„ქართული ოცნების“ ყოფილი დეპუტატი, ვეტერანი მოჭიდავე ლუკა კურტანიძე, რომელსაც ყოფილი მეუღლის მიმართ ძალადობას, მისი ნივთის განზრახ დაზიანებასა და დამცავი ორდერით გათვალისწინებული მოთხოვნების შეუსრულებლობას ედავებიან, ბრალს არ აღიარებს.
როგორც „ინტერპრესნიუსთან“ საუბარში კურტანიძის ადვოკატმა ივანე მეფარიშვილმა განაცხადა, ბრალდებულს დიდი პროვოკაცია მოუწყვეს და მას არავისზე უძალადია.
„ბრალს არ აღიარებს და მიაჩნია, რომ ეს დიდი პროვოკაციის შედეგია, რომელიც მის მიმართ განხორციელდა. კურტანიძე ძალიან დიდი პროვოკაციის მსხვერპლი აღმოჩნდა იმ ძალების მხრიდან, რომლებიც დესტაბილიზაციის და არეულობის შემოტანას ცდილობენ საზოგადოებაში. ამას საზოგადოება ბოლო თვეების განმავლობაში, ამა თუ იმ ფორმით აწყდებოდა, მათ შორის, საზოგადოებისთვის ცნობილი პიროვნებების მიმართ თავდასხმებს სხვადასხვა ფორმების გამოყენებით. ერთ-ერთი მსხვერპლი, მისი ყოფილი მეუღლე გამოიყენეს, რომელთანაც ცნობილი იყო, რომ კურტანიძეს პრობლემები, დავა ჰქონდა. ეს ეფექტურად გამოიყენეს და პატარა წარმატებას ამ კუთხით მიაღწიეს, ახლა კურტანიძე საპატიმროში იმყოფება და ბრალი სამი მუხლით აქვს წარდგენილი.
მინდა მისი ყველა გულშემატკივარი, ყველა ის ადამიანი დავამშვიდო, ვინც თვლის, რომ ლუკა კურტანიძე არათუ ქალებზე მოძალადეა, არამედ მთელი ცხოვრება ადამიანების სიყვარულში და სამართლიანობისთვის ბრძოლაში გაატარა, ის ყველა შედეგი და წარმატება, რაც ქვეყანას საერთაშორისო არენაზე მოუტანა, სწორედ ამ სიყვარულისა და ამ ადამიანობის შედეგი იყო, რაც მას საკუთარ ქვეყანასთან და ადამიანებთან აკავშირებს. ის ამ მძიმე პროვოკაციების მსხვერპლი აღმოჩნდა ამ ძალების მხრიდან. ლუკა განიცდის იმას, რომ მისი ყოფილი მეუღლე, რომელსაც თანაცხოვრების პერიოდში გადაჰყვა, გამოყენებული იქნა. ის საკუთრებაც, რომელზეც დავაა, ლუკას მხრიდან ჩუქების ხელშეკრულებით იყო ნახევარი ამ ქალბატონისთვის გადაცემული, არამხოლოდ ეს ქონება, წყნეთში, რა ქონებაც გააჩნია – სახლი, ბორჯომში სახლი – გადაჰყვა თან, მაგრამ როცა მიხვდა, რომ ამ ქალბატონს სხვა განზრახვები და სხვა რამ ამოძრავებდა, დისტანცირდა, მოსთხოვა, რაც მოტყუებით გადაიფორმა. ამ პერიოდის განმავლობაში სხვადასხვა დავა მიმდინარეობდა. მისმა მტრებმა ეს ძალიან ეფექტურად გამოიყენეს, გაიგეს ლუკას ეს სუსტი წერტილი და ყველანაირად მომზადებული მივიდნენ, პროვოკაცია მოუწყვეს“, – განაცხადა მეფარიშვილმა.
კითხვაზე, თუ ვინ მოაწყო პროვოკაცია, ადვოკატი პასუხობს, რომ „ეს ქალბატონი პროვოკატორად „ნაციონალურმა მოძრაობამ“ გამოიყენა“.
„და კურტანიძის მტრებმა და იმ ხალხმა, ვინც ბოლო თვეების განმავლობაში საჯარო პირებს თავს საჯაროდ ესხმიან. მათ ეს რაღაც ფორმით აირიდეს. ლუკამ ემოციურად მოუწოდა ყოფილ მეუღლეს, როცა შეურაცხყოფის მიყენება, გადაღება დაუწყო, იმ სახლში, რომელიც თავის ოფლით და შრომით მოიპოვა. აფხაზეთიდან ლუკა მაისურისა და შარვლის ამარა წამოვიდა, თავისი შრომითა და ოფლით შეძენილი ქონება გადაუფორმა ამ ქალბატონს… საბოლოოდ ეს ყველაფერი იმ პროვოკაციით დაგვირგვინდა, რაც იმ დღეს მოხდა. როცა ლუკა საკუთარ სახლში მივიდა, პოლიცია იყო გამოძახებული, ეს ქალბატონი იღებდა, ემოციურ მდგომარეობაში ჩავარდა, მოუწოდა ეს ტერიტორია დაეტოვებინა“, – განაცხადა ადვოკატმა.
კითხვაზე, იძალადა თუ არა კურტანიძემ მის ყოფილ მეუღლეზე, მეფარიშვილმა უარყოფითი პასუხი გასხა.
„კურტანიძე ფიზიკურ ძალადობას გამორიცხავს, რაც შეეხება დანარჩენს – სისხლის სამართლის საქმის მასალებს ვეცნობით“, – განაცხადა ადვოკატმა.
კითხვაზე, თუ სად მიიღო დაზარალებულმა დაზიანებები და ტვინის შერყევა, მეფარიშვილი პასუხობს, რომ ეს ექსპერტიზამ უნდა დაადგინოს.
„დაზარალებული ამბობს, მაგრამ ექსპერტიზის დასკვნა ჯერ არ არის, ცნობილი არ არის დაზიანება რა გარემოებებში, რა ვითარებაში მიიღო“, – განაცხადა ადვოკატმა.
დღესვე, ბათუმის საქალაქო სასამართლოში ლუკა კურტანიძის მიმართ აღკვეთის ღონისძიების შეფარდებაზე იმსჯელებენ. პროკურატურა კურტანიძისთვის ყველაზე მკაცრი აღკვეთის ღონისძიების, პატიმრობის გამოყენებას მოითხოვს. რაც შეეხება დაცვის მხარეს, როგორც ადვოკატი აცხადებს, ის კურტანიძის აღკვეთის ღონისძიების გარეშე დატოვებას მოითხოვს, სასამართლოს კი, ალტერნატივის სახით გირაოს შესთავაზებს.
ცნობისთვის, „ქართული ოცნების“ ყოფილ დეპუტატს, ვეტერან მოჭიდავეს, ლუკა კურტანიძეს პროკურატურამ ბრალდება ოჯახის წევრის მიმართ ძალადობის, ოჯახის წევრის ნივთის განზრახ დაზიანებისა და ოჯახის წევრის მიმართ დამცავი ორდერით გათვალისწინებული მოთხოვნების და ვალდებულებების შეუსრულებლობის მუხლით წარუდგინა, რაც 5 წლამდე ვადით თავისუფლების აღკვეთას ითვალისწინებს.
