2024 წლის ორი კვარტლის მონაცემებით, საქართველოს 3 მილიონზე მეტი საერთაშორისო მოგზაური ეწვია, რაც 5.6%-ით აჭარბებს 2023 წლის ანალოგიური პერიოდის მაჩვენებლებს.
ეკონომიკის მინისტრის მოადგილის, მარიამ ქვრივიშვილის შეფასებით, სწორი, თანმიმდევრული პოლიტიკის შედეგად, ტურიზმის ინდუსტრია აგრძელებს მდგრად განვითარებას და განსაკუთრებით საგულისხმოა, რომ მთავრობის დივერსიფიკაციის პოლიტიკა ასევე ასახულია მეორე კვარტლის მონაცემებში.
იანვარ-ივნისის პერიოდში 2 123 816 საერთაშორისო ტურისტული ვიზიტი განხორციელდა, რაც 2023 წელთან შედარებით 10%-იან ზრდას შეადგენს. 2024 წლის მეორე კვარტალში გასული წლის მეორე კვარტალთან შედარებით მნიშვნელოვანი ზრდა ფიქსირდება როგორც საერთაშორისო მოგზაურების (ზრდა 4.2%), ისე საერთაშორისო ტურისტული ვიზიტების კუთხით (ზრდა 9.2%). ზრდის მნიშვნელოვანი მაჩვენებლებია ასევე ავიარეისებისა და მგზავრთნაკადის მიმართულებით – მიმდინარე წლის 6 თვეში საქართველოს აეროპორტები 3 204 833 მგზავრს და 14 127 რეისს მოემსახურა. 2023 წლის იანვარ-ივნისთან მიმართებაში მგზავრთნაკადის ზრდა 30%-ს, ავიარეისების ზრდა კი 33% -ს შეადგენს. აღსანიშნავია, რომ მგზავრთნაკადი მიმდინარე წლის ორ კვარტალში 29%-ით მეტია პანდემიამდელ, 2019 წლის იანვარ-ივნისის მაჩვენებელზე, ხოლო რეისების ოდენობა 20%-თ არის გაზრდილი. მეორე კვარტლის მონაცემებით, 2024 წელს მგზავრთნაკადში 25%-იანი (1,426,499 მგზავრი), რეისების რაოდენობაში კი 31%-იანი (6,075 რეისი) ზრდა ფიქსირდება.
