პარლამენტის არჩეული დეპუტატის, არმაზ ახვლედიანის განცხადებით, თუ „ქართული ოცნება“ შარლ მიშელის შემოთავაზებულ დოკუმენტს ხელს მოაწერს და შესაბამისად, მის პირობებს შეასრულებს, მზადაა დოკუმენტს ხელმოწერით თავადაც შეუერთდეს და პარლამენტში შევიდეს.
როგორც ახვლედიანმა განაცხადა, ყოველგვარ პარტიულ ინტერესზე მაღლა საქართველოს ინტერესი დგას.
”ნაციონალური მოძრაობის“ ერთ-ერთი ლიდერი, სალომე სამადაშვილი მიიჩნევს, რომ ევროპული საბჭოს პრეზიდენტის, შარლ მიშელის მიერ შეთავაზებული დოკუმენტი კომპრომისული ვარიანტია და კომპრომისებზე ოპოზიციაც უნდა წავიდეს.
როგორც სამადაშვილმა „ინტერპრესნიუსს“ განუცხადა, საკითხზე „ნაციონალურმა მოძრაობამ“ გაფართოებულ ფორმატში, პოლიტსაბჭოს სხდომზე უნდა იმსჯელოს.
„მიმაჩნია, რომ პარტიამ უნდა იმსჯელოს ამ საკითხზე უფრო გაფართოებულ ფორმატში, უნდა მოიწვიოს პოლიტსაბჭოს და არჩეული დეპუტატების სხდომა. ეს არის ისეთი საკვანძო საკითხი, რომელზეც მსჯელობაა საჭირო. მე არ ვიცი ყველას აზრი, მაგრამ ვფიქრობ, რომ ეს უნდა იყოს პარტიის სტრუქტურის მიერ შესაბამისი მსჯელობის შედეგად მიღებული გადაწყვეტილება იმიტომ, რომ ეს არის საკვანძო გადაწყვეტილება პარტიის საქმიანობაში. ვფიქრობ, ყველას აქვს საკუთარი აზრის გამოხატვის უფლება, დააფიქსიროს საკუთარი პოზიცია ამ დოკუმენტზე ხელმოწერასთან დაკავშირებით. ალბათ, ყველა შედეგი ხელმოწერის გადაწყვეტილების თუ ხელმოწერაზე უარის თქმის სწორად უნდა იქნას გაანალიზებული“, – განაცხადა სამადაშვილმა.
რაც შეეხება უშუალოდ დოკუმენტში მოცემულ საკითხებს, როგორც სამადაშვილი აღნიშნავს, ვადამდელ არჩევნებთან დაკავშირებით მისი პოზიცია პლებისციტისკენ იხრება, თუმცა, ვადამდელ არჩევნებზე საკითხის მიბმაც კომპრომისული ვარიანტია.
„ლელო საქართველოსთვის” თავმჯდომარის მამუკა ხაზარაძის განცხადებით, მედიატორების მიერ შედგენილი დოკუმენტი კომპრომისულია, თუმცა არის დაუზუსტებელი საკითხები, მათ შორის ნიკა მელიას თემა.
როგორც ხაზარაძემ პოლიტსაბჭოს სხდომამდე ჟურნალისტებს განუცხადა, ის ფაქტი, რომ „ქართული ოცნება” ხელს არ აწერს დოკუმენტს, არის ლუსტრაცია, რომ მათ შეთანხმება არ უნდათ.
„დღეს პოლიტსაბჭოზე გვექნება ამ დოკუმენტის განხილვა. ეს დოკუმენტი არის მაქსიმალურად შეჯერებული და აქ გათვალისწინებულია ყველა მხარის პოზიცია. ის ფაქტი, რომ „ოცნება“ ხელს არ აწერს დოკუმენტს, არის ლუსტრაცია, რომ მათ არ უნდათ შეთანხმება და ეს ნათლად მეტყველებს იმ ფაქტზე, რომ „ქართულ ოცნებას” ქვეყანაში არსებული მძიმე მდგომარეობის გახანგრძლივება უნდა.
„ლელოს” ერთ-ერთი ლიდერის ბადრი ჯაფარიძის განცხადებით, მედიატორების მხრიდან ახალი დოკუმენტის გაკეთება „ქართული ოცნებისთვის” სილის გაწვნაა და მათ აქამდე არსებულ დოკუმენტს ხელი იმიტომ მოაწერეს, რომ სხვა დოკუმენტი არ ყოფილიყო.
როგორც ჯაფარიძემ ჟურნალისტებს განუცხადა, ახალი დოკუმენტი “ლელოსთვის” მისაღებია, თუმცა გარკვეული საკითხები, მათ შორის ამნისტიის პუნქტი, დაუზუსტებელია.
