ოკუპირებულ გალში მეშვიდე დღეა 28 წლის ნათია ბახტაძეს ეძებენ. მის გაუჩინარებაში ბრალდებული პირი აინარ წვიშბა ამ დრომდე სოხუმის წინასწარი დაკავების იზოლატორში იმყოფება. იგი გამოძიებასთან არ თანამშრომლობს.
არსებული ინფორმაციით, აინარ წვიშბა ე.წ. ყოფილო პრეზიდენტის რაულ ხაჯიმბას პარტიის ლიდერია და საკმაოდ დიდი გავლენებით სარგებლობს აფხაზეთში.
როგორც ინფორმირებულმა წყარომ “პრაიმტაიმს” განუცხადა, ამ დროსთვის სამძებრო სამუშაობი გალის ცენტრიდან 500 მეტრში მიმდინარეობს.
„ენგურჰესის კაშხალიდან წუხელ წყალი გამოუშვეს და სწორედ იმ არხში მიმდინარეობს სამძებრო სამუშაოები. პარალელურად ეძებენ ოჩამჩირის ტყეში, სადაც ახალგაზრდა ქალი, სავარაუდოდ დატოვა.
ნათიას სახლი, გალის ადმინისტრაციის შენობის გვერდით მესამე სახლია, მთელი რაიონი ფეხზე დგას, პედაგოგები. ხვალ კონცერტია დაგეგმილი გალის ადმინისტრაციის მიერ, ბოლო 20 წელია მსგავსი არც მომხდარა. რა ეკონცერტებათ, ვის ადარდებს თვითნებურად მცხოვრები ჩვენი ქართველების ბედი”,- გვითხრა წყარომ.
გავრცელებული ცნობით, ახალგაზრდა კაცი ნათია ბახტაძეს ავიწროვებდა და სახლშიც უვარდებოდა. ან ჩემი გახდები, ან არავისიო. წყაროსვე ცნობით, აინარ წვიშბას მამა გავლენების გამოყენებით ცდილობს საქმის ჩაფარცხვას.
“შეურაცხადის საბუთი უნდა გაუკეთენო აინარს, ასე გავიგეთ, მამას 4 ადვოკატი ჩამოუყვანია მისთვის რუსეთიდან. ამოქმედებული აქვს მამას ფეიკ ინფორმაციების მანქანა. ჭორებს უვრცელებენ საწყალ გოგოს”,-გვეუბნება ინფორმირებული წყარო.
ცნობისთვის, 28 წლის ქალი გალში 28 ივლისს გაუჩინარდა. 31 ივლისს მისმა დედამ იამზე აგუმავამ სოციალურ ქსელში გამოაქვეყნა მიმართვა, სადაც შვილის ძებნაში დახმარებას ითხოვს.
