რა გამოდის? ესტონეთის მთავრობაში არიან იდიოტები, როცა ახალ რეისებს ანიშნინებენ „ვიზიარს“ და მარტო ნათია თურნავაა ჭკვიანი და ზრუნავს ხალხზე? ეს ხომ აბსურდია,- ამის შესახებ „ევროპული საქართველოს“ წევრმა გიორგი კანდელაკმა დღეს გამართულ ბრიფინგზე განაცხადა.
მისი თქმით, ფრენებთან დაკავშირებული პოლიტიკა, რომელიც „ქართულ ოცნებას“ აქვს საარჩევნო მიზნებით არის განპირობებული და მათ ემიგრანტების ქვეყანაში დაბრუნება არ სურთ.
„მთავრობა არაფორმალურად, დე ფაქტოდ კრძალავს საქართველოს მოქალაქეების სამშობლოში დაბრუნებას, მათ შორის იმ ქვეყნებიდან, რომლებიც საქართველოს მთავრობამ უსაფრთხო ქვეყნებად გამოაცხადა, ხოლო ამ ქვეყნების მოქალაქეებს ყოველგვარი კარანტინის გარეშე ქვეყანაში უშვებს. მაშინ როცა ამ ქვეყნის მოქალაქეებს შეუძლიათ შემოვიდნენ კარანტინის გარეშე, ჩვენი ქვეყნის მოქალაქეები, რომლებიც ბრუნდებიან ამ ქვეყნებიდან, იძულების წესით თავსდებიან კარანტინში. ასევე აკრძალულია „ვიზიარი“ და ხელმისაწვდომი ფრენები, ამ ავიაკომპანიებს მთავრობა ეუბნება, რომ უნდა მოიცადონ არჩევნებამდე, ამ ყველაფრის პარალელურად, როცა ამდენი ხალხი ვერ ბრუნდება საქართველოში, ამდენი ხალხი წვალობს, ჩვენთან მოდის ინფორმაცია, რომ “ქართულ ოცნებასთან” დაახლოებული პირებისთვის შესაძლებელია კარანტინის გვერდის ავლით „ჩაწყობა“, როცა ისინი ბრუნდებიან იმ ქვეყნებიდანაც კი, რომლებიც არ არის უსაფრთხო ქვეყნები. მაგალითად, ბოლო დროს შემოვიდა მარიკა ვერულაშვილის შვილის ოჯახი, რომელმაც ჩააწყო და ქვეყანაში შემოვიდა 24 საათიანი კარანტინით და ტესტით, ასევე იყო ჩარტერული რეისით მაკა ასათიანი. მე ამ ხალხთან კი არ მაქვს პრეტენზია, პრეტენზია მაქვს საქართველოს მთავრობასთან. თუ ვიღაცას შეუძლია ისარგებლოს პრივილეგიით, რატომ უნდა ვაწვალოთ ამდენი ადამიანი, რომლებსაც სურთ სამშობლოში დაბრუნება. ერთ – ერთი მიზეზი, ჩვენი ინფორმაციით, რის გამოც არის ასეთი ფაქტიური აკრძალვა სამშობლოში დაბრუნების და რის გამოც “ქართული ოცნება” ახორციელებს ამ პოლიტიკას, არის ის, რომ მათ არ სურთ რამდენიმე ათეული ათასი ემიგრანტის დაბრუნება არჩევნებისთვის. სხვანაირად ვერ იხსნება რატომ არ შეიყვანეს უსაფრთხო ქვეყნების ათეულში მაგალითად, საბერძნეთი, რომელსაც აქვს რამდენჯერმე უკეთესი სტატისტიკა საქართველოზე. ამავე დროს ჩვენ ვიგებთ ინფორმაციას, რომ ლიტვიდან და ესტონეთიდან მთავრობამ დაბლოკა ტურისტებით სავსე 16 ჩარტერი, რამდენიმე დღის წინ „ვიზიარმა“ დანიშნა ახალი რეისები რიგიდან და ტალინიდან და რა გამოდის? ესტონეთის მთავრობაში არიან იდიოტები, როცა ახალ რეისებს ანიშნინებენ „ვიზიარს“ და მარტო ნათია თურნავაა ჭკვიანი და ზრუნავს ხალხზე? ეს ხომ აბსურდია,”- განაცხადა კანდელაკმა.
