ქუთაისის საკრებულოს თავმჯდომარის მოვალეობის შემსრულებელმა ირაკლი შენგელიამ საკრებულოს სხდომაზე განაცხადა, რომ მზად არის როგორც ექიმი კოვიდ პანდემიასთან ბრძოლაში ჩაერთოს. ამის შესახებ ინფორმაციას ქუთაისის მერია ავრცელებს. შენგელიას თქმით, ჯანდაცვის სისტემის გამართული ფუნქციონირების საქმეში მმართველი რგოლი აქტიურ მონაწილეობას იღებს, ვინაიდან ინფიცირებული პაციენტების მკურნალობის ყველა ეტაპზე, მაღალია რადიოლოგიური კვლევების წილი. მან მზადყოფნა გამოთქვა, რომ საკუთარი კომპეტენციის ფარგლებში ნებისმიერი ფორმით დამატებითი პირობების გარეშე ჩაერთოს პანდემიასთან ბრძოლის პროცესში.
„COVID-19 ვირუსის მეორე ფაზის გააქტიურებასთან და ახალი შემთხვევების მატებასთან ერთად, სახელმწიფო აკეთებს ყველაფერს, რათა ჯანდაცვის სექტორმა ნაკლები დანაკარგებით და მაქსიმალურად ეფექტიანად უპასუხოს პანდემიის გლობალურ გამოწვევას. კლინიკური ჩვენების მქონე ყველა ინფიცირებული პაციენტის დროული ჰოსპიტალიზაციისთვის მთელი ქვეყნის მასშტაბით ეწყობა დამატებით კოვიდმიმღები ცენტრები. ამ პერიოდში ბრძოლის წინა ხაზზე, სწორედ, ჯანდაცვის სფეროს წარმომადგენლები არიან და ყველაზე დიდ დარტყმასაც ეს სექტორი იღებს. ჯანდაცვის სისტემის გამართული ფუნქციონირება არის სასიცოცხლო მნიშვნელობის და ამ პროცესში თანაბრად არის ჩართული მმართველი რგოლიც, როგორც ცენტრალურ, ასევე ადგილობრივ დონეზე. ვგრძნობ რა ამ გამოწვევის მნიშვნელობას და პროფესიულ პასუხისმგებლობას, მზად ვარ, როგორც ექიმი, ჩავერთო კოვიდ პანდემიასთან ბრძოლის საქმეში. მივმართავ პირველადი ჯანდაცვისა თუ ჰოსპიტალური სექტორის წამომადგენლებს, ვიქნები თქვენ გვერდით როგორც ექიმ -რადიოლოგი და რენტგენ -ლაბორანტი, ჩემი კომპეტენციის ფარგლებში შევასრულებს პროფესიულ საქმიანობას, ნებისმიერი ფორმითა და დროით, დამატებითი პირობების გარეშე, იმ ნაწილში, სადაც ამის საჭიროება ყველაზე მეტად გექნებათ! “- განაცხადა ირაკლი შენგელიამ.