ნება იბოძე გახარია გამოდი და გააკეთე განცხადება, რომ ეს შეცდომა იყო – ამ სიტყვებით პანკისელმა თემურ ცათიაშვილმა საქართველოს ყოფილ პრემიერ მინისტრს, ქუთაისის ცენტრალურ მოედანზე, ნამახვანჰესის მშენებლობის წინააღმდეგ გამართულ აქციაზე სიტყვით გამოსვლისას მიმართა. მისი თქმით იმ ხელისუფლებების დრო დასრულდა, რომლებმაც საქართველო მიწა-წყალი თავიანთ სასარგებლოდ გაყიდეს:
“მე ვარ პანკისის ხეობიდან, დღეს მე ვარ ქართველი და იცით რატომ? იმიტომ რომ მტკივა ქართული მიწა. ვინ არის ქართველი?! ვისაც ეს ტკივა! გულში თუ გტკივა შენ, მნიშვნელობა არ აქვს საიდან ხარ შენ! ოსი ხარ! ქისტი ხარ! რუსი ხარ! აფხაზი ხარ! საიდან ხარ! აზრებაიჯანელი ხარ! თუ შენ დღეს გულში გტკივა საქართველო, შენ ქართველი ხარ! ჩვენ განვიცადეთ ჩვენს თავზე ის ტკვილი, რასაც დღეს რიონის მაცხოვრებლები განიცდიან, როდესაც ისინი ხვდებიან რომ დგება თურმე დრო, როდესაც ხელისუფლება ეუბნება მათ რომ, თქვენ რიგითი ადამიანები ხართ, რომ თქვენ ამ ქვეყნის მეორეხარისხოვანი შვილები ყოფილხართ და ჩვენ, იქ გავაკეთებთ საქმეს, ფულს, ბიზნეს, სადაც ჩვენ გაგვიხარდებაო, მაგრამ ნურასუკაცრავად, დამთავრდა ნებისმიერი ხელისუფლების ბოგინი, რომელმაც გადაწვიტა ფულის შოვნა საქართველოს მიწა-წყლის გაყიდვის ხარჯზე. ჩვენ აქ რომ ვდგავართ, ეს იმას ნიშნავს რომ, დასრულდა ეპოქა საქართველოში, როდესაც უღირსი ხელისუფლება მართავს სახელწიფოს. დღეს ჩვენ აქ დავინახეთ რომ ქართველი ხალხი, კავკასია, რომელიც საქართველოდან იწყება არის ურყევი, არის შეუპოვარი!
ხელისუფლებას კიდევ აქვს საფიქრალი ორი კვირა! ნება იბოძე გახარია, რომელიც წახვედი შენი პოსტიდან, რომელმაც 2019 წელს შენი ხელით მოაწერე ხელი საქართველოს მიწის გაყიდვას, გამოდი და გააკეთე განცხადება რომ ეს შეცდომა იყო. უთხარი ხელისუფლებას – დაიხიეთ უკან! საქართველოს, ქართველ ხალხს ვერ აჯობებთ! – განაცხადა თემურ ცათიაშვილმა ქუთაისში აქციაზე სიტყვით გამოსვლისას.
ცნობისთვის, გუშინ ქუთაისის ცენტრალურ მოედანზე რიონის ხეობის მცველებმა ნამახვანჰესის მშენებლობის წინააღმდეგ მასშტაბური აქცია გამართეს. მათ ათასობით მოქალაქე საქართველოს სხვადასხვა კუთხიდან შემოუერთდა. აქციის ორგანიზატორების მთავარი მოთხოვნაა მშენებელმა კომპანიამ “ენკა” დატოვოს რიონის ხეობა, მათთვის გადაცემული ტერიტორია კი კვლავ დაუბრუნდეს საქართველოს. მოთხოვნების შეუსრულებლობის შემთხვევაში აქციის მონაწილეები 14 მარტს ქუთაისის პიკეტირებას აანონსებენ. რიონის ხეობის მცველები ჰესის მშენებლობას უკვე 4 თვეა აპროტესტებენ და რიონის ხეობაში, კარავში ღამეს ათევენ.