მეცნიერთა ჯგუფმა ამერიკის შეერთებულ შტატებში კორონავირუსით ინფიცირებული ბავშვების მონაცემთა შესწავლის საფუძველზე დაადგინა, რომ არასრულწლოვნებში COVID-19-ის უსიმპტომოდ და მსუბუქ ფორმებში მიმდინარეობის შემთხვევები უფრო ხშირია, ვიდრე მოზრდილებში. ამასთანავე, მათ ეს დაავადება გაცილებით იშვიათად ემართებათ, ვიდრე დიდებს.
ნაშრომი აშშ-ის დაავადებათა კონტროლისა და პრევენციის ცენტრების ოფიციალურ ვებგვერდზე გამოქვეყნდა. მასში მიმდინარე წლის 12 თებერვლიდან 2 აპრილამდე ქვეყანაში დაფიქსირებული 2500 შემთხვევაა გაანალიზებული. ეს ამ დროისთვის COVID-19-ით დაავადებული ბავშვების ყველაზე მასშტაბური კვლევაა.
18 წელს ქვემოთ ასაკის ინფიცირებულთა მონაცემების ანალიზმა აჩვენა, რომ ტემპერატურის მომატება, ხველა და სუნთქვის გართულება მათ მხოლოდ 73 პროცენტს აღენიშნებოდა. მაშინ, როდესაც 18-დან 64 წლამდე ასაკის პაციენტებში ეს მაჩვენებელი 93 პროცენტია.
იმის მიუხედავად, რომ ბავშვები აშშ-ის მოსახლეობის 22 პროცენტს შეადგენენ, მათი ხვედრითი წილი კორონავირუსით ინფიცირებულ ყველა პაციენტს შორის მხოლოდ 1.7 პროცენტია.
იშვიათია ბავშვების მძიმე მდგომარეობაში ჰოსპიტალიზაციისა და დაღუპვის შემთხვევებიც. თუმცა, უნდა აღინიშნოს, რომ ახალშობილები რისკის ქვეშ არიან. მეცნიერთა თქმით, ამის მიზეზი ისაა, რომ მათი ორგანიზმი ჩამოყალიბების პროცესშია, რის გამოც ვირუსთან გასამკლავებლად ძლიერი იმუნური რეაქციის წარმოქმნა უჭირს.
ანალოგიური კვლევა პირველად ჩინეთში გამოქვეყნდა. ქვეყნის შვიდ პროვინციაში 16 იანვრიდან 8 თებერვლამდე ინფიცირებული 2100 ბავშვის შესწავლისას მეცნიერებმა დაადგინეს, რომ მათ 90 პროცენტს დაავადების სიმპტომები ან ჯანმრთელობის მკვეთრი გაუარესება არ აღენიშნებოდა.
აქედან 39 პროცენტს პნევმონია COVID-19-ის ხილული ნიშნების გარეშე განუვითარდა, დაახლოებით 50 პროცენტს ტემპერატურის მომატება, ხველება, ყელის ტკივილი ან სუნთქვის გართულება აღენიშნა, ხოლო 4 პროცენტს დაავადების სიმპტომები არ ჰქონია.
მსოფლიო ჯანდაცვის ორგანიზაციის მონაცემებით, COVID-19 ჩინეთის ქალაქ უხანში 2019 წლის 8 დეკემბერს გავრცელდა. თუმცა, არაოფიციალური ინფორმაციით, კორონავირუსით ინფიცირების პირველი შემთხვევა ხუბეის პროვინციაში ჯერ კიდევ 17 ნოემბერს აღინიშნა. დაავადების ადრეული სიმპტომები სიცხე, მშრალი ხველება და გართულებული სუნთქვაა. საინკუბაციო პერიოდი კი 2-დან 14 დღემდეა, რაც ვირუსთან ბრძოლას კიდევ უფრო ართულებს.
მოცემული დროისთვის COVID-19-ით დაავადებულთა რიცხვმა მსოფლიოში 1.6 მილიონს გადააჭარბა. ჩინეთში 81 ათასზე მეტი ადამიანის ინფიცირების შემდეგ, ახალი შემთხვევების მკვეთრი კლება აღინიშნება. ქვეყანამ ხუბეის პროვინციასა და ქალაქ უხანში კარანტინი გააუქმა. ასეთივე ვითარებაა სამხრეთ კორეაში, სადაც დაავადებულთა რაოდენობის თავდაპირველი ზრდის შემდეგ, ეპიდემიოლოგებმა მასობრივი ტესტირების საშუალებით კორონავირუსის გავრცელების შეჩერება შეძლეს. 7 ათასზე მეტი ინფიცირებული იქ უკვე გამოჯანმრთელდა, მკურნალობას კი მხოლოდ 3 ათასი პაციენტი განაგრძობს.
მოცემული დროისთვის პანდემიის მთავარი კერა ამერიკის შეერთებული შტატებია, სადაც ინფიცირებულია თითქმის ნახევარი მილიონი ადამიანი, დაღუპული კი 17 ათასზე მეტი. ევროპაში კი დაავადებულთა და გარდაცვლილთა ყველაზე დიდი რიცხვი ესპანეთში, იტალიასა და საფრანგეთშია.
POPX.GE