20 ივნისის საქმეზე სასამართლომ 16 პირიდან არც ერთი, მათ შორის არც მაკო გომური დაზარალებულად არ სცნო.
აღნიშნული გადაწყვეტილება თბილისის საქალაქო სასამართლოს მოსამართლე ნინო ჩახნაშვილმა მიიღო.
როგორც „ინტერპრესნიუსს“ საია-ს იურისტმა რეზო აჭარაძემ განუცხადა, მათი საჩივარი 16 ადამიანის დაზარალებულად ცნობას მოიცავდა, რომელთაგან 8 ჟურნალისტი, 8 კი სამოქალაქო პირი იყო. აჭარაძის განმარტებით, ვინაიდან პროკურატურამ აღნიშნული პირების დაზარალებულად ცნობაზე უარი განაცხადა, სასამართლო იყო ბოლო შანსი, რომ ისინი დაზარალებულად ეცნო.
იურისტი აცხადებს, რომ მოსამართლემ დაუსაბუთებელი განაჩენი გამოიტანა. როგორც აჭარაძე აღნიშნავს, მოსამართლის განმარტებით, აღნიშნულ პირებს ზიანი დანაშაულით რომ მიადგათ არ დგინდება, ასევე არ დგინდება, თუ რომელი დანაშაულით. აჭარაძის განმარტებით, საია-ს საჩივარი სასამართლომ 25 ოქტომბერს არ დააკმაყოფილა, დასაბუთებული განაჩენი კი დღეს ჩაბარდათ.
ცნობისთვის, 20 ივნისის საქმეზე პროკურატურამ დაზარალებულად 67 პოლიციელი და აქციის 4 მონაწილე სცნო.