„ეს არის განსხვავებული დოკუმენტი, რასაც „ქართულმა ოცნებამ” ხელი მოაწერა. ვფიქრობ, ამ დოკუმენტის გაკეთება პრაქტიკულად სახეში სილის გაწვნაა „ქართული ოცნებისთვის”, რომელმაც დოკუმენტზე, რომელიც არ წარმოადგენდა შეჯერებულ შეთანხმებას, წინსწრებით მოაწერა ხელი იმისთვის, რომ არ ყოფილიყო სხვა დოკუმენტი. ვხვდებით, რომ „ქართული ოცნების” მხრიდან ხელის მოწერა იმ დოკუმენტზე, რომელიც იყო სამუშაო ვერსია, ემსახურებოდა იმას, რომ იქნებ არ გაკეთებულიყო სხვა დოკუმენტი.
შეიძლება ის პუნქტები, რომელიც რიგგარეშე არჩევნებს ეხება, ისე არ გამოიყურება, როგორც ჩვენ ვისურვებდით, მაგრამ სწორედ ესაა კომპრომისი, რათა ჩვენმა საერთაშორისო პარტნიორებმა დაინახონ საყრდენი ოპოზიციის სახით. ამიტომ ჩვენ მხარს ვუჭერთ ამ დოკუმენტს და ვფიქრობთ, ის მოიპოვებს ფართო მხარდაჭერას.
მელიას გამოსვლა საპატიმროდან იქნება აუცილებელი იმისთვის, რომ ჩვენ პარლამენტში მუშაობა დავიწყოთ. ასევე მინდა ხაზი გავუსვა იმას, რომ დაუზუსტებელია ამნისტიასთან დაკავშირებული პუნქტი იმიტომ, რომ ის უნდა შეეხოს მხოლოდ იმ მუხლებს, რომლითაც აღძრული იქნა საქმე აქტივისტების წინააღმდეგ. ეს ვერ შეეხება იმ დანაშაულებს, რაც ეხება უკანონო ბრძანების გაცემას და ამის გამო ადამიანების დასახიჩრებას, ეს არის დეტალი, რომელიც დაზუსტებას მოითხოვს. სხვა მხრივ ვფიქრობთ, ეს არის მნიშვნელოვანი ნაბიჯი იმ დოკუმენტთან შედარებით, რომელიც ბატონმა დანიელსონმა დატოვა და შესაბამისად, ეს დოკუმენტი „ლელოს” მხარდაჭერას, დიდი ალბათობით, მიიღებს”,- განაცხადა ჯაფარიძემ.
შარლ მიშელის შეთანხმების დოკუმენტს ჩვენ ხელი უკვე მოვაწერეთ. რაც შეეხება ახალ ვარიანტს, ჩვენთვის საერთოდ გაუგებარია, რატომ არსებობდა ახალი ვარიანტის შემოთავაზების საფუძველი, – ასე პასუხობს „ქართული ოცნების” დეპუტატი გურამ მაჭარაშვილი კითხვას, მოაწერს თუ არა მმართველი პარტია ხელს იმ დოკუმენტს, რომელიც ევროკავშირის წარმომადგენლობაში პოლიტიკურ გაერთიანებებს გუშინ შესთავაზეს.
მაჭარაშვილის განცხადებით, ახალი ვარიანტი საჭირო საერთოდ არ იყო.
მე მხარს ვუჭერ, რომ ოპოზიციამ ხელი მოაწეროს შარლ მიშელის დოკუმენტს, ოღონდ პარლამენტის ბოიკოტი შეწყდეს მაშინ, როცა ნიკა მელია დატოვებს საპატიმროს, – ამის შესახებ ოპოზიციონერი გიგი უგულავა სოციალურ ქსელში წერს.
მისივე თქმით, ცალსახაა, რომ ბოიკოტი აღარაა საკმარისი საფუძველი მრავალფეროვანი და ერთმანეთისგან განსხვავებული ოპოზიციის ერთიანობისთვის.
