უკრაინის პრეზიდენტის, ვოლოდიმირ ზელენსკის თქმით, მარიუპოლში, რომელიც უკვე 1 თვეზე მეტია, რუსი ოკუპანტების ალყაშია, უკიდურესად მძიმე ვითარებაა.
როგორც მან ვიდეო მიმართვაში აღნიშნა, რუსეთზე ზეგავლენის მოსახდენად მხოლოდ ორი გზა არსებობს: ან პარტნიორებმა უკრაინას ყველა საჭირო იარაღი უნდა მიაწოდონ, ან საკითხი მოლაპარაკების გზით უნდა გადაწყდეს, სადაც პარტნიორებს ასევე გადამწყვეტი როლი ექნებათ.
“მარიუპოლში უკიდურესად მძიმე ვითარებაა, უბრალოდ არაადამიანური. ეს არის ის, რაც რუსეთის ფედერაციამ შეგნებულად გააკეთა და ახლაც აგრძელებს ქალაქების განადგურებას. ცდილობს, გაანადგუროს ყველა, ვინც მარიუპოლშია.
ამაზე გავლენის მოსახდენად მხოლოდ ორი გზა არსებობს: ან პარტნიორებმა უკრაინას ყველა საჭირო იარაღი, თვითმფრინავები დაუყოვნებლივ უნდა მიაწოდონ, რათა ოკუპანტების ზეწოლა შევამციროთ და მარიუპოლი განვბლოკოთ, ან მოლაპარაკებების გზა, რომელშიც პარტნიორების როლი ასევე გადამწყვეტი უნდა იყოს.
მინდა ყველას გასაგონად ვთქვა, მარიუპოლის ბლოკადის შემდეგ, არც ერთი დღე არ ყოფილა, რომ გამოსავალს არ ვეძებდეთ, იქნება ეს სამხედრო თუ დიპლომატიური, რაც კი საჭიროა იმისთვის, რომ ხალხი გადავარჩინოთ. თუმცა, ამ გამოსავლის პოვნა ძალიან რთული. ჯერჯერობით 100%-ით რეალური ვარიანტი არ არსებობს. ეს ეხება როგორც სამხედრო ვარიანტებს, ასევე მოლაპარაკების პროცესს”, – თქვა ვოლოდიმირ ზელენსკიმ.
