ცენტრალურმა შემსყიდველმა ორგანომ 77 ერთეული M3 კატეგორიის ავტობუსის შესასყიდად ტენდერი გამოაცხადა.
შესყიდვის სავარაუდო ღირებულება 32 055 639 ლარს შეადგენს, წინადადებების მიღება კი 18 აგვისტოს იწყება და 19 აგვისტოს სრულდება.
შესყიდვის სავარაუდო ღირებულებით, ერთი ავტობუსის ფასი საშუალოდ, 416 300 ლარია. სატენდერო წინადადებით, თანხაში სატრანსპორტო საშუალების ღირებულებასთან ერთად, განბაჟების, სახელმწიფო რეგისტრაციისა და 200 000 კილომეტრამდე გეგმური თუ საგარანტიო მომსახურების ხარჯებიცაა გათვალისწინებული.
სატენდერო დოკუმენტაციის მიხედვით, შემოთავაზებული ავტობუსები უნდა იყოს:
- ა) ერთი და იმავე ბრენდის და მოდელის
- ბ) ახალი
- გ) არაუადრეს 2026 წლის გამოშვების
- დ) მარცხენა საჭიანი
- ე) ექსპლუატაციაში არმყოფი
- ვ) მიწოდებისას გარბენი არაუმეტეს 6000კმ
- ზ) ნივთობრივად და უფლებრივად უნაკლო
- თ) განბაჟებული.
ტექნიკური დავალების მიხედვით, ავტობუსის სიგრძე უნდა იყოს არაუმეტეს 8.5 მეტრს, სიმაღლე – 3.3 მეტრს, ხოლო სიგანე (სარკეების ჩათვლით) 2.5 მეტრს უნდა შეადგენდეს. ავტობუსის ფერი უნდა იყოს ლურჯი ან მწვანე, შემსყიდველთან შეთანხმებით.
ამასთან, სატრანსპორტო საშუალებას უნდა გააჩნდეს არანაკლებ 21 სტანდარტული დასაჯდომი ადგილი + სივრცე არანაკლებ ერთი შეზღუდული შესაძლებლობების მქონე პირის ეტლისათვის. სივრცე აღჭურვილი უნდა იყოს სათანადო სახელურებითა და გაჩერების მოთხოვნის ღილაკით, ეტლის სათანადო ადგილას დასამაგრებელი ღვედით. მოთხოვნილი დასაჯდომი ადგილების რაოდენობაში იგულისხმება დასაჯდომი ადგილების რაოდენობა შშმ პირების ეტლის განთავსების შემთხვევაში. საერთო ჯამში, გათვლილი უნდა იყოს არანაკლებს 45 მგზავრზე.
დოკუმენტაციის მიხედვით, ავტობუსების მიწოდება უნდა განხორციელდეს ეტაპობრივად ხელშეკრულების გაფორმებიდან 240 (ორას ორმოცი) კალენდარული დღის განმავლობაში.