„ხელმოწერა არმოწერა – საკითხავი აი, ეს არის. არსებობს მომენტი, როცა უნდა იგრძნო, რომ სტრატეგიული მიზნების მისაღწევად ტაქტიკური ცვლილებებია საჭირო. ქართულმა ოპოზიციამ დიდი რამ შეძლო. მან ბოიკოტით ქვეყნის ივანიშვილის უკანა ეზოდ გადაქცევის საფრთხე გააცამტვერა. „ოცნებას“ ეგონა, რომ პანდემიის პირობებში არავინ ამ აღვირახსნილ, ფალსიფიცირებულ არჩევნებს ყურადღებას არ მიაქცევდა. ის მწარედ შეცდა. მთელმა საქართველომ დაინახა, რომ ქვეყანა არაა დატოვებული გონიერებისგან დაცლილი ოლიგარქის და მისი ყურმოჭრილი ამალის ამარა. სწორედ ეს იძლევა სამომავლოდ შეშლილი ოლიგარქის მოშორების იმედს. ახლა ჯერი ჩვენზეა. რამდენად ვიქნებით გამბედავები და საკუთარი სიტყვის მძევლობაში არ აღმოვჩნდებით.
ჩემი აზრით, დადგა დრო ოპოზიცია პოლიტპატიმარ მელიას გარშემო გაერთიანების შემდეგ, გაერთიანდეს თბილისის მერობის ერთიან კანდიდატ მელიას გარშემო. ამისათვის მე მხარს ვუჭერ, რომ ოპოზიციამ ხელი მოაწეროს შარლ მიშელის დოკუმენტს, ოღონდ პარლამენტის ბოიკოტი შეწყდეს მაშინ, როცა ნიკა მელია დატოვებს საპატიმროს. წარმოუდგენელია ერთდროულად ოპოზიცია იჯდეს პარლამენტში, ხოლო მელია – ციხეში.
ამასთანავე, სრულიად ცალსახაა, რომ ბოიკოტი აღარაა საკმარისი საფუძველი მრავალფეროვანი და ერთმანეთისგან განსხვავებული ოპოზიციის ერთიანობისთვის. ჩვენ ერთობის ახალი საფუძვლები გვჭირდება. ერთობის ეს ტესტი ჩვენ თავიდან უნდა ჩავაბაროთ. ამისთვის ერთობის ახალი საფუძვლები უნდა ვიპოვოთ. ასეთი, ჩემის აზრით, უნდა იყოს: ოპოზიციის ხედვა და გეგმა. ოპოზიციის მოთხოვნა უცვლელია – რიგგარეშე სრულად პროპორციული საპარლმენტო არჩევნები.
ჩვენ ხშირად გვავიწყდება და მარტო რიგგარეშე არჩევნებს ვახსენებთ. არადა ჩვენი მიზანი რიგგარეშე, სრულად პროპორციული არჩევნებია. შეგახსენებთ, მხოლოდ რიგგარეშე არჩევნები 120/30 პრინციპით ჩატარდება და ვერავინ გადამარწმუნებს, რომ იგივე შეცდომებისგან ვიქნებით დაზღვეული. ისევ ამ 30 მაჟორიტარში ავიბლანდებით, – ამ ივანიშვილის მიერ ჩატოვებულ ბოროტებაში. ეს კატეგორიულად დაუშვებელია“, – აღნიშნა უგულავამ.
ეს არის ის ვარიანტი, რომელზეც ხელის არმოწერა არ შეიძლება – ეს არის შანსი საქართველოსთვის და არ უნდა გვქონდეს ჩვენ იმის მოლოდინი, რომ ევროკავშირი ან ამერიკის შეერთებული შტატები მთელ თავის დროს და რესურსებს დაუთმობენ იმას, რომ როგორმე ქართველ პოლიტიკოსებს ასწავლონ პოლიტიკა და ასწავლონ თავიანთი სამშობლოს ინტერესების სამსახური, – ამის შესახებ საერთაშორისო ურთიერთობების საკითხებში პრეზიდენტის ყოფილმა მრჩეველმა, თენგიზ ფხალაძემ “ინტერპრესნიუსთან” საუბრისას განაცხადა, რითაც ევროპული საბჭოს პრეზიდენტის, შარლ მიშელის მიერ საქართველოს პოლიტიკური პარტიებისთვის შეთავაზებულ ახალ წინადადებას გამოეხმაურა.
მისივე თქმით, აღნიშნულ დოკუმენტზე ხელის არმოწერა ნიშნავს იმას, რომ მხარეებს შეთანხმება არ სურთ.
“ქოცების” ბინძური შანტაჟით შექმნილ არანაირ დოკუმენტზე ხელის მოწერა არ შეიძლება,- ამის შესახებ „ნაციონალური მოძრაობის“ ერთ-ერთი ლიდერი გიორგი ბარამიძე სოციალურ ქსელში წერს.
მისივე თქმით, „ქართული ოცნების“ არასახელმწიფოებრივ, მოღალატეობრივ პოზიციასა და ოპოზიციის მორალურად, პოლიტიკურად და სამართლებრივად გამართულ პოზიციას შორის, “შუალედურის” ძებნა, პრინციპულად არასწორია.