იბრძოდნენ არა მარტო უკრაინის თავისუფლებისთვის, არამედ ჩვენი ქვეყნის თავისუფლებისთვისაც. სწორედ ამ ადამიანების პატივისცემის ვალდებულება გააჩნია თითოეულ ჩვენგანს. თქვენ მათ დღეს „დაქირავებული ადამიანები“ უწოდეთ. ამ ადამიანების უმეტესობა 2008 წლის გმირია, მათი უმრავლესობა საქართველოს თავისუფლებისთვის ძალიან ბევრი ომის მონაწილეა. ახლა მინდა ყველას მოგიწოდოთ, წუთიერი დუმილით პატივი მივაგოთ ამ ადამიანებს“, – განაცხადა ბოტკოველმა.
„დღეს აქ დაგიდეთ ის 13 პუნქტი, რომელსაც ევროკავშირი თქვენ გისახავთ, მაგრამ ამასთან დაკავშირებით არცერთი სიტყვა არ გითქვამთ. რაც ყველაზე სამწუხაროა, სიმართლე არის ის, რომ ევროკავშირი არ გინდათ. სიმართლე არის ის, რომ ამ თვეების განმავლობაში ყველაფერი გააკეთეთ, რომ ევროკავშირს უარი ეთქვა; სიმართლე არის ის, რომ ევროპელ პარტნიორებს ესხმოდით თავს, რათა მათ უარი ეთქვათ საქართველოსთვის ევროინტეგრაციაზე; მიზანმიმართულად ისეთ კანონებს იხილავდით პარლამენტში დაჩქარებული წესით, რომ ევროკავშირს უარი ეთქვა; აკავებდით ადამიანებს იმისთვის, რომ ევროკავშირს უარი ეთქვა საქართველოსთვის და რაც ყველაზე მთავარია, ეს ყველაფერი გეოგრაფიას დააბრალეთ.
ბატონო ირაკლი და „ქართული ოცნების“ სხვა წევრებო – ეს გეგმა, ეს შეთქმულება საქართველოს ეროვნული ინტერესების წინააღმდეგ ვერ შესრულდება, კოვზი ნაცარში ჩაგივარდათ. იმის გარანტი, რომ ეს შეთქმულება ვერ შესრულდება, არის ის 100 ათასზე მეტი ადამიანი, რომელიც 20 ივნისს შეიკრიბა, ასევე ის ათასობით ადამიანი, რომელიც 24 ივნისს გამოვა ქუჩაში და გაგცემთ პასუხს – გაგცემთ პასუხს იმ ღვარძლსა და სიძულვილის ენაზე, რაც დღეს პარლამენტში იყო“,- განაცხადა გიორგი ვაშაძემ.
თქვენ, ბატონო პრემიერო, გაქვთ შანსი თქვენს თანაგუნდელებთან ერთად, რომ შექმნათ მყარი გარანტიები სამართლიანი არჩევნების ჩატარებისთვის და თუ ამას ვერ შეძლებთ, იცოდეთ, რომ თქვენ მოგიწევთ ხელისუფლების დატოვება არჩევნების გარეშე – იცოდეთ, რომ ამოიწურება თქვენი დრო პოლიტიკაში. ქართულ პოლიტიკაში „ოცნების“ დრო იწურება. ვადაგასული პოლიტიკის დრო საქართველოში უნდა დასრულდეს, რადგან ვადაგასული ყველაფერი არის სახიფათო, – ასე მიმართა უფრაქციო პარლამენტის წევრმა, არმაზ ახვლედიანმა პლენარულ სხდომაზე პრემიერ-მინისტრს, რომელმაც ყოველწლიური მოხსენება წარადგინა.
დეპუტატის განცხადებით, ირაკლი ღარიბაშვილს მიაჩნია, რომ ყველა დამნაშავეა მის გარდა, რასაც არაადეკვატურობა ჰქვია.
„ჩვენი წინაპრები, ათეულობით მილიონი ქართველი რასაც შეეწირა, რომ ვყოფილიყავით დიდი ქრისტიანული და ცივილიზებული სამყაროს ნაწილი, ამას უარს ვეუბნებით. ვამბობთ, რომ გვირჩევნია ერთმანეთი ვლანძღოთ, ვთათხოთ, ზიზღი ვაფრქვიოთ ერთმანეთის წინააღმდეგ და ამით გაახაროთ არა ჩვენი მეგობრები ევროპაში, არამედ რუსები. ალბათ, დღეს ყველაზე ბედნიერები იყვნენ ლავროვი, პუტინი, მარია ზახაროვა და სხვები, რომ ზუსტად ის ხალხია, არანაირი დასკვნის გამოტანა არ შეუძლია, მარტო ერთმანეთის საჯიჯგნად არიან მაგრებიო. დღეს განმიმტკიცდა ის აზრი, რაც სულ მაქვს, რომ ქართული საზოგადოება 10 ათასი თავით გვჯობია ყველას ერთად აღებულ მთელ ქართულ პოლიტიკურ სპექტრს და ყველა პოლიტიკოსს. ქართულ საზოგადოებას ზუსტად ესმის, რას ეუბნებიან ევროპიდან. ქართული საზოგადოება მზად არის, რომ პოლარიზაცია დაასრულოს, დაასრულა კიდეც 20 ივნისს. ათასნაირი ხალხი იქ, ყველა სხვადასხვა პარტიის მხარდამჭერი ან ისეთებიც იყვნენ, დასანახად რომ ვერ გვიტანენ პოლიტიკოსებს და პარტიებს, მაგრამ ყველა გვერდი-გვერდ იდგა“,- განაცხადა ალეკო ელისაშვილმა.